‘असारे विकास रोक्नुस्’

कान्तिपुर संवाददाता

मुगु — संघीय संरचना लागू भएको डेढ वर्षसम्म पनि असारमा मात्रै बढी बजेट खर्चिने प्रवृत्ति नरोकिएकोमा सरोकारवालाले आपत्ति जनाएका छन्  । उनीहरूले आगामी वर्षमा समयमै बजेट कार्यान्वयन गर्ने गरी योजना बनाउन स्थानीय तहलाई सुझाव दिएका छन्  ।

छायाँनाथरारा नगरपालिकाको पाँचौं नगरसभा उद्घाटन बोल्दै जिल्ला समन्वय समितिका संयोजक पूर्णबहादुर रोकायाले व्यवस्था बदलिए पनि काम गर्ने तौरतरिका नबदलिएको बताए । ‘११ महिनासम्म जनप्रतिनिधि हात बाँधेर बस्ने, असार लागेपछि हतारहतार योजना सम्झौता गर्ने प्रवृत्ति अहिले पनि देखियो,’ उनले भने, ‘यसले विकास होइन, विनाश निम्त्याउँछ ।’ उनले असारे विकास तुरुन्त रोक्न सबै स्थानीय तहलाई आग्रह गरे ।


नगरसभामा सहभागी अन्यले भागबन्डा गरेर बजेट सिध्याउने काम भएको भन्दै आपत्ति जनाए । जिल्ला नागरिक सञ्जालका संयोजक चित्रबहादुर मल्लले आर्थिक स्वार्थका लागि उपभोक्ता समितिमा बस्न हानथाप हुनु दुर्भाग्य भएको बताए ।

‘गाउँमा घुमफिर गर्न जाँदा नयाँ विकास केही देख्न पाइँदैन, राज्यबाट आएको करोडौं बजेट कहाँ गइरहेको छ ?’ उनले भने, ‘नगरपालिकामा दुई वर्षको बजेट खर्च भएर अहिले तीन वर्षमा लाग्दै छ तर विकासको उपलब्ध भने अत्यन्तै न्यून छ ।’ कतिपय सहभागीले कर्मचारी र प्राविधिकको आनीबानीले विकासले गति लिन नसकेको बताए ।

प्रमुख जिल्ला अधिकारी जयकुमार घिमिरेले स्थानीय तहका जनप्रतिनिधिले जवाफदेही, पारदर्शिता र उत्तरदायी भएर काम गरेमा परिणाम देखिने बताए । नगरप्रमुख हरिजंग शाहीले सरोकारवालाले दिएको सुझावअनुसार नगरको समृद्धिमा काम गर्ने बताए ।

प्रकाशित : असार २९, २०७६ १५:४५
प्रतिक्रिया
पठाउनुहोस्
ADVERTISEMENT
ADVERTISEMENT

गाउँ–गाउँमा निःशुल्क इन्टरनेट

हरि गौतम

रुकुम पश्चिम — निःशुल्क इन्टरनेट सेवा प्रदान गर्ने सरकारी नीतिअनुसार रुकुम पश्चिमका गाउँमा वाईफाई डिभाइस जडानको काम सम्पन्न भएको छ  । वर्ल्डलिंक कम्युनिकेसनले जिल्लाका १ सय ८७ सरकारी एकाइमा इन्टरनेटको प्रविधि जडान गरेको हो  ।

रुकुम पश्चिमका जिल्ला अस्पतालसहित ४३ स्वास्थ्य संस्था, ६५ सामुदायिक विद्यालय, ७३ वडा कार्यालय र ६ स्थानीय तहमा वाईफाई डिभाइस जडान गरिएको वर्ल्डलिंकका परियोजना सहायक रूपेश बुढाथोकीले बताए । उनका अनुसार नेपाल दूरसञ्चार प्राधिकरणअन्तर्गतको ग्रामीण दूरसञ्चार शाखाले कर्णाली प्रदेशका रुकुम पश्चिमसहित जाजरकोट, कालीकोट, जुम्ला, मुगु, डोल्पा र हुम्ला तथा ५ नम्बर प्रदेशका रुकुम पूर्व र रोल्पा गरी ९ जिल्लामा निःशुल्क वाईफाई जडान गर्ने जिम्मा दिएको छ ।

नगर तथा गाउँपालिका कार्यालय, वडा कार्यालय, अस्पताल, प्राथमिक स्वास्थ्य केन्द्र, स्वास्थ्य चौकी र मावि तहसम्म पठनपाठन हुने विद्यालयमा वाईफाई डिभाइस जडान भएको हो । वर्ल्डलिंकले २०७५ वैशाखदेखि रुकुम पश्चिमलगायत अन्य जिल्लामा इन्टरनेट सेवाका उपकरण जडान थालेको थियो ।

कर्णालीका ७ मध्ये रुकुम पश्चिम, जाजरकोट, कालीकोट र जुम्लामा इन्टरनेट जडान कार्य सकिएको छ । ५ नम्बर प्रदेशको रोल्पामा पनि इन्टरनेट जडान कार्य सम्पन्न भएको कर्णाली परियोजना प्रमुख किरण देवकोटाले बताए । ५ नम्बर प्रदेशको रुकुमपूर्व र कर्णालीका डोल्पा, हुम्ला तथा मुगुमा इन्टरनेट जडान कार्य जारी रहेको उनले बताए । ‘भौगोलिक विकटता, बिजुली अभावलगायत कारणले केही जिल्लामा इन्टरनेट जडानमा ढिलाइ भइरहेको छ,’ उनले भने, ‘तैपनि हामीले निर्धारित समयमा आफ्नो काम सम्पन्न गर्नेछौं ।’


इन्टरनेट जडानका लागि डिभाइस, राउटर, एडप्टर र तारको व्यवस्थापन वर्ल्डलिंकले गर्छ । ४ हजार ३ सय मिटर उचाइसम्ममा भूभागमा टावर राखिएकाले अब यी ९ जिल्लाका कुनै पनि वडा इन्टरनेट सेवाबाट वञ्चित नहुने वर्ल्डलिंकका प्राविधिकको भनाइ छ । इन्टरनेट १ एमबीपीएस गतिमा चल्छ । नेपाल सरकारले ५१२ केबीपीएस गतिमा चल्ने इन्टरनेट जडान गर्ने कार्यादेश दिए पनि वर्ल्डलिंक कम्युनिकेसनले बढाएर १ एमबीपीएस गतिमा चल्ने बनाएको देवकोटाले बताए ।

प्रकाशित : असार २९, २०७६ १५:४४
पूरा पढ्नुहोस्
प्रतिक्रिया
पठाउनुहोस्
ADVERTISEMENT