अनियमित लोडसेडिङले सास्ती

विप्लव महर्जन

(सल्यान) — वर्षा सुरु भएसँगै जथाभावी लोडसेडिङ बढदै गएको छ । अनियमित लोडसेडिङले सर्वसाधारणले सास्ती खेप्नुपरेको छ । जानकारीबिनै लोडसेडिङ हुन थालेपछि सरकारी कार्यालय र सर्वसाधारणका काम प्रभावित भएको छ ।

सदरमुकाम खलंगा र आसपासको क्षेत्र ३ दिनदेखि विद्युत् छैन । सामान्य वर्षा भए पनि बिजुलीको लाइन काटिँदा जनजीवन प्रभावित बनेको हो । कथं विद्युत् आए पनि भोल्टेजको समस्या उस्तै छन् । विद्युत् नहुँदा जिल्लामा सञ्चालित २ दर्जन बढी घरेलु उद्योग सञ्चालनमा समस्या भएको छ । शीतलपार्टीस्थित सब–स्टेसनको काम पूरा भए पनि लोडसेडिङले सास्ती भएको स्थानीय बताउँछन् । दशकदेखि अलपत्र सब–स्टेसनको काम गत वर्ष पूरा भएको थियो ।

नेपाल विद्युत प्राधिकरणका प्राविधिक समेत लाइन कहाँ बिग्रिएको हो भन्नेमा अनभिज्ञ भएपछि मर्मतमा समस्या भएको छ । केन्द्रका अनुसार बिजुलीका पोल गाडेका र तार तानेको क्षेत्र वरिपरि रुख नकाटिँदा समस्या भएको हो ।

सरकारी कार्यालयमा कम्प्युटरबाट हुने काम रोकिएका छन् । ग्रामीण क्षेत्र (टाढा) बाट आएका सेवाग्राही काम नहुँदा त्यतिकै फर्कन बाध्य छन् । केही व्यवसायीले अनियमित लोडसेडिङको फाइदा उठाउँदै जेनेरेटरमार्फत मोबाइल चार्ज, फोटोकपी, फ्याक्सलगायत काममा दोब्बर बढी रकम असुलिरहेका छन् । वर्षाकै कारण ३ दिनदेखि सदरमुकाम खलंगा विद्युतविहीन भएको स्थानीय दुर्गाबहादुर थापाले बताए ।

‘पानी परेको दिन दिनभरि नै बिजुली जाने समस्या छ,’ उनले भने, ‘केही समययता राति पनि बत्ती नआउँदा अन्धकारमा बस्नुपर्ने बाध्यता छ ।’ उनका अनुसार एक महिनायता दैनिक कम्तिमा ५ घण्टासम्म अनियमित लोडसेडिङ हुने गरेको हो ।

सिद्धकुमाख गाउँपालिकास्थित चाँदेकरेन्जीका भद्रबहादुर पुन मालपोत र नापी कार्यालयको कामका लागि २ दिनदेखि सदरमुकाम खलंगामै छन् । ‘जेनेरेटरबाट एक प्रति फोटोकपी गरेको १० रुपैयाँसम्म तिर्नुपर्ने बाध्यता छ,’ उनले भने, ‘विद्युत् नहुँदा १/२ घण्टामा हुने कामका लागि दुई दिन सदरमुकाममै बस्नुपरेको छ ।’

खलंगा बजारमा फर्निचर उद्योग सञ्चालन गरिरहेका पर्वत सिंहले अनियमित विद्युतकै कारण आम्दानी पनि घटदै गएको बताए । उनले ३ दिनदेखि बत्ती नआउँदा दैनिक ५ हजार रुपैयाँ बढी घाटा लागिरहेको गुनासो गरे । प्राधिकरणको सल्यान वितरण केन्द्रमा पटक–पटक फोन गर्दा पनि फोन उठेन । केन्द्रमा फोन नउठ्नु पहिलेदेखिकै समस्या हो ।

प्रकाशित : असार ३०, २०७६ १०:४७
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

गमगढी बजार जोखिममा

कान्तिपुर संवाददाता

(मुगु) — छायानाथ–रारा नगरपालिका १ र २ स्थित पुरानो गमगढी बजारमा ढल निकासको उचित व्यवस्था नहुँदा बजारै जोखिममा परेको छ । ढल नहुँदा भल पस्न थालेपछि सडक आसपासका क्षेत्रका घरहरू पनि जोखिममा पर्न थालेका हुन् ।

महाकाली नमुना माविदेखि जिल्ला प्रशासन कार्यालयसम्मको क्षेत्रमा ढल निकास नभएपछि आसपासका घरमा भल पस्ने समस्या बढदै गएको हो । गत वर्ष बजार क्षेत्रको सडकको स्तरोन्नति गरिए पनि ढलको व्यवस्था नगरिँदा स्थानीयले सास्ती भोगिरहेका छन् । स्थानीयले घरको ढोका अगाडि जस्तापाता र प्लास्टिक लगाएर आकासे पानी छेक्ने गरेका छन् । भलकै कारण सडकको कालोपत्रे उप्किने जोखिम बढदै गएको स्थानीयको भनाइ छ ।

ढल नहुँदा घर माथिबाट बगेर आएको पानीले दुःख दिन थालेको स्थानीय व्यवसायी लक्ष्मी देवकोटाले बताए । उनका अनुसार घरभित्र ढल पस्न थालेपछि व्यवसाय गर्न समस्या भएको छ । ‘सडकमाथि र घरका ढोका तल भएपछि कम पानी परे पनि भल पसिहाल्ने समस्या छ,’ उनले भने, ‘दिउँसो भल पस्न नदिन विभिन्न जुक्ति लगाए पनि राति कोठाहरू जलमग्न हुन थालेपछि घरहरू भत्किने जोखिम बढेको छ ।’

वर्षा सुरु भएपछि स्थानीयलाई कसरी पानीको निकास गर्ने भन्ने पिरलो भएको छ । घरभित्र पानी पस्ने त्रासले स्थानीय बासिन्दा राति अबेरसम्म जाग्राम बस्न थालेका छन् ।

ढल नहुँदा चैन गाउँ जाने बाटोका आधा दर्जन घर बाढीको जोखिममा छन् । ढलको समस्याले आफ्नो घर खतरामा परेको स्थानीय केशवराज चौलागाईंले गुनासो गरे । उनका अनुसार नयाँ बजार क्षेत्रमा पनि भल पस्ने समस्या चुलिएको छ । गत वर्ष करिब १८ लाख रुपैयाँ बजेटमा निर्माण गरिएको ढल १ वर्ष नपुग्दै भत्किएपछि जोखिम खेप्नुपरिरहेको स्थानीयको गुनासो छ ।

जिल्ला ट्राफिक प्रहरी कार्यालयदेखि रेडक्रस भवनसम्मको क्षेत्रका बासिन्दा घरमा पसेको भल फाल्दा हैरान बनेका छन् । जथाभावी पानी बग्दा सडक हिलाम्मे बन्दै गएपछि आउजाउमा समस्या भएको छ । भल जथाभावी घरभित्र पस्न थालेपछि स्थानीयको सहयोगका लागि सशस्त्र प्रहरीले बजार क्षेत्रमा सुरक्षाकर्मी खटाइएको जनाएको छ ।

छायानाथ(रारा नगरपालिकाले ढल निर्माणमा बेवास्ता गरेपछि स्थानीयले सास्ती भोग्नुपरेको स्थानीय जयबहादुर मल्लले बताए । उनका अनुसार वर्षाले बजार क्षेत्र हिलाम्मे बनेपछि यातायातका साधन सञ्चालन हुन सकेका छैनन् । हिलाम्मे सडकले बटुवालाई सास्ती भएको उनको भनाइ छ । बजार क्षेत्रमा राखिएका डस्टबिनको फोहर वर्षाले जथाभावी बगाउन थालेपछि बजार क्षेत्र पनि दुर्गन्धित बन्दै गएको छ ।

प्रकाशित : असार ३०, २०७६ १०:४६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT