घरेलुको कार्यक्रममा झारा

कान्तिपुर संवाददाता

कालीकोट — उद्यमीको क्षमता विकास गरी सफल व्यवसायी बनाउने उद्देश्य बोकेको कार्यक्रम कार्यान्वयनमा झारा टार्ने काम भएको छ । जिल्ला घरेलु विकास कार्यालयमार्फत कार्यान्वयन भएको कार्यक्रमको बजेट आवको अन्त्यमा आउनु र प्रभावकारी अनुगमन नहुनुले दुरुपयोगको आशंकासमेत गरिएको छ ।

कर्णाली प्रदेश सरकारको उद्योग, पर्यटन, वन तथा वातावरण मन्त्रालयबाट गत आवमा युवा तथा दलित लक्षित कार्यक्रमको लागि करिब १ करोड रुपैयाँ आएको थियो । कार्यक्रम कार्यान्वयन गर्ने क्रममा कार्यालयका कर्मचारीले सम्झौताअनुसार सामान नल्याएको भन्दै २ उद्यमीबाट रकम लिनुका साथै ३ उद्यमीको चेक रोकेका थिए ।

खरिदार खेमराज उपाध्यायले चन्द्र फर्निचर उद्योगको अनिपाल कसेराबाट ७८ हजार र लुवारकोट कृषि औजार उद्योगका सञ्चालक मने कामीबाट ५० हजार रुपैयाँ लगेका उद्यमीको भनाइ छ । खरिदार उपाध्यायले रकम लिएको स्वीकार्दै उद्यमीले काम पूरा नगरेकाले रकम राखिएको बताए ।

कसले कति पाए ?
कार्यालयले १७ उद्योग छनोट गरेको थियो । कार्यालयले सबैभन्दा बढी रकम नरहरिनाथ गाउँपालिका ४ मा अवस्थित चन्द्रसूर्य गार्मेन्ट उद्योगका वीरेन्द्र बुढालाई १४ लाख ४० हजार रुपैयाँ दिएको थियो । दोस्रो बढी रकम खाँडाचक्र नगरपालिकास्थित एसबी नुडल्सका प्रेमवहादुर शाहीले ८ लाख ६४ हजार अनुदान लगेका छन् ।

खाँडाचक्रकै चन्द्र फर्निचरका अनिपाल कसेरा, रास्कोटस्थित विपीन ग्रिल उद्योगका मन तिरुवा र पचालझरना गाउँपालिका ५ मा रहेको रघुजन ढाका उद्योगका तपेन्द्रबहादुर शाहीले ७ लाख ६८ हजारका दरले अनुदान लगेका छन् ।

खाँडाचक्रस्थित कर्णाली एग्रोफुड प्रोडक्टका रत्नप्रसाद आचार्य, कर्णाली जडीबुटी प्रशोधन उद्योगका अजबहादुर गिरी र लुवारेकोट कृषि औजार उद्योगका मने कामी, नरहरिनाथ गाउँपालिका ४ स्थित बडिमालिका जडीबुटी चिया उद्योगका दीपेन्द्र विष्ट, सान्नीत्रिवेणी ६ स्थित निशान फर्निचर उद्योगका हेमराज सञ्ज्यालले ४ लाख ८० हजार र का दरले अनुदान पाएका छन् ।

त्यसैगरी, रास्कोटस्थित दिनेश फर्निचर उद्योगका मन्जिते तिरुवा र समिर ढाका उद्योगका हजा सुनार, नरहरिनाथस्थित सुन्दरटोल भैंसीपालन फर्मका केबले कामी (क) र वीरजल कृषि औजार आरन उद्योगका केबल कामी (ख), खाँडाचक्रस्थित पूजा एन्ड जीवन फर्निचर उद्योगका भगवती कामी र रुपादेवी कृषि औजार आरन उद्योगका धनवीर कामीलाई ३ लाख ८० हजारका दरले रकम दिइएको छ ।

गाउँपालिका अध्यक्षकै किर्ते हस्ताक्षर
यसैबीच, घरेलु कार्यालयले सञ्चालन गरेको मेड्पा कार्यक्रममा गाउँपालिका अध्यक्षकै किर्ते हस्ताक्षर गरी रकम लिएको पाइएको छ । सुर्खेतको देउती मध्यपश्चिम सीप विकास प्रालिले कार्यक्रम सञ्चालनको जिम्मा पाएको पलाता गाउँपालिकाको अभिमुखीकरण कार्यक्रममा गाउँपालिका अध्यक्ष लक्ष्मण बमको किर्ते हस्ताक्षर गरेको पाइएको हो ।

सहजकर्ता हिक्मत बुढाले अध्यक्ष बमलगायत पदाधिकारीको किर्ते हस्ताक्षर गरेर घरेलु कार्यालयमा पेस गरेका थिए । गाउँपालिकाले आपत्ति जनाउँदै पत्र लेखेपछि घरेलु कार्यालयले छानबिन गर्दा किर्ते काम भेटिएको कार्यालय प्रमुख आइती चौधरीले बताइन् ।

उनका अनुसार कालिकोटमा कार्यक्रम सञ्चालनको लागि देउती र इलाइट इन्फाइस्ट्रक्चर प्रालि गरी २ कम्पनी छनोट भएका थिए । देउतीले सान्नीत्रिवेणी, रास्कोट, पचालझरना र पलाता तथा इलाइटले नरहरिनाथ, खाँडाचक्र, शुभकालिका, महाबै र तिलागुफामा काम गर्ने जिम्मा पाएका थिए ।

प्रकाशित : श्रावण २७, २०७६ ०९:१३
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

बडिमालिकाको ७ दिने तीर्थयात्रा

संगीता तिमिल्सेना 

बाजुरा — बडिमालिका तीर्थयात्राका लागि देशैभरका विभिन्न ठाउँबाट पर्यटक तथा भक्तजन आउने क्रम सुरु भएको छ । बडिमालिकामा जनैपूर्णिमाको अघिल्लो दिन पूजा हुने गर्छ । समुद्री सतहबाट ४ हजार २ सय १६ मिटर उचाइमा रहेको बडिमालिका पुग्न ७ दिनको पैदल यात्रामा हजारौं भक्तजन निस्किन्छन् ।

यहाँ पूजा गरे मागेको वर प्राप्त हुने जनविश्वास छ । साथै यहाँको प्राकृतिक सुन्दर दृश्यावलोकनका लागिसमेत पर्यटक देशैभरिबाट आउने गर्छन् ।

सदरमुकाम मार्तडीदेखि आइतबार बडिमालिकाको तीर्थयात्रा सुरु भएको छ । मेला लाग्ने ३ दिनअघि मार्तडीबाट औपचारिक पूजा टोलीसहित तीर्थयात्री प्रस्थान गर्ने चलन छ । साउन शुक्लपक्षका दिन यहाँबाट यात्रा सुरु हुने गरेको छ । बडिमालिकामा साउन २९ मा मूलपूजा गर्न मेला लाग्छ ।

जिल्लाभित्र र बाहिरका तीर्थयात्री तथा पर्यटकहरू, यहाँस्थित सरकारी कार्यालय र स्थानीय पर्यटकसहित भक्तजन परम्पराअनुसार आइतबार बिहान प्रजिअ गंगाप्रसाद न्यौपानेको नृेतत्वमा बडिमालिका प्रस्थान गरेको छ । बडिमालिका पुग्न तोकिएका स्थानमा बसेर ३ दिन लगाउनुपर्ने परम्परा छ । औपचारिक पूजाका लागि अछाम, डोटी, जुम्ला र कालिकोटबाट पनि सरकारी टोलीसहितका तीर्थयात्री बडिमालिका प्रस्थान भइसकेका छन् । पूजाका लागि डोटीको टोली प्रस्थान गरेको दिन त्यहाँका सरकारी कार्यालयमा सार्वजनिक बिदा दिने चलन कायमै छ ।

अछामको वैद्यनाथबाट त्यस क्षेत्रमा फलेको धानको बाला बडिमालिकामा चढाउने परम्पराअनुसार एक टोली १० दिनअघि प्रस्थान गरिसकेको छ । करिब १४ हजार फिट उचाइका समथर हरिया फाँट र ती फाँटमा फुलेका दर्जनौं प्रजातिका फूलले बडिमालिका प्रकृतिको अनुपम उपहार अनुभव हुने बुढीनन्दा ५ का प्रेमलाल पाध्याय बताउँछन् ।

बडिमालिका दर्शनका लागि बाजुरा, बझाङ, अछाम, डोटी, डडेल्धुरा, बैतडी, हुम्लाबाट तीर्थालु पुग्छन् । काठमाडौं, भारतको गढवाललगायत ठाउँबाट पनि दर्शनार्थी आउने गरेको मेला समितिले जनाएको छ । जनैपूर्णिमाका दिने गरिने पुजाका लागि १५ दिन अघिदेखि नै तयारी गर्ने चलन रहेको छ ।

बर्सेनि बाजुराले बडिमालिका जाने तीर्थयात्रुका लागि सुरक्षा व्यावस्थापन गदै आएको छ । सुरक्षा प्रबन्ध मिलाउन प्रहरी नायब उपरीक्षक उद्धवसिंह भाटको नेतृत्वमा टोली त्यसतर्फ प्रस्थान गरिसकेको छ । मेलामा मदिरा निषेध गरिएको छ । मदिरा नियन्त्रण गर्न विशेष टोली परिचालित हुने भएको भाटले बताए । बीचबाटोमा बास बस्ने र दर्शन गर्न जाने दर्शनार्थीलाई समस्या परे जुनसुकै बेला पनि प्रहरीलाई खबर गर्न सकिने प्रहरीले जनाएको छ ।

आवश्यक शौचालय व्यवस्थापनको जिम्मेवारी बडिमालिका नगरपालिकाले लिएको नगर प्रमुख पदम बडुवालले बताए । हिड्ने बाटोदेखि बडिमालिका मन्दिरसम्म ३० अस्थायी शौचालय निर्माणका लागि ३ दिनअघि नै प्राविधिकसहित कामदाहरू पठाइसकेको नगरप्रमुख बडुवालले बताएका छन् ।

बाजुरा जिल्लाका विभिन्न धार्मिक तथा पर्यटकिय क्षेत्रमा दर्शन गर्न यतिबेला तीर्थयात्रीको संख्या बढेको छ । जिल्लाका बुढिनन्दा, बडिमालिका, नाटेश्वरी, जुकोटको स्वामिकार्तिक, बडालेखलगायत क्षेत्रमा साउन पुर्णिमाको दिन एकैदिन पूजा गर्ने चलन छ ।

प्रकाशित : श्रावण २७, २०७६ ०९:१२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT