अल्लोको व्यावसायिक उत्पादन

कान्तिपुर संवाददाता

बाजुरा — बाजुराको गौमुल गाउँपालिका १, अम्लिसकी भाना रोकाया ३ वर्षअघि खेतीपाती र पुर्खौली अल्लोको कपडा बुन्ने, नाम्लो, दाम्लो, बोरा बनाउन व्यस्त थिइन्  । उनले अहिले आफ्नो त्यही पुर्ख्यौली पेसा प्रवर्द्धन गरी बाजुरा सदरमुकाममा अल्लोबाट कपडा तयार गर्ने उद्योग सञ्चालन गरेकी छन्  ।

उनले सञ्चालन गरेको उद्योगमा अल्लो धागोको विभिन्न प्रकारका कपडा, झोला, टोपी जस्ता सामान उत्पादन हुने गरेको छ ।

स्थानीयले हेला गरेको कच्चा पदार्थ अल्लोबाट उनको उद्योगले मुलायम र बुट्टेदार कपडा उत्पादन गर्छ । उनले सञ्चालन गरेको लक्ष्मी अल्लो धागो उद्योगका उत्पादनको माग स्थानीय स्तरमा मात्र नभएर जिल्लाबाहिर पनि हुने गर्छ । ‘धेरैजसो उत्पादन जिल्लामै खपत हुने गरेको छ,’ भानाले भनिन्, ‘कहिले काँही जिल्ला कै माग पनि धान्न गाह्रो हुन्छ । जिल्लामा बिक्री नभएको मात्र बाहिर पठाउने हो ।’

उनले जिल्लामा रहेका विभिन्न बैंक तथा वित्तिय संस्थाबाट ५७ लाख ऋण निकालेर उद्योगको स्थापना गरेकी हुन् । जग्गा भाडामा लिएर सदरमुकाम मार्तडीमा खोलेको उनको उद्योगले भानाको आर्थिक अवस्था मात्र सुधार गरेको छैन, स्थानीय ९ महिलालाई रोजगारी र सीपसमेत प्रदान गरेको छ । उनले आफ्नै उद्योगमा सीप सिकाएर बाजुराकै महिलालाई रोजगारी दिएकी हुन् । उनले उद्योगको उत्पादन बिक्रीबाट कर्मचारीको तलब, छोराछोरीको पढाई खर्च, बैंकको ब्याज र घर खर्चसमेत कटाएर बार्षिक ३/४ लाख मुनाफा हुने गरेको बताइन् ।

उद्योगमा विभिन्न गाउँपालिका र संघसंस्थाहरूले पठाएका व्यक्तिलाई कपडा बुन्ने तालिमसमेत चलाउने गरेकी छिन् । उनको उद्योगबाट सिकेका धेरै महिलाहरूले घरमै अल्लोको धागो कातेर र कपडा बुनेर स्वरोजगार भइसकेको उनको भनाइ छ । उद्योगमा काम सिकेका महिलाले कातेको धागो केजीका दरले र बुनेको कपडा मिटरका दरमा उद्योगले नै किन्ने गरेको छ ।

प्रकाशित : वैशाख ११, २०७६ १३:४३
प्रतिक्रिया
पठाउनुहोस्

निःशुल्क आवास बन्ने

कान्तिपुर संवाददाता

बाजुरा — निःशुल्क आवास बन्ने भएपछि बाजुराको विभिन्न ठाउँका दलित परिवार दंग छन् । निर्वाचन क्षेत्र २ का दलित परिवारका लागि यो कार्यक्रम सञ्चालन हुने भएको छ । कार्यक्रमअन्तर्गत ८४ दलित परिवारलाई घर निर्माण गर्न आर्थिक सहयोग गरिने जिल्ला समन्वय समितिले जनाएको छ ।

आव ०७३/७४ बाट दलित बस्तीका लागि कार्यक्रम लागु भएको हो । कार्यक्रममा कार्यविधि २०७५ अनुसार जमिन नभएका दलित परिवारहरूका लागि ऊक्त कार्यत्रम लागू गरिएको सहरी तथा भवन निर्माण कार्यालय डोटीले जनाएको छ । सहरी विकास तथा भवन निर्माण कार्यालयमा आवेदन दिएका निर्वाचन क्षेत्र १ का ६० परिवार र निर्वाचन क्षेत्र २ का ४४ जनाले निवेदन दिएका थिए । निवेदन मूल्यांकन गरी हाललाई १ निर्वाचन क्षेत्रबाट ५० परिवार र २ बाट ३४ परिवारलाई छनोट गरिएको जिससका समन्वय अधिकारी हिक्मतबहादुर रावलले बताए ।

उनका अनुसार दुबै निर्वाचन क्षेत्रका निर्वाचित सांसद तथा सुदूरपश्चिम प्रदेशका आन्तरिक मामिला तथा कानुनमन्त्री प्रकाशबहादुर शाह र निर्वाचन क्षेत्र २ का सांसद बलदेव रेग्मीको रोहबरमा ८४ परिवार छनोट गरिएको छ । यस वर्ष घर निर्माणका लागि १ करोड ७ लाख ९५ हजार रकम विनियोजन गरिएको छ । कार्यक्रममा निवेदन परेका तर यो पटक छनोटमा नपरेका २० परिवार प्रतीक्षा सूचिमा राखिने सहरी विकास तथा भवन निर्माण विभागका निमित्त कार्यालय प्रमुख राजलाल साहले बताए ।

कार्यक्रम निर्वाचन क्षेत्र २ को त्रिवेणी नगरपालिका साविकको छतारा गाविस, बुढीगंगा नगरपालिकाको साविक बाह्रविस गाविस र खप्तड छेडेदह गाउँपालिकाको साविक डोगडी गाविसका गरी ३४ दलित परिवार छनोट गरिएको सांसद शाहले बताए । निर्वाचन क्षेत्र १ को हिमाली गाउँपालिका साविकको रुगिन र बाँधु र जगन्नाथ गाउँपालिका साविकको गोत्री गाविस गरी ५० परिवार छनोटमा परेका छन् । प्रदेशका ५ जिल्लामा यो कार्यक्रम सञ्चालन हुँदै आएको छ ।

प्रकाशित : वैशाख ११, २०७६ १३:४२
पूरा पढ्नुहोस्
प्रतिक्रिया
पठाउनुहोस्