सवारी दुर्घटनामा किटानी जाहेरी

कान्तिपुर संवाददाता

कञ्चनपुर — दुई साताअघि मोटरसाइकलको ठक्करबाट एक वृद्धको मृत्यु भएको घटनामा नेकपाका स्थानीय नेताको नाममा किटानी जाहेरी परेको छ  । पीडित परिवारले नेकपाका नेता गोपाल रसाइलीका नाममा किटानी जाहेरी दिएका हुन्  ।

वैशाख २७ गते मृतकका भाइ गोविन्दसिंह कुंँवरले रसाइलीले चलाएको मोटरसाइकलले ठक्कर दिई दाइ तारासिँंह कुवरको मृत्यु भएको भन्दै जिल्ला प्रहरी कार्यालयमा किटानी जाहेरी दिएका हुन् । वैशाख १५ गते पूर्व–पश्चिम राजमार्ग अन्तर्गत भीमदत्त नगरपालिका भासी क्षेत्रमा महेन्द्रनगरबाट घर तर्फ गइरहेका ६५ वर्षीय कुंँवर मोटरसाइकलको ठक्करबाट घाइते भएका थिए ।


उनको उपचारकै क्रममा दोस्रो दिन भारतको बरेलीस्थित राममूर्ति मेडिकल ट्रष्टमा मृत्यु भएको थियो । ‘हामीले किटानी जाहेरी दिएर पनि प्रहरीले आरोपितलाई नियन्त्रणमा लिएको छैन,’ मृतक तारासिंहका भाइ शेरसिंहले भने, ‘प्रत्यक्षदर्शीका अनुसार रसाइलीले चलाएकै मोटरसाइकलले दाजुलाई ठक्कर दिएको हो ।’

उनका अनुसार घटना भएपछि रसाइलीले नै घाइतेलाई महाकाली अञ्चल अस्पतालसम्म पुर्‍याएका थिए । जिल्ला प्रहरी कार्यालय कञ्चनपुरले भने रसाइलीका नाममा किटानी जाहेरी परेको र उनको खोजी भइरहेको जनाएको छ ।

प्रकाशित : जेष्ठ १, २०७६ ११:२५
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

छाउगोठ : कतै हटे, कतै यथावत

कान्तिपुर संवाददाता

बाजुरा — ग्रामीण क्षेत्रका महिलाहरू अहिले पनि महिनावारी (छाउ) भएको बेला छाउगोठमै बस्ने गरेका छन्  । कतिपय गाउँमा भने छाउपडी गोठ भत्काएर वडालाई छाउगोठमुक्त घोषणा गरिएका छन्  ।

बडिमालिका नगरपालिकाले यही बैशाखमा रजालीलाई पहिलो छाउगोठमुक्त वडा घोषणा गर्‍यो । त्यहाँका महिलाहरू अहिले महिनावारी भएको बेला घरकै छुट्टै कोठामा बस्ने गरेका छन् । पहिलाको जस्तो दुध, दही, मही पनि खान नपाइने अवस्था छैन ।


नगरकै अर्को वडा नम्बर ९ लाई पनि छाउगोठमुक्त गर्ने अन्तिम तयारीे छ । अहिले वडाभरि छाउगोठ छैनन् ।अरु सबै वडालाई यसै वर्षभित्र छाउगोठमूक्त गर्ने योजना रहेको नगर उपप्रमुख कविता विष्टले बताउछिन् । उनले भनिन् ‘वडा नम्बर २, ७ र ८ का कतिपय गाँउमा महिलाहरू अहिलेपनि देउता रिसाउने डरले घरभन्दा टाढा रहेको गोठमा बस्ने छाडेका छैनन् ।’


खप्तड छेडेदह गाउँपालिकामा अझै छाउगोठ हटेका छैनन् । ‘कतिपय छाउगोठमा बस्न छाडेपनि महिनावारी भएको बेला दुध, दही र मही महिलाले बार्ने गरेका छन्’ गाँउपालिकाका उपाअध्यक्ष कुन्ती बुढाले भनिन् ‘विभिन्न जनचेतनामुलक कार्यक्रम सञ्चालन गरेपछि केही सुधार आएको छ । किशोरीहरूलाई सेनेटरी प्याड प्रयोग गर्न थालेका छन् ।’


बुढीगंगा नगरपालिको ब्रम्ह्रतोला र कुल्देवमाण्डौँ गाविस यसअघि नै छाउगोठमुक्त घोषणा भएका हुन् । यी गाविसमा छाउगोठ छैनन् । यहाँका महिलाहरू महिनावारी भएका बेला दुध, दही र मही बार्दैनन् । धेरैले खानेपानीको सार्वजनिक धारा भने बेग्लै प्रयोग गर्ने गरेका छन् । नगरपालिकाको बाह्रबिसमा केही गाउँका महिलाहरू भने अहिलेपनि छाउगोठमै बस्दै आएका छन् ।


त्रिवेणी नगरपालिकाका सबै गाउँमा छाउगोठ छन् । नगर र वडाले सञ्चालन गर्ने विभिन्न कार्यक्रममा स्थानीय महिलाहरू दौडधुप गरिरहेका भएपनि अगुवा महिलाहरूलेसमेत छाउ बार्न छाडेका छैनन् । नगरपालिकाकी उपप्रुख राधिका सुनार भन्छिन् ‘ महिला हिंसा न्युनिकरणका कार्यक्रम सञ्चालन हुदै आएका भएपनि छाउपडी परम्परा हट्न सकेन ।’

बुढीनन्दा नगरपालिकाको वडा नम्बर ९ मा गत पुसमा छाउपडी गोठमै निस्सासिएर आमासहित २ छोराको मृत्यु भएपछि नगरपालिकाले छाउगोठ भत्काउने अभियान सञ्चालन गरेको थियो । तर पुरा नहुदै बीचैमा तुहियो ।

नगरपालिकाको वडा नम्बर ५ विरसैन र काप्कोट टोल र वडा नम्बर ६ छाउपडी गोठमुक्त घोषणा गरेपनि त्यहाँका महिलाहरू अझै छाउगोठमै बस्ने गरेका छन् । कोल्टी बजार क्षेत्रका केही महिलाहरू सुरक्षित कोठामा बस्ने गरेका भएपनि आसपासका अधिकांश महिलाहरू छाउगोठमै बस्छन् ।


हिमाली गाउँपालिकामा पनि अधिकाश महिलाहरू छाउगोठमै बस्ने गरेका छन् । हिमाली जिल्लाकै सबैभन्दा विकट वस्ती रहेको दुर्गम पालिका हो । यहाँका अधिकांश महिलाहरू छाउगोठमै बस्ने गरेको गाउँपालिकाकी उपाअध्यक्ष चन्द्रकला बुढाले बताइन् ।


विकटकै अर्को पालिका स्वार्मिकार्तिक गाँउपालिका र जगन्नाथ गाँउपालिकामा छाउगोठ छन् । यस पालिकामा घरपिच्छे छाउगोठ छन् । केही पढेलेखेका महिलाहरू सुरक्षित कोठामा बस्ने गरेपनि अन्य सबै महिलाहरू छाउगोठमै बस्ने गरेका स्थानीय बासिन्दाहरू बताउँछन् ।

प्रकाशित : जेष्ठ १, २०७६ ११:२५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT