अबुधाबी — कीर्तिमानी चारपल्टको च्याम्पियन जापानलाई ३–१ ले स्तब्ध पार्दै शुक्रबार कतारले ऐतिहासिक रूपमा पहिलोपल्ट एसियन कप फुटबलको उपाधि उचालेको छ ।
कतारका स्ट्राइकर अल्मोज अलीको नाममा एसियन कपको एकै संस्करणमा सर्वाधिक गोलको कीर्तिमान पनि बनेको छ । उनले प्रतियोगितामा ९ गोल गरे ।
सुडानमा जन्मिएका स्ट्राइकर अलीले १२ औं मिनेटमा एक्रोब्याटिक किकमार्फत कतारलाई अग्रता दिलाए । अब्देलाजिज हतिमको उत्कृष्ट दोस्रो गोल र भिडियो असिस्टेन्ट रेफ्री (भार) मार्फत पाएको पेनाल्टीमा अक्रम अफिफले गोल गरी कतारलाई ऐतिहासिक ट्रफी दिलाए । कतारले तीन वर्षपछि सन् २०२२ को विश्वकप आयोजना गर्नेछ ।
यूएईले योग्यतामाथि उजुरी गरेपछि अल्मोजको फाइनल खेल अनिश्चित बनेको थियो । तर खेलको केही घण्टाअघि मात्रै खेल्ने अनुमति दिइएको थियो । यूएईविरुद्धको सेमिफाइनलमा कतारले ४ गोल गर्दा अल्मोजले १ गोल गरेका थिए ।
कतारले फाइनलसम्म पुग्दा पूर्व च्याम्पियनहरू दक्षिण कोरियालाई क्वाटरफाइनल, इरानलाई अन्तिम १६ र साउदी अरेबियालाई समूह चरणमा हराएका थिए । यसअघि जापान एसियन कप फाइनल पुगेर पराजित हुनुपरेको थिएन ।
जापान २०११ मा पछिल्लोपल्ट च्याम्पियन भएको थियो । इरान र साउदीले ३–३ तथा दक्षिण कोरियाले २ पटक एसियन कप जितेका छन् ।
प्रकाशित : माघ १९, २०७५ ०८:४५