नेपाल–पाकिस्तान दृष्टिविहीन क्रिकेट शृंखला : नेपालको अग्रता

कान्तिपुर संवाददाता

काठमाडौँ — अन्तर्राष्ट्रिय दृष्टिविहीन महिला क्रिकेटमा मन केसीले कीर्तिमानी अर्धशतक बनाएपछि पाकिस्तानविरुद्धको ट्वान्टी–२० शृंखलाअन्तर्गत तेस्रो खेलमा पनि नेपालले १० विकेटको सानदार जित पाएको छ ।

जितसँगै नेपालले ५ खेल शृंखलामा २–० को अग्रता लियो । लाहोरमा भएको पहिलो खेल पनि नेपालले १० विकेटले जितेको थियो । फैसलाबादमा हुने तय भएको दोस्रो खेल भने वर्षाका कारण रद्द गरिएको थियो ।

फैसलाबादमै शुक्रबार हुने भनिएको तेस्रो खेल भारी वर्षाका कारण मैदानमा पानी जमेकाले इस्लामाबादमा शनिबार भएको हो । इस्लामाबादको सीमाक्षेत्र रावलपिन्डीमा भएको तेस्रो खेलमा १ सय ३ रनको लक्ष्य नेपालले ७.३ ओभरमै पूरा गर्‍यो । ओपनर मन केसीले आक्रामक ब्याटिङ गर्दै २१ बल खेलेर नटआउट ५८ रन बनाइन् ।

बी–२ क्याटगोरी खेलाडी उनले १० चौका प्रहार गरिन् । अर्की ओपनर विनिता पुनले २४ बल खेल्दै ५ चौकामा अविजित ३४ रन बनाइन् । प्लेयर अफ द म्याच मनले अन्तर्राष्ट्रिय ट्वान्टी–२० मा पहिलो अर्धशक प्रहार गर्न पाउँदा खुसी लागेको बताइन् । आगामी खेलमा अझै राम्रो प्रदर्शन गर्ने सुनाइन् ।

मन र विनिताबीचको १ सय ३ रनको साझेदारी पनि महिला दृष्टिविहीन क्रिकेटमा कीर्तिमानी साझेदारी हो । पाकिस्तानले पहिलो खेलको तुलनामा तेस्रो खेलमा सुधारिएको प्रदर्शन गरे पनि नेपाली खेलाडी ब्याटिङमा हाबी भयो ।

पहिलो खेलमा ५३ रनमै अलआउट भएको पाकिस्तानले दोस्रो खेलमा भने पूरै ओभर ब्याटिङ गरी १ सय २ रन बनाएको थियो । पाकिस्तानका लागि ओपनर तयावा फतिमाले २७ र सादियाले १७ रन जोडे । बाँकी खेलाडीले दोहोरो अंकमा रन बनाउन सकेनन् । पाकिस्तानले ३५ रन अतिरिक्त पायो ।

मैदान ओसिलो भएकाले पहिलो इनिङ्समा नेपाली खेलाडीलाई फिल्डिङमा केही गाह्रो भएको थियो । अन्तिमतिर भने नेपालले चुस्त फिल्डिङ गर्दै पाकिस्तानको रन गति रोकेको हो । बलिङमा नेपालबाट कप्तान भगवती भट्टराई र मुना अर्याले १–१ विकेट लिए । भगवतीले ३ पाकिस्तानीलाई रनआउट गरिन् । सरिता घिमिरेले सिधा थ्रोमार्फत एक रनआउट गरिन् ।

लगातार दुई खेल जितेपछि नेपालकी कप्तान भगवतीले भनिन्, ‘पाकिस्तानले आज पहिलो खेलभन्दा राम्रो गर्‍यो । हामीले हाम्रो लय कायमै राख्न सक्यौं, बाँकी खेलमा पनि यही लयलाई निरन्तरता दिनेछौं ।’

पाकिस्तानकी कप्तान रबिअ शेहजादीले लगातार दुई खेल हारे पनि आफूहरूले धेरै सिकेको बताइन् । ‘हामीले पहिलो खेलभन्दा आज धेरै राम्रो खेल्यौं । हरेक खेलमा केही न केही सिक्न पाएका छौं ।’

पाकिस्तान ब्लाइन्ड क्रिकेट काउन्सिलको आयोजनामा भइरहेको ५ खेलको शृंखलाअन्तर्गत चौथो आइतबार र पाँचौं खेल सोमबार हुनेछ । दुवै खेल इस्लामाबादस्थित शालिमार क्रिकेट रंगशालामा हुनेछ ।

प्रकाशित : माघ २०, २०७५ ०९:११
ADVERTISEMENT
प्रतिक्रिया
पठाउनुहोस्

डीपीएल खेलतालिका : सुरुमै धनगढीविरुद्ध विराटनगर

कान्तिपुर संवाददाता

काठमाडौँ — धनगढी स्टार्स र विराटनगर किंग्सले रुस्लान धनगढी प्रिमियर लिग (डीपीएल) को तेस्रो संस्करणको पहिलो खेल खेल्ने भएका छन् ।

डीपीएल आयोजक धनगढी क्रिकेट एकेडेमी (डीसीए) ले माघ २६ देखि धनगढीस्थित फाप्ला मैदानमा हुने प्रतियोगिताको खेलतालिका शनिबार सार्वजनिक गरेको छ ।

यसअघि टिम चौराह धनगढीको नामबाट खेल्दा दुवैपल्ट घरेलु टोलीले उपाधि जितेको थियो । त्यसक्रममा पहिलो संस्करण फाइनलमा धनगढीले विराटनगरलाई नै हराएको थियो । कृष्ण बोहराको समूहले यसको स्वामित्व लिएपछि टोलीको नाम पनि परिवर्तन गर्दै धनगढी स्टार्स राखिएको छ । धनगढी सोमपाल कामीको नेतृत्वमा खेल्दै छ । विराटनगरको रणनीतिक खेलाडीमा करण केसी छन् ।

दोस्रो दिन माघ २७ मा महेन्द्रनगर युनाइटेड र गत वर्षको उपविजेता काठमाडौं गोल्डेन्सबीच खेल हुनेछ । सोही दिन अर्को खेलमा विराटनगरले सीवाईसी अत्तरियाको सामना गर्नेछ । रूपन्देही च्यालेन्जर्सले तेस्रो दिन आफ्नो पहिलो खेल खेल्दा महेन्द्रनगरको सामना गर्नेछ भने काठमाडौं र धनगढीबीच अर्को खेल हुनेछ ।

अन्तिम तीन खेलमा फागुन ४ मा अत्तरियाले महेन्द्रनगर, धनगढीले रूपन्देही र अत्तरियाले काठमाडौंसँग खेल्ने छन् । ६ फ्रेन्चाइज टोलीले राउन्ड रोबिनमा प्रतिस्पर्धा गरेपछि शीर्ष चार टोलीले प्लेअफ खेल्ने छन् । त्यसका शीर्ष दुई टोलीले क्वालिफायर १ मा प्रतिस्पर्धा गर्नेछन् र विजेता फाइनल पुग्नेछ । तेस्रो र चौथो हुने टोलीले इलिमिनेटरमा प्रतिस्पर्धा गर्नेछन र विजेता टोलीले क्वालिफायर १ को पराजित टोलीसँग फाइनलमा पुग्न खेल्नेछ ।

प्रकाशित : माघ २०, २०७५ ०९:१०
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT