बुढासुब्बा गोल्डकप : आयोजक धरान सेमिफाइनलमा

प्रदीप मेन्याङ्बो

सुनसरी — बुढासुब्बा गोल्डकप फुटबल प्रतियोगिताको मंगलबार धरान रंगशालामा आयोजक धरान फुटबल क्लबले कोलकाताको डेल हाउस एथलेटिक्स क्लबलाई २–० गोलले पराजित गर्दै सुरुमै घर पठाएको छ । 

बुढासुब्बा गोल्डकपमा मंगलबार आयोजक धरान फुटबल क्लब (सेतो) र डेलहाउस एथलेटिक्स कोलकाताका खेलाडी बलका लागि दौडँदै । तस्वीर : प्रदीप/कान्तिपुर

Citizen

पाहुना टोलीविरुद्ध धरानका खेलाडीले घरेलु मैदानमा उत्कृष्ट प्रदर्शन गर्दै सेमिफाइनल यात्रा तय गरेका हुन् । धरानले फागुन २ मा संकटा क्लबसँग प्रतिस्पर्धा गर्नेछ ।
धरानको जितमा मिलन राईले नवौं मिनेट र म्यान अफ द म्याच वर्तमान राईले २३ औं मिनेटमा गोल गरेका थिए । मैदानको मध्यभागमा विपक्षी खेलाडीबाट बल खोसेर एक्लै अगाडि बढाएका मिलनले गरेको कडा प्रहार सिधै गोलमा परिणत भयो । पेनाल्टी बक्सभित्र विपक्षी गोलरक्षक एस सिंह बिट भएर अगाडि बढेको मौकामा वर्तमानले ‘चिप’ शट प्रहार गर्दै दोस्रो गोल गरेका थिए ।

आयोजकले प्लेइङ सेट स्थानीय खेलाडीलाई मात्र समावेश गरेको थियो । स्थानीय खेलाडी भए पनि उत्कृष्ट प्रदर्शन गर्दै खेल आफ्नो पक्षमा पारेको थियो । यसअघिका सबै प्रतियोगितामा धरान फुटबल क्लवले धरान बाहिरका स्थापित खेलाडीलाई समावेश गरेर खेलाउँदै आएको थियो ।

आयोजक धरानको थप गोल गर्ने थुप्रै प्रयास खेर गएको थियो । खेलको ५० औं मिनेटमा वर्तमानको क्रस पासमा मिलनको प्रहार गोलरक्षक सिंहले बचाएका थिए । ६५ औं मिनेटमा सुजन लिम्बुले दिएको ब्याक पासलाई फेरि मिलनले प्रहार गरे पनि बाहिरियो । त्यसलगत्तै विपक्षीले वर्तमानलाई लडाएपछि मिलनले प्राप्त फ्रिकिक प्रहार गर्दा गोलरक्षक सिंहले मुस्किलले बचाए । खेलको इन्ज्युरी समयमा हेमन्तको पासमा मिलनको प्रहार गोलरक्षक सिंहले खुट्टाले जोगाए ।

पश्चिम बंगाल कोलकाताको सुपर लिगमा दुईपल्ट उपाधि विजेता रहिसकेको डेलहाउस एथलेटिक्स क्लब गोल फर्काउन प्रयासरत रहे पनि असफल भयो । पहिलो गोल खाएपछि ‘नर्भस’ जस्तै देखिएका डेलहाउसका खेलाडीले दोस्रो हाफमा आक्रामक खेले पनि फिनिसिङ राम्रो हुन सकेन ।

खेलको १६ औं मिनेटमा जी मण्डलको पासमा आर शर्माले हेड गर्नु अघि नै गोलरक्षक विनय श्रेष्ठले बचाएका थिए । लगत्तै डी एलेनाको प्रहार पनि विनयले जोगाए । ४४ औं मिनेटमा ए रोयको सशक्त प्रहारले पोस्टको दिशा लिन सकेन । ७३ औं मिनेटमा डी विश्वासले बक्सभित्रबाट गरेको प्रहारलाई डिफेन्डरले जोगाए ।

आयोजक धरानका प्रशिक्षक सागर घिमिरेले चार वर्षयताकै उत्कृष्ट खेल प्रदर्शन गरेको बताए । उनले भने, ‘सबै खेलाडी धरानकै भएकाले आफ्नो क्लबका लागि राम्रो प्रदर्शन गरे । गोल गर्ने अवसर अरु पनि थिए तर थप स्कोर गर्नमा भने चुक्यौं ।’

डेलहाउसका प्रशिक्षक सुप्रियदास गुप्ताले नयाँ खेलाडी भएकाले टिम सेट नहुँदा हार बेहोर्नुपरेको बताए । उनले भने, ‘कोलकातामा प्रिमियर लिग र सुपर लिग खेले पनि दुई वर्षयता अहिले अधिकांस नयाँ खेलाडी छन् । भर्खरदेखि उनीहरू ठूला प्रतियोगिताको अभ्यासमा रहेका छन् । त्यसैले गोल खाएपछि खेलमा फर्कन गाह्रो भयो ।’बुधबार क्वाटरफाइनलमा एपीएफ क्लब र डफिन्स क्यामरुनबीच प्रतिस्पर्धा हुनेछ ।

प्रकाशित : माघ २९, २०७५ २०:४३
प्रतिक्रिया
पठाउनुहोस्

समायोजन अलपत्र छाडेर मन्त्री पण्डित घुमफिरमा व्यस्त

अब्दुल्लाह मियाँ

काठमाडौँ — निजामती कर्मचारी समायोजन प्रक्रिया अलपत्र छाडेर संघीय मामिला तथा सामान्य प्रशासनमन्त्री लालबाबु पण्डित यूएई घुमफिरमा व्यस्त छन् । फागुन ३ सम्म संघ, प्रदेश र स्थानीय तहमा सबै कर्मचारी समायोजन गरिसक्ने उद्घोष गरेका उनी मन्त्रालयको समायोजन महाशाखाका प्रमुख सहसचिव केदारप्रसाद पनेरुलाई समेत सँगै लिएर गएका छन् । 

फाइल तस्बिर

मंगलबारसम्म ५६ जना सचिव, ६६२ सहसचिव र ८४८ जना उपसचिवको मात्र समायोजन भएको छ । संघ, प्रदेश र स्थानीय तहमा समायोजनका लागि निजामती र अन्य सेवाका गरी ७७ हजार ३४ जनाले फाराम भरेका छन् । मन्त्रालयले संघमा ४७ हजार ९ सय २०, ७ वटा प्रदेशमा २२ हजार ७ सय ५५ र स्थानीय तहमा ६७ हजार ५ सय ३ कर्मचारीको दरबन्दी स्वीकृत गरेको छ । फागुन ३ भित्र समायोजन सक्ने सरकारको योजना थियो ।

सबै समूहका करिब ६ हजार अधिकृतको समायोजन प्रक्रिया अघि बढे पनि मन्त्री र महाशाखा प्रमुख नहुँदा उनीहरूको पदस्थापन र सरुवाको कामसमेत अवरुद्ध भएको मन्त्रालयका प्रवक्ता सहसचिव सुरेश अधिकारीले बताए । ‘समायोजन जुन हिसाबले अघि बढ्नुपर्ने हो, त्यो हुन सकेको छैन,’ उनले कान्तिपुरसित भने, ‘फागुन २ मा अहिलेसम्मको प्रगतिबारे मन्त्रालयले पत्रकार सम्मेलन गरी जानकारी गराउनेछ ।’

मन्त्री पण्डित पत्नी विमला महत, सहसचिव पनेरु, स्वकीय सचिव मनोज राई, आफ्नो निर्वाचन क्षेत्रका नेता अजम्बर राई र छोरी अर्चना पण्डितलाई लिएर झन्डै एक सातादेखि दुबई र आबुधाबीमा विभिन्न कार्यक्रममा व्यस्त छन् । मन्त्री पण्डित बुधबार राति फर्कनेछन् ।

यूएई सरकारको निमन्त्रणामा ‘विश्व सरकार शिखर सम्मेलन’ मा भाग लिन भन्दै मन्त्री पण्डित दुबई गए पनि पनेरुलगायत अरू कसैको त्यहाँ कुनै जिम्मेवारी छैन । उनीहरू घुम्ने उद्देश्यले मात्र गएका हुन् ।

प्रवक्ता अधिकारीले महाशाखा प्रमुख पनेरु मन्त्रीलाई सहयोग गर्न सँगै गएको दाबी गरे । मन्त्रिपरिषदको निर्णयअनुसार मन्त्री पण्डित, सहसचिव पनेरु र स्वकीय सचिव राईको खर्च सरकारले बेहोर्नेछ । अरूको खर्चबारे मन्त्रालयलाई कुनै जानकारी छैन । उक्त सम्मेलन आइतबारदेखि मंगलबारसम्म (१०–१२ फेब्रुअरी) भए पनि पण्डित शुक्रबारै ५ जनालाई लिएर गएका थिए । सम्मेलनबाहेक उनले राजनीतिक दलका भ्रातृ संगठन, संघसंस्था र नेपाली समुदाय/श्रमिकलाई आबुधाबीस्थित नेपाली दूतावासमा सम्बोधन गरेका थिए ।

केही दिनअघि मन्त्री पण्डितले मन्त्रालयका उच्च अधिकारीलाई बोलाएर जसरी पनि फागुन ३ भित्र कर्मचारी समायोजन सक्न निर्देशन दिएका थिए । सोही दिन सरकार गठनको एक वर्ष पूरा हुने र उपलब्धिस्वरूप समायोजन पूरा गर्ने भन्दै त्यसैमा केन्द्रित कर्मचारीलाई मन्त्रीको निर्देशन थियो । मन्त्रालयका एक अधिकारीले मन्त्री र महाशाखाकै प्रमुख नहुँदा समायोजन प्रक्रिया अवरुद्ध भएको बताए ।

मन्त्री बनेको केही महिना विदेश भ्रमण आफ्नो प्राथमिकता नभएको दाबी गरे पनि पछिल्ला दिन पण्डित निरन्तरजसो विदेश शयरमा छन् । केही महिनाअघि उनले चीन र भारतको भ्रमण गरेका थिए । मन्त्रालय उच्च स्रोतका अनुसार त्यस्ता भ्रमणमा उनले आफूसँग गएका पत्नीलगायतका लागि पनि मन्त्रालयबाट भ्रमण भत्ता र खर्च लिने गरेका छन् । स्वदेश भ्रमणमा भत्ता र पेट्रोल खर्चबापत प्रधानमन्त्री कार्यालयबाट बढी रकम बुझ्नेमा पण्डित एक नम्बरमा पर्छन् ।

मन्त्रालयमा पनि नतिजामुखी काममा प्राथमिकता दिएको बताउँदै उनले मन्त्री बनेका केही महिना स्थानीय तहका प्रमुख–उपप्रमुख (मेयर/उपमेयर) लाई पनि विदेश भ्रमणलाई प्राथमिकता नदिन निर्देशन दिएका थिए । विदेश जान खोज्ने केही नगर प्रमुख (मेयर) हरूको भ्रमणसमेत रोकिदिएका थिए ।

प्रकाशित : माघ २९, २०७५ २०:२२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT