पाँचौं साफ वुमेन्स च्याम्पियनसिप : भारतको आधा दर्जन गोल

भारत ६–० माल्दिभ्स
विनोद भण्डारीे

विराटनगर — डिफेन्डिङ च्याम्पियन भारतले सन्जु यादवको दुई गोल सहयोगमा पाँचौं साफ वुमेन्स च्याम्पियनसिप फुटबलमा बुधबार माल्दिभ्सलाई सहजै ६–० ले पन्छाउँदै उपाधि रक्षाको अभियान सुरु गरेको छ ।

भारतकी मिडफिल्डर इन्दुमथिलाई रोक्न प्रयासमा माल्दिभ्सकी खेलाडी (रातो) । माल्दिभ्सलाई समर्थकको साथ (तल) । तस्बिर ः वेदराज पौडेल/कान्तिपुर

एकतर्फी खेलमा भारतले पहिलो हाफमै ५ गोल गरेको थियो । उसले आठौं मिनेटमा ग्रेसी डाङ्मीको गोलमा अग्रता लिएको थियो । उनले माल्दिभ्सकी गोलकिपर अमिनाथ लिजा अगाडि बढेको मौका सदुपयोग गर्दै बललाई पोस्टको दिशा दिएकी थिइन् ।

लगातार चारै संस्करणको उपाधि जितेको भारतले १२ औं मिनेटमा फरवार्ड सन्ध्या रंगनाथनको गोलमा अग्रता दोब्बर बनाउँदा मिडफिल्डर सञ्जुको पास उपयोग गरेकी थिइन् । १७ औं मिनेटमा वान भर्सेस वानमा गोल गर्न चुकेकी इन्दुमथि काथिरेशनले २२ औं मिनेटमा बल मध्यभागबाट एक्लै विपक्षी पोस्टमा पुर्‍याएर गरेको प्रहार पोस्टभन्दा केही अगाडि रहेकी गोलकिपर लिजाले पन्च गरे पनि बलले उनीमाथिबाट जाली चुम्न पुगेको थियो । र, भारत ३–० ले अघि बढ्यो ।

पूरा अवधिभर विपक्षी पोस्टमा एकपल्ट पनि आक्रमण बुन्न नसकेको माल्दिभ्सविरुद्ध भारतकी सन्जु यादवले २७ औं मिनेटमा गोल गर्दै टिमलाई ४–० को अवस्थामा पुर्‍याइन् । पहिलो हाफको अतिरिक्त समयको तेस्रो मिनेटमा रतनवाला देवीले फ्रिकिकमार्फत उत्कृष्ट गोल गर्दै टिमलाई ५–० को अग्रता दिलाइन् । माल्दिभ्सकी एकैसाथ प्रिस्हाले रतनवालामाथि बक्सबाहिर फाउल खेल्दा रेफ्री अस्मिता मानन्धरले दिएको फ्रिकिक प्रहार उनले सदुपयोग गरेकी थिइन् ।

दोस्रो हाफको पूरै अवधि रक्षात्मक खेल खेल्दै माल्दिभ्सले भारतको गोलवर्षा रोक्ने प्रयास गरेपनि ९० औ मिनेटमा सन्जुले व्यक्तिगत दोस्रो र टिमका लागि छैटौं गोल गरिन् । उनले ३५ यार्डवाट गरेको प्रहार दर्शनीय गोलमा परिणत भएको थियो ।

दोस्रो हाफमा माल्दिभ्सले रक्षात्मक खेल्दा र गोलकिपरले उत्कृष्ट बचाउ गर्दा भारतको थप गोल गर्ने मुभ विफल भएका थिए । ४८ मिनेटमा ग्रेसी, ७५ मिनेटमा मनीषा र ८२ औं मिनेटमा डालिममाको प्रहार गोलकिपर लिजाले उत्कृष्ट बचाउ गरेकी थिइन् ।

‘खेल राम्रो भयो । जितेपछि राम्र्रो हुन्छ,’ भारतीय टिमकी प्रशिक्षक मायमोल रक्कीले भनिन्, ‘खेलाडीले बलमाथि नियन्त्रण कायमै राखे । दोस्रो हाफमा पर्याप्त अवसर सिर्जना गरेर पनि धेरै गोल गर्न सकेनौं । ठूला खेलमा अझै राम्रो गर्ने सोचेकी छु ।’ भारत साफ च्याम्पियनसिपमा भारत अपराजित छ ।

माल्दिभ्सका प्रशिक्षक मोहम्मद असिफले भने, ‘खेलाडीलाई सम्मान गर्छु । किनभने पछिल्लो खेलमा मुख्य तीन डिफेन्स घाइते भएका थिए । त्यसैले टिम परिवर्तन गर्नुपरेको थियो । भारत बलियो टिम हो । हामीले दोस्रो हाफमा हामीले राम्रो गरेका थियौं र त्यसमा खुसी छौं ।’

प्रकाशित : फाल्गुन ३०, २०७५ ०९:२७
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

किशोरी आमा बढे

विप्लव महर्जन

सल्यान — साताअघि त्रिवेणी गाउँपालिका २, की १९ वर्षीया इन्द्रा विक गाउँको स्वास्थ्य चौकीमा सुत्केरी हुन नसकेपछि आफन्तले हतारहतार जिल्ला अस्पताल ल्याए । उनलाई लामो समयदेखि प्रसूति व्यथा लागेको थियो । अस्पतालका चिकित्सकले शल्यक्रियामार्फत प्रसूतिको तयारी गरिरहेको बेला उनले बच्चा जन्माइन् । 

सल्यान अस्पतालमा सुत्केरी भएकी एक किशोरी ।तस्बिर : विप्लव/कान्तिपुर 

तीन साताअघि बाग्चौर नगरपालिका १, की १५ वर्षीया गीता परियारलाई प्राथमिक स्वास्थ्य केन्द्र थारमारेमा प्रसूति गराउन समस्या भएपछि जिल्ला अस्पताल ल्याइयो । उनी जिल्ला अस्पतालमा शल्यक्रियाबिनै सुत्केरी भइन् तर उनी अझै तंग्रिएकी छैनन् ।

यी दुई उदाहरण मात्र हुन्, पछिल्लो समय जिल्लामा कम उमेरमै सुत्केरी हुने किशोरीको संख्या बढ्दै गएको छ । कम उमेरमा गर्भवती हुँदा महिलाले विभिन्न शारीरिक समस्या भोग्दै आएका छन् । आमा र बच्चाको ज्यान खतरामा पर्दै गएको छ । अशिक्षा, जनचेतना अभाव र देखासिकी बालविवाह गर्नेको संख्या बढेसँगै कलिलै उमेरमा आमा बन्ने पनि बढेका हुन् ।

जिल्ला अस्पतालका अनुसार चालु वर्षको ६ महिनामा ६१७ सुत्केरी भएका छन् । त्यसमध्ये १७२ उमेर नपुग्दै आमा बनेका छन् । गत वर्ष जिल्लाभरि ५ हजार ७ सय ३६ महिला सुत्केरी भएका थिए ।

त्यसमध्ये २ हजार १ सय ५७ किशोरी सुत्केरी भएको जनस्वास्थ्य अधिकृत रामबहादुर नेपालीले बताए । उनका अनुसार यस वर्ष जिल्लाभरको तथ्यांक नआएकाले किशोरी आमाको संख्या सार्वजनिक हुन सकेको छैन । ‘सुत्केरी हुनेमध्ये करिब ५० प्रतिशत उमेर नपुग्दै गर्भवती हुने गरेका छन्,’ उनले भने, ‘अशिक्षा र जनचेतना अभावले बालविवाह गर्ने र सानै उमेरमा आमा बन्ने क्रम बर्सेनि बढिरहेको छ ।’

जिल्ला स्वास्थ्यले २० वर्ष पुगेपछि मात्र विवाह गर्न र उमेर नपुग्दै बच्चा नजन्माउन जिल्लाभर विभिन्न सचेतनामूलक कार्यक्रम सञ्चालन गरिरहेको उनले सुनाए । जिल्लामा अझै ४२ प्रतिशत महिला घरमै सुत्केरी हुने गरेको उनले जानकारी दिए । घरमै सुत्केरी हुँदा केही दिनअघि रक्तस्रावका कारण एक महिलाको मृत्यु भएको उनले बताए ।

जिल्ला अस्पतालका डा. अर्जुन बुढाले किशोरी अवस्थामा गर्भवती हुँदा सानै उमेरमा पाठेघर खस्ने, क्यान्सर हुने, बारम्बार रक्तस्राव हुने, ट्युमर देखिनेलगायत स्वास्थ्य समस्या देखिने गरेको बताए । उनका अनुसार कम उमेरमा गर्भवती हुँदा आमा र बच्चाको ज्यानसमेत जोखिममा पर्ने गरेको छ । जिल्ला अस्पतालमा आउने ७० प्रतिशत सुत्केरी २० वर्षमुनिका हुन्छन् ।

प्रकाशित : फाल्गुन ३०, २०७५ ०९:२२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT