बार्सिलोना कुर्दै लिभरपुल

लिरभपुलले बुधबार रातिको दोस्रो लेगको अन्तिम आठको खेलमा पोर्टोलाई सजिलै ४–१ ले हरायो र समग्रमा ६–१ को फराकिलो अग्रता लिन सफल रह्यो । स्टाडिया डो ड्रागोको भएको खेलमा लिभरपुलका लागि साडियो मानेले २६ औं मिनेटमा गोलको खाता खोले ।

एनफिल्डमा भएको पहिलो लेग २–० ले जितेको लिभरपुल त्यस गोलयता दबाबमा रहेन र उसका लागि मोहम्मद सलाह, रोबर्टो फिरमिनो र भरजिल भान डायकले गोल गरे । खेल सकिने २१ मिनेट अगाडि पोर्टोका लागि इडेर मिलिटोले सान्त्वना गोल फर्काए ।

पोर्टोका लागि प्रतिद्वन्द्वीका रूपमा लिभरपुल फेरि एकपल्ट भारी पर्‍यो । एक वर्ष अगाडि पनि पोर्टो आफ्नै घरेलु मैदानमा लिभरपुलसँग ५–० ले पराजित रहेको थियो । अब लिरभपुलले सेमिफाइनलमा लियोनल मेसीको बार्सिलोनाको सामना गर्नेछ ।