आठौं राष्ट्रिय खेलकुद : बिहे लगत्तै मैदानमा

दुर्गालाल केसी

लमही, दाङ — वैशाख ४ गते विवाह थियो । दुलही बन्नुपर्ने मान्छे ३ गते राती मात्रै घर पुगिन् । घरपरिवारले दुलही मान्छे अन्तिम समयमा घर आउने भनेर गुनासो गरे । भोलिपल्ट बाँकेको कोहलपुरमा विवाह भयो । दुलही बनेर कोहलपुरस्थित माइती घरबाट मकवानपुरको हेटौंडा पुगिन् । बुहारीका रूपमा घरभित्र पस्ने औपचारिकता माक्रै निर्वाह गरेर त्रिकेट खेलाडी सीता रानामगर हतारहतार दाङको लमही फर्किन् ।

लमहीमा आठौं राष्ट्रिय खेलकुदअन्तर्गत महिला क्रिकेट प्रतियोगिता भइरहेको थियो । सोमबारदेखि सेमिफाइनल खेल भएकाले उनी आइतबार रातिसम्म लमही पुग्नैपर्ने थियो । हतारहतार समयमै लमही पुगिन् र सोमबारको खेलमा प्रदेश २ लाई हराउँदै आफ्नो टिम एपीएफलाई कप्तानी गर्दै फाइनलमा प्रवेश गराइन् ।

उनको टिमले प्रदेश २ लाई ६७ रनले हरायो, जसमा सीताले २६ रन हानिन् र २ विकेट पनि लिँदै वुमन्स अफ द म्याच भइन् । मंगलबार उनले आफ्नो टिमलाई च्याम्पियन नै बनाइन् । उनको टिमले प्रदेश १ लाई ८७ रनले हराउँदै स्वर्ण पदक जित्यो । सीताले ४२ रन जोडिन् । उनी प्लेयर अफ द फाइनल भईन ।

खेल सकिनेबित्तिकै विवाहपछि माइती फर्किने संस्कार धान्न उनी कोहलपुरतिर लागिन् । पूर्व बक्सिङ खेलाडी पति दिलीपकुमार लामा मंगलबार उनलाई लिन घरबाट लमही आइपुगे अनि कोसेली स्वरूप खेल जितेको खुसियाली बोकेर बूढाबूढी कोहलपुर लागे । ‘विवाहको पूरा प्रक्रिया नै सिध्याउन पाइएन । विवाहसँगै खेल चलिरहेको छ,’ उनले भनिन्, ‘घर पुगेर फेरि माइती फर्कनुपर्ने चलन हुन्छ । त्यो पूरा हुन पाएको छैन । म बाटोमै छु । खेल सकेर बल्ल फर्कंदै छु ।’

उनी घरबाट लमहीसम्म त पुगिन् तर खेल नसकी माइती जान पाउने अवस्था नभएकाले बाटोमै रोकिनुपर्‍यो । माइती फर्कन उनलाई साइतभन्दा खेलको समय हेर्नुपर्ने भयो । ‘जतिबेला पनि खेलकै चटारो हुन्छ । विवाहको अघिल्लो रातसम्म पनि म राष्ट्रिय खेलको तयारीमा थिएँ,’ सीताले भनिन्, ‘राति पुगेर हतारहतारमा दुलही बनियो । नयाँ घरमा भित्रिएर फेरि तुरुन्तै खेलमा फर्किएँ ।’

विवाहपछि श्रीमान्–श्रीमती घुम्ने, रमाइलो गर्ने, घरपरिवारमा बुहारीका रूपमा कर्तव्य निर्वाह गर्नुपर्नेजस्ता सबै काम त्यागेर उनी खेलमा दौडिइन् । ‘आजसम्म खेलको पछि लागियो । अहिले खेल छोडेर व्यक्तिगत जीवनमा अल्झिन सकिंदैन,’ उनले भनिन्, ‘जहिले पनि खेल प्राथमिकतामा छ ।’

सानैदेखि क्रिकेट खेल्न थालेकी सीताले सन् २००७ देखि राष्ट्रिय टोलीमा छिन् । २०११ मा एपीएफ क्लबमा जोडिएकी सीताले दुई एसियाली खेलकुद र एसिया कप खेलिसकेकी छन् । खेल्दाखेल्दै १२ कक्षा पढेर छोडेकी सीता निरन्तर खेलमा छिन् । एपीएफ क्लबमा तीन वर्ष सँगै हुँदा पनि भेट नभएका बक्सिङ खेलाडी लामा २०७२ को भूकम्पको बेला एक्कासि रानासँग भेटिए । भूकम्पपछि काठमाडौंमा उद्धारमा खटिएका बेला लामा र सीताको भेट भएको थियो । २७ वर्षीया सीता र ३३ वर्षीय लामाले चार वर्षको प्रेमलाई नयाँ वर्षको सुरुआतसँगै मागी विवाहमा बदले ।

सीतालाई विवाहपछि घरायसी जीवनमा अल्झिनुपर्ने चिन्ता छैन । श्रीमान् खेलाडी, आमाजू अनुराधा लामा र उनका श्रीमान् पूर्ण लामा पनि बक्सिङकै खेलाडी । घरतिर खेलाडीहरू भएकाले उनी सबैले कुरा बुझ्नेमा ढुक्क छिन् । ‘सबै खेलाडी भएकाले मलाई सजिलो छ । सासू आमाले पनि पत्रिकामा छापिएको फोटो देखाउँदै हुनुहुन्थ्यो,’ उनले भनिन्, ‘म खेलाडी भएकोमा सबैलाई गर्व छ । माइतीतिर पनि सबैले सहयोग गर्छन् । मेरो खेल जीवनमा विवाहले केही असर गर्दैन ।’

अब दुई वर्ष अन्तर्राष्ट्रिय खेल खेलेर थाइल्यान्डलाई हराउने उनको धोको छ । ‘सन् २०१२ देखि थाइल्यान्डले हामीलाई लगातार हराइरहेको छ । अरू देशलाई त हामीले जित्यौं तर अब थाइल्यान्डलाई जसरी पनि जित्नु छ,’ उनले भने, ‘त्यसपछि खेलबाट संन्यास लिने विचार छ ।’ नेपालमा केटीका खेलहरू कमै हुने गरेका छन् । पछिल्लो समय महिला खेलहरू बढदै गएकोमा उनी खुसी छिन् । ‘अहिले महिला खेल र खेलाडीहरू बढदै गएका छन् । यसले हामीलाई खुसी बनाएको छ,’ उनले भनिन्, ‘आठौं राष्ट्रिय खेलकुदमा पनि महिला खेलहरू धेरै भएका छन् ।’

प्रकाशित : वैशाख ११, २०७६ ०८:३६
प्रतिक्रिया
पठाउनुहोस्

आठौं राष्ट्रिय खेलकुद : सुष्मिताको नयाँ कीर्तिमान

कान्तिपुर संवाददाता

बाँके — सुटिङतर्फ महिला १० मिटर एयर राइफलमा प्रदेश ३ की सुष्मिता नेपालले मंगलबार नयाँ राष्ट्रिय कीर्तिमान बनाएकी छन्  । सुष्मिताले २४० पूर्णांकमा २३४ अंक जोडदै स्नेहा राज्यलक्ष्मी राणाले राखेप च्याम्पियनसिपमा बनाएको २३३ अंकलाई भंग गर्दै कीर्तिमानी स्वर्ण जितिन्  ।

२२७ अंकमा आर्मीकी कल्पना परियार दोस्रो तथा २०३ अंकमा प्रहरीकी अस्मिता राई तेस्रो भइन् ।
नेपालगन्ज रंगशालास्थित सुटिङ रेन्जमा भएको प्रतियोगिताअन्तर्गत सोही स्पर्धाको पुरुषमा प्रदेश ५ का अर्नव घिमिरे पहिलो भए । उनले कुल २४० अंकमा २१६ अंक जोडे । २१४ अंक जोडेका प्रहरीका हरिबहादुर थापा दोस्रो तथा १९६ अंक जोडेका आर्मीका सुरेश चौधरी तेस्रो भए । विजेतालाई राष्ट्रिय खेलकुद परिषदका सदस्यसचिव केशवकुमार विष्टलगायतले एक कार्यक्रमबीच पुरस्कृत गरे ।

उसुमा आर्मीलाई १४ स्वर्णआठौं राष्ट्रिय खेलकुदअन्तर्गत १४ औं राष्ट्रिय उसुमा आर्मीले सर्वाधिक १४ स्वर्ण जितेको छ । आर्मीले थप १ रजत र ३ कांस्य पनि जित्यो । एपीएफले ५ स्वर्ण, ८ रजत र ५ कांस्य हात पार्‍यो । प्रहरीले २ स्वर्ण, १ रजत र ५ कांस्य प्राप्त गर्‍यो । २२ स्वर्णका लागि भएको प्रतिस्पर्धामा १ स्वर्ण कर्णाली प्रदेशले हासिल गर्‍यो ।

उसुको अन्तिम दिन मंगलबार थाउलोमा २ तथा सान्सौंमा ६ गरी ८ स्पर्धाका फाइनल भए । थाउलोको महिला चियन सु/छियाङ सुमा एपीएफकी कविता थापामगर पहिलो भइन् । कविताले १८.०५ अंक जोडिन् । सुदूरपश्चिम प्रदेशकी अलिशा खाती दोस्रो तथा आर्मीकी मुना शिरीष मगर तेस्रो भए । पुरुष ताव सु/कुन सुमा आर्मीका विश्व बुढा मगरले स्वर्ण जिते । उनले १८.९ अंक जोडे । एपीएफका कुमार सिन्जाली दोस्रो तथा प्रदेश ५ का राजीव तामाङ तेस्रो भए ।

सान्सौंको महिला ५२ केजीमा आर्मीकी एलिना चौधरीले सुदूर प्रदेशकी गौरी घर्ती मगर, ५६ केजीमा प्रहरीकी जुनी राईले एपीएफकी कमला बोहरा तथा ६० केजीमा आर्मीकी लुमन्ती श्रेष्ठले एपीएफकी निशा विकलाई फाइनलमा पराजित गर्दै पहिलो भए । महिला ६५ केजीमा एपीएफकी मनीषा रावतले प्रहरीकी पूजा गुप्ता, ७० केजीमा आर्मीकी विन्दु पुनमगरले प्रदेश १ की तनुजा सुन्दास र ७५ केजीमा आर्मीकी शीलु डंगोलले गण्डकीकी अनिशा आलेमगरलाई फाइनलमा पाखा लगाउँदै स्वर्ण जिते ।

प्रकाशित : वैशाख ११, २०७६ ०८:३५
पूरा पढ्नुहोस्
प्रतिक्रिया
पठाउनुहोस्