भीम र सुनमायालाई उपाधि

अनिश तिवारी

सिन्धुपाल्चोक — गोरखाका भीमबहादुर गुरुङले शनिबार भएको गोसाइकुण्ड टु हेलम्बु ट्रेल म्याराथन उपाधि जितेका छन् । उनले रसुवाको च्योलाङपाटी हुँदै हेलम्बु मराम्चीसम्मको दूरी ५ घण्टा ७ मिनेटमा सकेर ५० हजारसहित ह्योल्मो ढङ्येन टुंगुना बाजा पाए । 

ओखलढुंगाका सुमन कुलुङले ५ घण्टा ११ मिनेटमै मराम्चीमा पाइला राखेर दोस्रो हुँदै ३० हजार र खुकुरी लिएर चित्त बुझाए । ६ घण्टामा दौड पूरा गरेका सोलुखुम्बका कल्साङ तामाङ भए ।

उनले १५ हजारसँगै सांस्कृतिक डम्फु पाए । निर्धारित दुरी ६ घण्टा १५ मिनेटमा पूरा गरेकी जुम्लाकी सुनमाया तामाङ बुढाले महिलातर्फको उपाधि जितिन् । उनले ५० हजार पाइन् । ७ घण्टा २५ मिनेटमा दौड सकेकी खोटाङकी पि्रया राईले ३० हजार र ८ घण्टा ७ मिनेटमा दौड पूरा गरेकी ओखलढुंगाकी छोकी शेर्पाले १५ हजार पुरस्कार पाए ।

सिन्धुपाल्चोकका शीर्ष तीन स्थानका विजेता खेलाडीमा हेलम्बुका ग्याल्साङ लामाले ५ हजार, फुर्बा तामाङले ३ हजार र विकास तामाङले १ हजार ५ सय पाएका छन् । जिल्लाकै महिलातर्फ पाँचपोखरी गाउँपालिकाको भोताङकी लाम्बुटी लामाले ५ हजार र खेन्दो लामाले ३ हजार पाए ।

पर्यटकीय क्षेत्रमा प्रसिद्ध हेलम्बु र रसुवाको गोसाइँकुण्डलाई जोड्न हेलम्बु ट्रेल रनिङ क्लबले आयोजना गरेको अन्तर्राष्ट्रिय ट्रेल म्याराथनमा विदेशी र नेपाली गरी २५ जनाको सहभागिता थियो । ४२ किलोमिटर दूरीको ट्रेल म्याराथन ६ घण्टामा पार गर्ने अपेक्षा राखेर पर्यटकीयस्थलमा एक दिनका लागि आयोजना गरिएको क्लबका अध्यक्ष मनीष तामाङले बताए ।

हेलम्बु गाउँपालिकाले ५ लाखदेखि विभिन्न सामग्री दिएर सघाइरहेको ट्रेल म्याराथनका खेलाडी शनिबार नै रसुवाको बुद्धडाँडा, गोसाइँकुण्ड, ८ कुण्ड हुँदै फेदीबाट घोप्टे, ठाडेपाटीबाट मुग्लिनकोट घुम्दै आएका थिए । तामाङका अनुसार टप १० भित्र पर्नेलाई जनही २ हजार दिइएको छ । नेपालमै हराउँदै गएका पुराना पदमार्गमा ट्रेल आयोजना गरेर आन्तरिक तथा बाह्य पर्यटक आर्कषित गर्ने र ट्रेल म्याराथन खेलाडी उत्पादन गर्ने लक्ष्य राखिएको छ ।

प्रकाशित : वैशाख २९, २०७६ ०७:५२
प्रतिक्रिया
पठाउनुहोस्

मोरङ सेमिफाइनलमा

रमेशचन्द्र अधिकारी

धनकुटा — मोरङको विन्ध्याबासिनी फुटबल क्लबको जितसँगै शनिबार सहिद भीमनारायण श्रेष्ठ आमन्त्रण गोल्डकप फुटबलको १४ औं संस्करण सुरु भएको छ । 

सहिद भीमनारायण स्मृति गोल्डकप फुटबलमा शनिबार भिड्दै रोयल फुटबल क्लब भारतविरुद्ध विन्ध्यबासिनी फुटबल क्लब मोरङका खेलाडी । तस्बिर : रमेशचन्द्र/कान्तिपुर

उद्घाटन खेलमा विन्ध्याबासिनीले रोयल फुटबल क्लब भारतलाई सडनडेथमा हराएको थियो । जितसँगै टोली सेमिफाइनल पुगेको छ । धनकुटाको तल्लो टुँडिखेलमा भएको खेलमा दुवैबाट निर्धारित समयमा गोल हुन सकेन ।

पेनाल्टी शुटआउटमा दुवैको ५-५ गोल बराबर भएपछि सडनडेथका आधारमा विजेता छिनोफानो भएको हो । रोयलका प्रतीक लामाले पेनाल्टी विन्ध्याबासिनीका गोलकिपर सूर्य अधिकारीले रोकेर टोलीलाई जित दिलाएका छन् । सडनडेथमा विन्ध्यबासिनीको तर्फबाट कप्तान अशोक खवासले हानेको पेनाल्टी गोलमा परिणत भएको थियो । म्यान अफ द म्याच विजेताका गोलकिपर सूर्य घोषित भए ।

सुरुदेखि नै विन्ध्यबासिनीका खेलाडीले कयौं अवसर गुमाए । दोस्रो हाफको मध्यतिर विन्ध्यबासिनीका विनोद केसीले प्रहार गरेको बल बारमा लागेर बाहिरिएको थियो ।

प्रतियोगितामा विभागीय र बाहिरका गरी ८ टिमले भाग लिएको आयोजक समितिका संयोजक शम्भु प्रधानले जनाए । प्रतियोगितामा फ्रेन्ड्स क्लब, एपीएफ, आयोजक धनकुटा ११, बिर्तामोड युनाइटेड क्लब झापा, विन्ध्याबासिनी, धरान फुटबल क्लब सुनसरी, रोयल फुटबल क्लब भारत र दाउफिन्स क्लब क्यामरुन प्रतिस्पर्धी छन् । विजेताले ४ लाख र उपविजेताले २ लाख रुपैयाँ पुरस्कार पाउने छन् । विधागत उत्कृष्टलाई पनि पुरस्कार दिइने छ ।

सहिद भीमनारायण श्रेष्ठको नाममा २०५५ सालमा स्थापित प्रतियोगिता केही वर्ष स्थगित भए पनि २०६३ यता नियमित हुँदै आएको संस्थापक राजेश्वरबहादुर श्रेष्ठले बताए । प्रतियोगिताको उद्घाटन सांसद राजेन्द्र राईले गरे । सहिद भीमनारायणका पत्नी लक्ष्मी, छोरा मनोहरनारायण, मनोजनारायण र छोरी ममतालगायतलाई सम्मान गरिएको छ । आइतबार आयोजक धनकुटा ११ र बिर्तामोड युनाइटेड झापाबीच हुने आयोजकले जनाएको छ ।

हात हालाहाल
खेल चलिरहेको क्रममा दुवै टिमका खेलाडीबीच हात हालाहाल भएको छ । दुवैबीच कुटाकुट भएपछि केहीबेर तनाव सिर्जना भएको थियो । दुवै टोलीका विदेशी खेलाडीबीच विवाद हुँदा हात हालाहाल भएको हो ।

केही बेरपछि खेल सञ्चालनमा आएको थियो । बिन्ध्यावासिनीका विदेशी खेलाडी याकुबले बल हातले समाएका थिए । उनलाई रेफ्रीले पहेँलो कार्ड देखाए ।

प्रकाशित : वैशाख २९, २०७६ ०७:५१
पूरा पढ्नुहोस्
प्रतिक्रिया
पठाउनुहोस्