सेरेना उपाधितर्फ केन्द्रित

विम्बल्डन ओपन
(एएफपी)

लन्डन — सेरेना विलियम्स बिनापीडा राम्रो अवस्थामा रहेकाले विम्बल्डन ओपनको उपाधि जित्न शतप्रतिशत केन्द्रित रहेको उनका प्रशिक्षक प्याट्रिक मोउरातोग्लोउले बुधबार बताएका छन् । बच्चा जन्माएपछि ३७ वर्षीया सेरेना कडा मिहिनेत गर्दै पुनरागमन गरिरहेकी छन् ।

थुप्रै चोटको समस्याबाट गुज्रिएकी उनी प्रशिक्षकका अनुसार मार्गरेट कोर्टको कीर्तिमान २४ ग्रान्डस्लाम उपाधि बराबरी गर्ने लक्ष्यमा रहेकी छन् । अमेरिकी खेलाडीको ‘ट्रेडमार्क’ शैलीको खेल चाखलाग्दो रूपमा अर्को तहमा फर्किएको छ । उनले फेरि पनि आफ्नो लय समातेको प्रशिक्षकले बताए ।

११ औं वरीयताकी सेरेनाले सेमिफाइनलमा बिहीबार ५४ औं विश्व वरीयताकी चेक गणतन्त्रकी बारबोरा स्ट्रेकोभाको सामना गर्नेछिन् । ‘यो क्षणमा उनी राम्रो अवस्थामा छिन् । उनी खुसी छन्,’ प्याट्रिकले भने, ‘उनका पति यहाँ छन् । उनका छोरी यहाँ छिन् । उनी अहिले तीन साताका लागि पीडारहित अवस्थामा छिन् ।’

‘हरेक दिन पीडामा केन्द्रित हुँदा प्रतियोगितामा तयारी गर्नका लागि धेरै कठिन हुन्छ,’ प्रशिक्षक प्याट्रिकले भने, ‘पीडासहित प्रतिस्पर्धा गरेको अवस्थामा खेलमा केन्द्रित हुन गाह्रो हुन्छ किनभने पीडित भएको अवस्थामा हुन्छ । अब अवस्थामा फरक छ । जब उनले खेलिरहेकी हुन्छिन्, त्यस बेला उनी खेल र जितप्रति शतप्रतिशत केन्द्रित भइरहेकी हुन्छिन् । उनले आफ्नो स्तर आवश्यक भएको बेला उकासेकी छन् । त्यो उनको ट्रेडमार्क हो । उनी फर्किएकी छिन् । त्यसैले सबथोक सकारात्मक छ ।’

४९ वर्षीय यी ग्रिक–फ्रेन्च प्रशिक्षकले सेरेनासँग सन् २०१२ यता निरन्तर सहकार्य गरिरहेका छन् । यो सहकार्यले अमेरिकी खेलाडीको ग्रान्डस्लामको सिंगल्समा २३ उपाधिमध्ये १० वटा हात पारेको छ । अस्ट्रेलियाली महान्खेलाडी कोर्टले सन् १९६० देखि १९७३ सम्मको अवधिमा २४ ग्रान्डस्लाम जितेकी थिइन् ।

प्याट्रिकले सेरेना सुरुबाटै बिम्बल्डन जित्दै कोर्टको सफलतालाई उछिन्नेमा केन्द्रित भएकी बताएका छन् । ‘त्यसैका लागि उनी बच्चा जन्माएर स्वास्थ्यमा थुप्रै समस्या बाबजुद पनि टेनिस खेल्न फर्किएकी हुन् । उनी जसरी ऊर्जा लगाएकी छन्, यस्तो मैले कहिल्यै देखेको थिएन । त्यो स्तरमा फर्किन उनले गरेको कठिन मिहिनेतबारे तपाईलाई कुनै आइडिया छैन । उनी त्यसैका लागि फर्किएकी हुन् । यो उनका लागि सम्भवत् धेरै हुनेछ, जब सफलतापाउने छिन् ।’

सातपल्टकी बिम्बल्डन च्याम्पियन सेरेनाले घुँडाको समस्याको कारण फ्रेन्च ओपन गुमाएकी थिइन् । त्यसका लागि उनले पेरिसका चिकित्सकसँग निश्चित गरेकी थिइन् । प्रशिक्षकले उनलाई खेलको अभ्यास कम भएर पनि बिम्बल्डनका लागि तयार गरेको हुनसक्छ ।

‘उनी राम्रो तयारीमै रहेकी भए पनि उनले पहिलो खेलमा राम्रो टेनिस खेलेकी छैनन् । उनी धेरै समय लय समात्नै संघर्षरत थिइन्,’ प्रतिद्वन्द्वीहरू बाहिरिइरहेकोबारे उनले भने, ‘हरेक खेलपछि मलाई त्यो थाह छ । उनी राम्रोमाथि राम्रो भइरहेकी छन् ।’

बिहीबारै अर्को सेमिफाइनलमा सातौं वरीयताकी सिमोना हालेपले आठौं स्थानकी एलिना स्भितोलिनाविरुद्ध प्रतिस्पर्धा गर्दै छिन् ।

प्रकाशित : असार २६, २०७६ १०:०५
प्रतिक्रिया
पठाउनुहोस्

'अर्गानिक प्रदेश' मा भारतीय तरकारी निर्वाध

चाँदनी कठायत

(वीरेन्द्रनगर) — कर्णाली सरकारले अर्गानिक प्रदेश बनाउने मुख्य नीति अगाडि सारे पनि निर्वाध रूपमा भारतीय तरकारी तथा फलफूल भित्रिने क्रम बढ्दो छ । प्रदेश राजधानी सुर्खेतमा आयात हुने तरकारीको झन्डै तीन चौथाइ हिस्सा भारतीय तरकारीले ओगटेको छ ।


फलफूल तथा तरकारी व्यवसायी संघ, सुर्खेतका अनुसार माघदेखि जेठसम्म ४३ हजार ३ सय १६ क्विन्टल तरकारी भित्रिएकामा ३१ हजार ७ सय ७५ क्विन्टल भारतबाट आएको छ । ‘सरकारले अर्गानिक प्रदेश बनाउने भनेको छ तर हामी नै उपभोक्तालाई विषादीयुक्त तरकारी बेच्न बाध्य छौं,’ संघका अध्यक्ष टोपेन्द्रजंग शाहीले भने, ‘उपभोक्ताले भान्सामा विष पकाइरहेका छन्, नियमन गर्ने निकाय मौन छन् ।’

बनेन विषादी परीक्षण केन्द्र
विशेषगरी भारतबाट आउने तरकारीको विषादी परीक्षण गर्न प्रदेश सरकारले सुर्खेतको हर्रे र सल्यानको कालिमाटीमा विषादी परीक्षण तथा द्रुत प्रयोगशाला केन्द्र स्थापना गर्ने निर्णय गरेको छ । यसका लागि चालु आर्थिक वर्षमा १ करोड रुपैयाँ विनियोजन गरिएको छ । आगामी आर्थिक वर्षमा पनि बजेट छुट्याइएको छ ।

केन्द्र स्थापनाको कामले भने गति लिन सकेको छैन । भूमि व्यवस्था, कृषि तथा सहकारी मन्त्रालयका प्रवक्ता हरिप्रसाद पण्डितले कपुरकोटमा केही काम भए पनि हर्रेमा जग्गा नै व्यवस्था हुन नसकेको बताए । उनका अनुसार कपुरकोटमा कृषि उपज बजार सञ्चालक समितिले पूर्वाधारको काम गरिरहेको छ ।

साविकको जिल्ला कृषि विकास कार्यालय रहेको स्थानमा प्रयोगशाला बन्दै गरेको हो । कपुरकोट कृषि उपज बजार सञ्चालक समितिका सचिव तिलक शर्माले दुई तलाको भवन निर्माणाधीन रहेको जानकारी दिए । बजेट अभावमा ल्याब भने नबन्ने उनले बताए । ‘ल्याब बनिहाले पनि सञ्चालनका लागि तालिमप्राप्त व्यक्ति बाहिरबाट ल्याउनुपर्छ,’ उनले भने, ‘यसले थप जटिलता हुने देखिन्छ ।’

हर्रे कर्णालीमा भारतीय तरकारी आयात हुने प्रमुख नाका हो । रुपैडिया, नेपालगन्ज हुँदै तरकारी आइपुग्छ । हर्रेमा विषादी परीक्षण जरुरी रहे पनि जग्गा उपलब्ध नहुँदा चालु आवमा पूर्वाधार निर्माण हुन नसक्ने भएको छ । प्रदेश सरकारले विभिन्न सहकारीसँग कुरा गरे पनि जग्गाको व्यवस्था नभएको मन्त्रालयले जनाएको छ । ‘नगरपालिकासँग पनि मौखिक कुरा भएको हो,’ प्रवक्ता पण्डितले भने, ‘सार्वजनिक जग्गा भाडामा लिने ठाउँ पनि भएन । आगामी वर्ष नगरपालिकासँग समन्वय गरेर काम गर्छौं ।’

उनले वीरेन्द्रनगरमा पनि विषादी परीक्षण प्रयोगशाला केन्द्र स्थापनाका लागि आगामी आर्थिक वर्षदेखि काम गर्ने बताए । फलफूल तथा तरकारी व्यवसायी संघ अध्यक्ष शाहीले सरकारले विषादी प्रयोगशाला केन्द्र बनाउन ढिलाइ गर्दा उपभोक्ता विषादीयुक्त तरकारी खान बाध्य भएको बताए ।

अर्गानिक प्रदेशका लागि सबैभन्दा पहिला सरकारले भारतबाट आउने तरकारी रोकी विषादीरहित उत्पादनमा जोड दिनुपर्ने उनको भनाइ छ । ‘परीक्षण केन्द्र राखेर मात्र हुँदैन, किसानलाई अर्गानिक तरकारी उत्पादनमा प्रोत्साहित गरिनुपर्छ,’ उनले भने ।

भारतीय उत्पादनको वर्चस्व
भारतसँग सीमा नजोडिएको प्रदेश भए पनि कर्णालीको बजारमा भारतीय तरकारी र फलफूलको वर्चस्व छ । संघका अनुसार पछिल्ला पाँच महिनामा भित्रिएको ३८ हजार १ सय ४ क्विन्टल फलफूलमध्ये भारतबाट मात्रै २७ हजार ३ सय ३ क्विन्टल (७१.६५ प्रतिशत) आएको छ ।

भारतबाट मसलादार कृषि उपज अझ बढी मात्रामा भित्रिने गरेको छ । पाँच महिनामा ३ हजार ५ सय क्विन्टल मसलादार तरकारी भित्रिएकामा ९२ प्रतिशत भारतबाट आएको अध्यक्ष शाहीले बताए ।

प्रदेश सरकारले अर्गानिक प्रदेश बनाउने निर्णय गरेको थियो । यसका लागि भारतबाट आयात हुने तरकारीको विषादी परीक्षण गर्ने र प्रदेशमा अर्गानिक तरकारी उत्पादनमा जोड दिने नीति तय गरिएको छ । त्यहीअनुसार चालु आर्थिक वर्षमा अर्गानिक प्रोत्साहनका लागि २ करोड, प्रांगारिक मल उत्पादनका लागि २ करोड, अर्गानिक बजारीकरणका लागि १ करोड ५० लाख बजेट विनियोजन गरेर काम गरिएको मन्त्रालयको भनाइ छ ।

प्रकाशित : असार २६, २०७६ १०:०२
पूरा पढ्नुहोस्
प्रतिक्रिया
पठाउनुहोस्