सन्तोष र रेखालाई हाफ म्याराथन

भवानी भट्ट

कञ्चनपुर — ‘दौड सुदूरपश्चिम दौड’ भन्ने नारासाथ सोमबार आयोजित खुला राष्ट्रिय महिला तथा पुरुष हाफ म्याराथनको उपाधी सशस्त्र प्रहरीका सन्तोषविक्रम विष्ट र बेलौरी नगरपालिकाकी रेखा चन्दले जितेका छन् । दुवैले जनही एक लाख रुपैयाँ पुरस्कार जिते । 

कञ्चनपुरको शुक्लाफांँटा नगरपालिकाको झलारीदेखि भीमदत्त नगरपालिकास्थित कभर्डहलसम्मको २१ किलोमिटर दुरी सन्तोषले १ घण्टा १५ मिनेट ३३ सेकेन्डमा पूरा गरे । यसअघि माघमा भीमदत्त नगरपालिकाले आयोजना गरेको जैविक धार्मिक हाफ म्याराथनमा पनि उनले १ घण्टा ११ मिनेटमा दुरी तय गरे उपाधि जितेका थिए । महिलातर्फ रेखा १ घण्टा ३९ मिनेट ५२ सेकेन्डबाट विजेता बनिन् । जैविक धार्मिकमा उनी दोस्रो भएकी थिइन् ।

पुरुषतर्फ भवानी दल गण तेघरी कैलालीका सुमन मादेन दोस्रो र बेदकोट नगरपालिका ८ का लक्ष्मण भण्डारी तेस्रो भए । सुमनले १ घण्टा २१ मिनेट २८ सेकेन्ड र लक्ष्मणले १ घण्टा २२ मिनेट ३ सेकेण्डमा दुरी पार गरे । देवीदल गण मझगाउँका सन्तोष सिंह बोहरा चौथो, अनिल देवकोटा पाँचौं र भवानी दलका भीमदत्त भट्ट छैटौं भए ।

महिलामा भीमदत्त नगरपालिका १९ बागफांँटाकी लक्ष्मी बम दोस्रो र भवानी दलकी कविता जनाला तेस्रो भए । लक्ष्मीले १ घण्टा ४३ मिनेट ६ सेकेन्ड र जनालाले १ घण्टा ४४ मिनेट ५७ सेकेन्डमा दुरी पार गरे । भवानी दलकी मनिता नाथ, बाहिनी नम्बर २५ भगतपुरकी लक्ष्मी सुतारा र भीमदत्त–१३ की ममता भट्ट चौथोदेखि छैटौं भए । दोस्रो हुनेले ६० हजार, तेस्रो हुनेले ४० हजार, चौथो हुनेले २५ हजार, पाँचौं हुनेले १५ हजार र छैटौं हुनेले १० हजार रुपयाँ पुरस्कार पाए ।

सुदूरपश्चिम प्रदेशको स्वीकृत कार्यक्रमअन्तर्गत सुदूरपश्चिम क्षेत्रिय खेलकुद विकास समितिको आयोजनामा प्रतियोगिता भएको हो । प्रतियोगितामा ६ महिला र ८२ पुरुष खेलाडीले भाग लिएका थिए । विजेतालाई सुदूरपश्चिम प्रदेशसभामा नेकपाका प्रमुख सचेतक तारा लामा तामाङले पुरस्कृत गरे । उनले कञ्चनपुरले हरेक खेलकुदमा देशकै आफ्नो उत्कृष्ट पहिचान कायम गरे पनि त्यसअनुसार भौतिक पूर्वाधार हुन नसकेकाले त्यसतर्फ सबै जुटनुपर्नेमा जोड दिए ।

प्रकाशित : असार ३१, २०७६ ०७:५५
ADVERTISEMENT
प्रतिक्रिया
पठाउनुहोस्

तरकारी भित्र्याउनै दुई दिन

भवानी भट्ट

(कञ्चनपुर) — कञ्चनपुर भन्सार कार्यालयले विषादी परीक्षणविनाको तरकारी र फलफूल आयात गर्न रोक लगाएपछि व्यवासायीहरूले महेन्द्रनगर र धनगढीका लागि नेपालगन्ज नाकाबाट तरकारी भित्र्याउन थालेका छन् ।

झापाको बिर्तामोड नगरपालिका–५ स्थित कृषि उपज बजारस्थित खुद्रा तरकारी पसल । तस्बिर : अर्जुन/कान्तिपुर

सीमावर्ती बजार खटिमाबाटै फलफूल तथा तरकारी खरिद गरी झन्डै ६ सय किमि टाढाबाट आइरहेको व्यवसायीहरू बताउँछन् । यसरी तरकारी भित्र्याउदा दुई दिनभन्दा बढी समय लागिरहेको छ ।

अहिले धनगढी, अत्तरिया र महेन्द्रनगरका लागि दैनिक ४/५ ट्रक तरकारी र फलफूल नेपालगन्ज नाकाबाट आयात भइरहेको छ । ‘यहांँबाट आयात हुन नसक्ने भएपछि नेपालगन्ज भएर आयात गर्न थालेका हौं,’ व्यवसायी नरेन्द्र साउँदले भने । उनका अनुसार शुक्रबारसम्म परीक्षणविनै र शनिबारदेखि परीक्षण गराएर मात्रै भित्रिएका हुन् । खटिमामा लोड भएको गाडी भारतकै रुपैडिया हुँदै नेपालगन्ज नाकाबाट भित्रिएर दोस्रो दिन मात्रै महेन्द्रनगर पुग्ने उनले बताए । यसरी आयात गर्दा प्रतिकिलो १० देखि २० रुपैयाँसम्म ढुवानी भाडा महँगो पर्ने उनले बताए ।

‘महेन्द्रनगरमा दैनिक १/२ ट्रक मात्रै आउँछ, धनगढी र अत्तरियामा पनि २/३ ट्रक आउँछ,’ उनले भने, ‘अहिले आयात भइरहेको आलु, प्याज र आँप मात्रै हो, हरियो तरकारी त दुई दिनसम्म खराब हुन्छ ।’

भारत उत्तराखण्डको खटिमाबाट महेन्द्रनगर पुग्न बढीमा १ घण्टा लाग्छ । क्वारेन्टाइन जाँंच र विषादी परीक्षण गर्दा पनि एक दिनमा सहजै भित्र्याउन सकिन्छ । तर अहिले तरकारी र फलफूल आयात गर्न खटिमाबाट भारतकै बाटो भएर पुरनपुर, माताटाँडा, सीतापुर हुँदै ४ सय किमि टाढा रुपैडिया पुग्नुपर्नेछ । सरकारले असार २ गते राजपत्रमा प्रकाशित गरी विषादी परीक्षण पछि मात्रै तरकारी र फलफूल आयात गर्ने निर्णय कार्यान्वयन गरेको थियो । तर केही दिनमै उक्त निर्णय फिर्ता गरेपनि कञ्चनपुरको गड्डाचौकी नाकाबाट तरकारी र फलफूल आयात हुन सकेको छैन ।

स्थानीय विद्यार्थी र सर्वसाधारणले विरोध जनाएपछि आयात परीक्षणविना आयात हुन नसकेको हो । कैलालीको अत्तरिया स्थित प्रयोगशालामा उपकरण खराब भएकाले व्यवसायीहरूले नेपालगन्ज नाकाबाट आयात गर्न लागेका हुन् ।

पछिल्लोपटक सर्वोच्च अदालतले पनि विषादी परीक्षणपछि मात्रै तरकारी र फलफूल भित्र्याउन आदेश गरेपछि केही नाकामा विषादी परीक्षणपछि मात्रा आयात भइरहेको छ । ‘विषादी परीक्षण र क्वारेन्टाइन प्रक्रिया पूरा गरी आउने व्यवसायीलाई हामी सेवा दिन तयार छौं,’ कञ्चनपुर भन्सार कार्यालयका प्रमुख भीमप्रसाद अधिकारीले भने, ‘सर्वोच्चको आदेशअनुसार विषादी परीक्षण गराएर मात्रै तरकारी तथा फलफूल भित्र्याउनुपर्छ ।’

उनले अब विषादी परीक्षणविना भित्रिन नदिइने उनले बताए । उनका अनुसार अहिले गड्डाचौकी नाकाबाट तरकारी र फलफुल आयात बन्द भएको छ । असार दोस्रो सातासम्म विषादी परीक्षण गराएर करीब १२ ट्रक भित्रिए पनि त्यसपछि भने यहांँको नाकाबाट तरकारी भित्रिएको छैन ।

मुख्य नाकाबाट नआए पनि लुकाइछिपाइ साइकल र मोटरसाइकलमा तरकारी आयात भईरहेको महेन्द्रगर सब्जिमण्डी व्यवस्थापन समिति अध्यक्ष विशाल सोनार बताउछन् । उनका अनुसार अहिले भारतबाट आलु, प्याज र आँप मात्रै आयात भइरहेको छ । यहांँको उत्पादन पनि सकिएको र भारतबाट आयातमा पनि केही कमी आएकाले तरकारी र फलफुलका मुल्य भने बढेको छ ।

आलु, प्याज र हरियो तरकारीसंँगै आँपको मूल्यवृद्धि भएको हो । हरेकको मूल्य प्रतिकिलो २०/२५ रुपैयाँसम्म बढेको छ ।

प्रकाशित : असार ३०, २०७६ १०:५६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT