घरेलु मैदानमा तीन खेलमात्रै

त्यसैले यी दुईविरुद्ध तोकिएका ‘अवे’ खेलहरू नेपालको घरेलु खेलको रूपमा हुने निश्चित भएको छ ।

एन्फा कमिटीको मंगलबार भएको आकस्मिक बैठकपछि प्रवक्ता किरण राईले भने, ‘भूकम्पपछि सवलीकरण गरिरहेको दशरथ रंगशाला अझै तयार भइसकेको छैन । त्यसैले १९ भदौमा (कुवेतविरुद्ध), २४ गते (चाइनिज ताइपेईविरुद्ध) र असोज २८ मा (जोर्डनविरुद्ध) नेपालमा तोकिएका खेलहरू ‘अवे’ को रूपमा खेल्ने र बाहिर (विदेश) तोकिएका खेलहरू हामीले घरेलु मैदानमा खेल्ने प्रस्ताव गरेका थियौं । यसमा ताइपेई र जोर्डन सहमत भए ।

त्यसैले सुरुमा हामी यी दुई देशको यात्रा गर्नेछौं । यी दुई टिमविरुद्धका दोस्रो खेल नेपालमा हुनेछ । कुवेतले भने हाम्रो प्रस्ताव अस्वीकार गर्‍यो । नेपालको दुवै खेल कुवेतमै हुने दुई संघबीच सहमति भयो ।’ त्यसअनुसार नेपालले कुवेतविरुद्ध भदौ १९ मा कुवेतमै प्रतिस्पर्धा गर्दै विश्वकप २०२२ को छनोट सुरु गर्नेछ । त्यो खेल नेपालको लागि घरेलु खेलको रूपमा हुनेछ भने पूवर््निर्धारित तालिकाअनुसार नेपालले कुवेतविरुद्ध ‘अवे’ खेल मंसिर ३ मा खेल्नेछ । त्यस्तै, चैत १३ मा ताइपेईमा र जेठ २२, २०७७ मा जोर्डनमा हुने खेल भने नेपालमा हुनेछन् । अस्ट्रेलियाविरुद्ध असोज २३ (अवे) र चैत १८ (होम) का खेल यथावत् छन् ।

खेलस्थल सार्नेमा प्रतिद्वन्द्वीसँग सहमति भए पनि अन्तर्राष्ट्रिय फुटबल संघ (फिफा) लाई जानकारी गराउन बाँकी रहेको प्रवक्ता राईले बताए । ‘हामीबीच सहमति भइसकेको छ । अब दुवैले फिफाको स्वीकृति लिने प्रक्रिया थाल्नेछौं,’ उनले भने । राष्ट्रिय खेलकुद परिषदको निर्माण तथा मर्मत शाखाले कात्तिक १५ सम्म सम्पन्न गर्ने योजनासहित दशरथ रंगशालाको काम भइरहेको र त्यसअघि खेल सञ्चालन गर्न नसकिने बताइसकेको छ । त्यसबाहेक अरु रंगशालाको विश्वकप छनोटका खेल सञ्चालनका लागि मापदण्ड नपुग्ने भएकाले नेपालको खेल सार्न बाध्य भएको पनि राईले बताए ।

एसियन कप २०२३ को छनोटको रूपमा पनि रहेको यस विश्वकप छनोटमा नेपालले फिफा वरीयताको आधारमा सिधै दोस्रो चरणमा प्रवेश पाएको हो । ४० टिम सहभागी छनोटमा ८ समूहका शीर्ष टिमसँगै उपविजेतामध्ये उत्कृष्ट चार टिम कतारमा हुने विश्वकपको एसियाली छनोटको अन्तिम चरणमा पुग्नेछन् । अन्तिम चरणमा पुग्ने १२ टिम चीनमा हुने एसियन कपमा पनि छनोट हुन्छन् । एसियन कपमा बाँकी १२ टिमका लागि विश्वकप छनोटको अन्तिम चरणमा नपुगेका टिमबीच प्रतिस्पर्धा हुनेछ ।