सिटीलाई कम्युनिटी शिल्ड

एएफपी

लन्डन — वेम्बली रंगशालामा भरिभराउ समर्थकका बीच लिभरपुललाई पेनाल्टी सुटआउटमा पराजित गरी म्यान्चेस्टर सिटीले कम्युनिटी शिल्डको उपाधि जितेको छ । सिटीले छैटौं पटक यो उपाधि जितेको हो र २०१५ मा आर्सनलपछि उपाधि रक्षा गर्ने पहिलो टोली बनेको छ । 

नियमित समयमा १–१ गोलको बराबरी भएपछि खेल पेनाल्टीमा पुगेको हो । सिटीले ५–४ गोलअन्तरको विजयसहित उपाधि उचालेको हो । सिटीका गोलरक्षक क्लाउडियो ब्राभोले जर्जिनियो वाइनल्डमको पेनाल्टी बचाए भने सिटीका गाव्रियल जेससले विजयी पेनाल्टी गोल गरेका थिए ।

अघिल्लो सिजनमा इंग्लिस प्रिमियर लिग र एफए कप जितेर कम्युनिटी सिल्डको उपाधि उचाल्ने सिटी पहिलो टोली हो । २००२ मा आर्सनलले पछिल्लो पटक यस्तो सफलता पाउँदा कम्युनिटी शिल्डमा लिभरपुललाई नै १–० ले पराजित गरेको थियो । परमपरागत रूपमा गत सिजनको प्रिमियर लिग र एफए कप विजेताबीच नयाँ सिजनको सुरुआतमा कम्युनिटी शिल्डमा खेल्ने गर्दछन् । सिटीले गत सिजन दुवै उपाधि जितेकाले लिभरपुललाई प्रिमियर लिगमा दोस्रो भएको हिसाबमा सिटीसँग खेल्ने मौका मिलेको थियो ।

१२ औं मिनेटमै रहिम स्टर्लिङले गोल गरी अग्रता दिलाएका थिए । डेभिड सिल्भाको फ्लिकमा उनले नजिकको दूरीबाट गोल गरेका हुन् । सन् २०१५ मा म्यानचेस्टर सिटीमा अनुबन्ध भएयता स्टर्लिङले आफ्नो पूर्व क्लबविरुद्ध पहिलो गोल गरेका हुन् । यसअघिका १० खेलमा स्टर्लिङ लिभरपुलविरुद्ध गोल गर्न असमर्थ रहेका थिए ।

इंग्लिस फुटबलका दुई उत्कृष्ट टिमबीचको प्रतिस्पर्धा निकै रोमान्चक थियो । दोस्रो हाफमा तीनपल्ट बल पोस्टमा लागेर बाहिरिएको थियो । स्टर्लिङले वान भर्सेस वानमा प्रहार गरेको बल पोस्टमा लागेको थियो । लिभरपुलका भर्जिल भान डाइकको हेड बारमा लाग्यो भने मोहम्मद सलाहले पनि पोस्टमाप्रहार गरे ।

गोल गर्न नसकेपछि निराश लिभरपुलका मोहम्मद सलाह  ।
७७ औं मिनेटमा भान डाइकको चलाखीपूर्ण क्रसमा जोइल माटिपले हेडमार्फत गोल गरी युरोपियन च्याम्पियन्स लिभरपुललाई बराबरीमा ल्याए । त्यसपछि खेलमा लिभरपुलले प्रभुत्व कायम राखेको थियो । मोहम्मद सलाह ३ अवसरमा चुक्न पुगेका थिए । त्यसमध्ये अन्तिम मिनेटमा उनको हेडर सिटीका डिफेन्डर केल वाल्करले बाइसाइकल किकमार्फत गोललाइनबाट क्लियर गर्नु उल्लेखनीय थियो ।

नियमित ९० मिनेटको समयमा बराबरी भएपछि सिधै पेनाल्टीमा पुगेको थियो । सिटीका पाँचै खेलाडीले गोल गरेका थिए । सिटीका गुन्डोगान, बर्नान्डो सिल्भा, फिलिप फोडेन, ओलेक्जान्दर जिन्चेन्को र गाव्रियल जेससले गोल गरे । लिभरपुलका जदरान साकिरी, एडम ललाना, एलेक्जान्डर च्याम्बरलिन र सलाहले मात्र गोल गरे ।

प्रकाशित : श्रावण २०, २०७६ ०७:५५
ADVERTISEMENT
प्रतिक्रिया
पठाउनुहोस्

भुरीगाउँमा खो खोको बन्द प्रशिक्षण

कान्तिपुर संवाददाता

बर्दिया — मंसिरको दोस्र्रो साता हुने १३ औं दक्षिण एसियाली खेलकुद (साग) प्रतियोगिताको खो खो खेलको बन्द प्रशिक्षण भुरीगाउँमा सुरु भएको छ । 

आठौं राष्ट्रिय खेलकुद प्रतियोगिताका लागि ठाकुरबाबा नगरपालिकाको भुरीगाउँमा एकेडेमी निर्माण गरेको थियो । मुलुकभरबाट छनोट भएका ३५/३५ महिला तथा पुरुष खेलाडी बन्द प्रशिक्षणमा सहभागी छन् । तिनैमध्येबाट सागका लागि २० पुरुष र २० महिला खेलाडी छनोट हुनेछन् ।

आठौं राष्ट्रिय खेलकुद प्रतियोगितामा मुलुकभरिबाट महिला र पुरुष गरी २ सय १६ खेलाडी सहभागी थिए । ‘तीमध्येबाट
उत्कृष्ट ३५/३५ जनालाई छनोट गरिएको छ ।एक महिनाको बन्द प्रशिक्षणपछि २०/२० जना खेलाडी छनोट हुनेछन्,’ खो खो खेलका प्रशिक्षक केशवराज गौतमले कान्तिपुरसँग भने, ‘अन्तिम छनोटमा परेका खेलाडीले मंसिर १४ गते हुने साग प्रतियोगितामा स्पर्धा गर्नेछन् ।’

बन्द प्रशिक्षणका लागि प्रशिक्षकसहित खेलाडीहरू एक साताअघि बर्दिया आएका हुन् । भारतका खो खो महिला र पुरुष प्रशिक्षक आइतबार साँझसम्म भुरीगाउँ पुग्ने कार्यतालिका छ । बन्द प्रशिक्षण दसैंको एक साताअघिसम्म चल्नेछ । दसैंको एक साता बिदापछि नेपाली खेलाडी प्रशिक्षणका लागि भारतको दिल्लीतर्फ लाग्नेछन् । ३३ दिन भारतमै प्रशिक्षण लिई मंसिर १ गते टोली काठमाडौं फर्किने कार्यतालिका छ ।

‘बर्दियाको भुरीगाउँमा नेपाली प्रशिक्षकहरूले प्रशिक्षण दिइरहनुभएको छ । केही दिनका लागि भारतका प्रशिक्षक पनि आउने कार्यक्रम छ,’ प्रशिक्षक गौतमले भने, ‘सार्कस्तरीय प्रशिक्षण दिल्लीमा गर्ने कार्यक्रम तय भइसकेको छ ।’ खेलाडी प्रशिक्षणका लागि बिहान साढे ६ देखि साढे १० बजेसम्म र साँझ ४ देखि ७ बजेसम्मको समय तोकिएको छ । दिउसो गर्मी भएका कारणले प्रशिक्षणमा समस्या हुने गरेको हो ।

प्रशिक्षणका लागि गौतमसँगैसुरेश नेपाली, बिक्की महर्जन रउषा कुँवर रहेका छन् । बन्द प्रशिक्षणमा महिलातर्फ तीन र पुरुषतर्फ चार खेलाडी घरायसी कारणले सहभागी हुन नसकेपछि वैकल्पिकलाई अवसर दिइएको प्रशिक्षक गौतमले बताए ।

प्रकाशित : श्रावण २०, २०७६ ०७:५२
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT