यूईएफए सुपर कपमा आज चेल्सी र लिभरपुल भिड्दै

(एएफपी)

इस्तानबुल — योर्गन क्लोप इस्तानबुलबाट फर्किंदा लिभरपुलसँग ट्रफी जित्ने बानी परेको देख्न चाहन्छन् । क्लबको एउटा ठूलो सफलताका लागि लिभरपुलले यूईएफए सुपर कपमा प्रिमियर लिग प्रतिद्वन्द्वी चेल्सीविरुद्ध बुधबार प्रतिस्पर्धा गर्दै छ ।

लिभरपुल पेनाल्टीमा एसी मिलानलाई पराजित गर्दै सन् २००५ मा च्याम्पियन्स लिगको उपाधि जितेयता बोस्फोरस फर्किएको छ । छैटौंपल्ट युरोपेली च्याम्पियन भएपछि उसले टर्कीको सहरमा चेल्सीको सामना गर्न लागेको हो ।

परम्परागत रूपमा युरोपेली सिजनको सुरुआत मानिएको खेललाई कसैले पनि गम्भीरतापूर्वक लिने गर्दैनन् । कुनै पनि टिमले उपाधि बढाउने अवसर गुमाउन चाहँदैन । लिभरपुलले ट्रफीको खडेरीलाई सात वर्षमा पूर्णविराम लगाएर यहाँ आइपुगेको हो भने फ्रान्क लाम्पार्ड चेल्सीको व्यवस्थापकीय करिअरलाई राम्रो सुरुआत दिन चाहन्छन् ।

यी दुई क्लबले आपसमा गरी चारपल्ट प्रतिस्पर्धा जितिसकेका छन् । तर पछिल्ला १० मध्ये नौपल्ट सुपर कप स्पेनी क्लबले जितेको छ । बुधबारको अर्को एक महत्त्वपूर्ण पात्र स्टेफनी फ्रापार्ट पनि हुँदैछिन् । यी ३५ वर्षीया फ्रान्सेली युरोपका मुख्य प्रतिस्पर्धामा रेफ्री बन्ने पहिलो महिला हुँदै छिन् । बेसिकटासको घरेलु मैदान भोडाफोन पार्कमा हुने खेलमा उनले असीमित खुसी अनुभव गर्न सक्छिन् । प्रिमियर लिगको पहिलो चरणमा म्यानचेस्टर युनाइटेडविरुद्ध ४–० ले हारेको चेल्सीविरिुद्ध यस खेलमा लिभरपुललाई बलियो मानिएको छ ।

कम्युनिटी सिल्डमा म्यानचेस्टर सिटीविरुद्ध पेनाल्टीमा पराजित भएपछि लिभरपुलले मोहम्मद सलाह, भर्जिन भान डाइक र डिभोक ओरिगीको गोलसँगै नर्विच सिटीलाई सहिजै ४–० ले हराएर नयाँ सिजन थालेको थियो । तर उक्त नतिजालाई एलिसन बेकरको चोटले छाँयामा पारिदियो । क्लोपले ब्राजिली गोलकिपर तिघ्राको चोटले बाहिरिएको पुष्टि गरेका थिए ।

‘उनी कहिले फर्किनेछन् भन्ने म प्रस्टसँग बताउन सक्दिनँ । तर यो बुधबार हुने छैनन्, यसमा प्रस्टै छु । त्यसपछि हामीले हेर्नुपर्छ । यो केही साता पनि लाग्नसक्छ, हामीले हेर्नैपर्छ,’ क्लबको वेबसाइटमा उनको भनाइ लेखिएको छ ।

एलिसनको अनुपस्थितिमा स्पेनी एड्रियनले स्थान पाएका छन् । क्लोप म्याड्रिडमा भएको च्याम्पियन्स लिगको फाइनलमा टोटेनहम हर्टस्परलाई पराजित गरेको टिम निर्माण गर्नेमा आशावादी छन् । ‘लोभी रहनु । त्यो निकै महत्त्वपूर्ण छ । त्यसमा मलाई कुनै शंका छैन । हामी त्यो गर्नेमा प्रस्ट छौं,’ त्यो सफलता कसरी पाउन सकिन्छ भन्नेबारे क्लोपले भने ।

लिभरपुलका समर्थक पनि लगातार तेस्रोपल्ट च्याम्पियन्स लिगको फाइनल पुग्ने सम्भावनालाई लिएर उत्तेजित छन् र त्यो अभियान इस्तानबुलमा फर्केर पूरा गर्न चाहन्छन् । उस्तै गरी उनीहरूले त्यसको प्रस्तावनाको रूपमा सुपर कपलाई पनि प्रिमियर लिगमा जस्तै हुने मानेका छन् ।

‘हामी च्याम्पियन्स लिगमा मात्रै रोकिन चाहँदैनौं । त्यो सबै हामी खेलाडीको समूहले जितेको हो,’ एन्डी रोबर्टसनले भने, ‘हामी बढी चाहन्छौं । तर त्यो कति कठिन हुन्छ भन्ने पनि हामीलाई थाह छ । यो हाम्रो लागि अर्को अवसर हो र यसलाई लिनसके त्यो ठूलो उपलब्धि हुनेछ ।’

चेल्सीले युरोपा लिगको फाइनलमा आर्सनललाई हराएर सुपर कपमा स्थान पाएको हो । तर चेल्सीको टिममा त्यसयता धेरै परिवर्तन भइसकेको छ । प्रशिक्षक माउरिसियो सारी र स्टार खेलाडी इडेन हाजार्डले छाडिसकेका छन् । क्लबका लिजेन्ड लाम्पार्डले दोस्रो डिभिजनको डर्बीमा एक सिजनमात्र व्यवस्थापकीय भूमिका निर्वाह गरेर पनि स्टामफोर्डको ब्रिजको टिम सम्हालेका छन् । उनले लन्डन क्ल्बसँगको औपचारिक दोस्रो खेलमै ट्रफी जित्न चाहेका छन् ।

प्रकाशित : श्रावण २९, २०७६ ११:३६
ADVERTISEMENT
प्रतिक्रिया
पठाउनुहोस्
ADVERTISEMENT

काठमाडौं क्रिकेटमा पाण्डे

कान्तिपुर संवाददाता

काठमाडौँ — अमितवीर पाण्डेलाई अध्यक्षमा चुन्दै काठमाडौं जिल्ला क्रिकेट संघको नयाँ कार्यसमिति चयन भएको छ । सबै १४ पदाधिकारी मंगलबारको निर्वाचनमा सर्वसम्मत भए ।

नेपाल क्रिकेट संघ (क्यान) को सदस्य रहिसकेका पाण्डेले जिल्ला अध्यक्षमा दिवाकर घलेको स्थान लिएका हुन् ।

उपाध्यक्षमा विजयकुमार शर्मा, सचिवमा वसन्तराज सत्याल, कोषाध्यक्षमा युग बस्नेत तथा सदस्यमा हिमालराज गिरी, मनीष ढुंगेल, अजयवीर पाण्डे, रमन श्रेष्ठ, सामसन जंग थापा, प्रफुल्ल वैध, रितेश डंगोल, महेश्वरी डंगोल, धिरेन्द्र श्रेष्ठ, विजितध्वज चन्द छन् ।

विशेष साधारणसभाले प्रफुल्ल वैद्य, महेश्वरी डंगोल, अजयवीर पाण्डे र राजु बस्न्यातलाई प्रदेश सभाका लागि प्रतिनिधि चुनेको छ । प्रदेश ३ का ६ जिल्ला काठमाडौं, ललितपुर, भक्तपुर, नुवाकोट, चितवन र मकवानपुरबाट क्यानको केन्द्रीय निर्वाचनमा ३ प्रतिनिधि छान्न पाउने प्रावधान छ ।

काठमाडौंको नयाँ कार्यसमितिसँगै ३९ जिल्लाको निर्वाचन सकिएको छ । यसअघि नै प्रदेश १, ५ र ७ को निर्वाचन सम्पन्न भइसकेको छ । भदौ १५ सम्म जिल्ला र प्रदेशको निर्वाचन सकिसक्न स्वतन्त्र समितिले समयसीमा तोकेको थियो । भदौ अन्तिम साता वा असोज पहिलो साता क्यानको निर्वाचन हुने सम्भावना छ ।

प्रकाशित : श्रावण २९, २०७६ ११:३३
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT