पाकिस्तानमा बम विस्फोट : एकको मृत्यु, १३ जना घाइते
इस्लामाबाद — पाकिस्तानको उत्तरपश्चिमी प्रान्त बलुचिस्तानमा आइतबार साँझ भएको एक बम विस्फोटमा परी कम्तीमा एकजनाको मृत्यु हुनुको साथै अन्य १३ जना घाइते भएका छन् ।
स्थानीय सञ्चार माध्यमका अनुसार बलुचिस्तान प्रान्तको नसिराबाद जिल्लाको प्रमुख कार्यालय रहेको डेरा मुराद जमाली इलाकमा बम विस्फोट भएको हाे ।
उद्धारकर्ता र प्रहरी टोलीले बम विस्फोटमा परी घाइते भएका व्यक्तिहरुलाई नसिराबाद जिल्लामा रहेको अस्पतालमा उपचारार्थ भर्ना गरिएको छ ।
छदेखि आठ किलो विस्फोटक पदार्थले भरिएको उक्त बम दुर नियन्त्रित यन्त्रद्वारा विस्फोट गराइएको प्रहरीले जानकारी दिएको छ । घाइतेमध्ये तीन जनाको अवस्था चिन्ताजनक रहेको अस्पतालले जनाएको छ ।
बम विस्फोट भएको इलाकामा अनुसन्धान सुरु गरिएको प्रहरीले जनाएको छ । विस्फोटको हालसम्म कुनै पनि समूहले जिम्मेवारी लिएको छैन ।
प्रकाशित : फाल्गुन १३, २०७५ १४:१४प्रतिक्रिया
