अस्ट्रेलियाले आप्रवासी कटौती गर्ने

नारायण खड्का

अस्ट्रेलिया — अस्ट्रेलियाका प्रधानमन्त्री स्कट मरिसनले वार्षिक ३० हजार आप्रवासी कटौती गर्ने घोषणा गरेका छन् । सरकारको जनसंख्या नीति बुधबार सार्वजनिक गर्दै उनले यो घोषणा गरेका हुन् । 

अस्ट्रेलियाले हरेक वर्ष १ लाख ९० हजार विदेशी नागरिकलाई आफ्नो देशमा भित्र्याउने गरेको छ । प्रधानमन्त्री मरिसनले यो संख्या घटाएर १ लाख ६० हजार बनाउने घोषणा गरेका हुन् । मरिसनले ४ वर्षका लागि यो संख्या कायम राख्नेसमेत बताएका छन् ।

Citizen


अस्ट्रेलियाले वार्षिक रूपमा आप्रवासीको संख्या कम गर्नुपर्ने अन्य विभिन्न पक्ष तथा साना दलबाट आवाज उठिरहेको सन्दर्भमा मरिसनको यो घोषणा सार्वजनिक भएको हो । मरिसनले अस्ट्रेलियाको जनसंख्या व्यवस्थापन आप्रवासीलाई भित्र्याउनु मात्र नभएर भौतिक संरचना, ट्राफिक व्यवस्थापन, रोजगारलगायतको व्यवस्था हुनुपनि उत्तिकै महत्त्वपूर्ण भएको बताएका छन् ।

प्रधानमन्त्री मरिसनले अस्ट्रेलियाका मुख्य सहरमा बढदै गएको जनसंख्याको चाप कम गर्न फरक भिसा प्रक्रियाको समेत घोषणा गरेका छन् । यसअनुसार दक्ष, सीपसहितको भिसामा अस्ट्रेलिया आएका विदेशीले यहाँको स्थायी बासिन्दाको अनुमतिपत्र (पीआर) लिन दुर्गम स्थानमा गएर ३ वर्षसम्म बस्नुपर्नेछ । उनीहरूलाई भिसाको प्रोसेसिङमा समेत प्राथमिकता दिइने उल्लेख गरिएको छ ।

यसैगरी विद्यार्थीलाई पनि दुर्गम मानिएका क्षेत्रमा गएर अध्ययन गर्नका लागि प्रोत्साहन गर्ने किसिमले छाक्रवृत्ति लगायतका कार्यत्रमसमेत ल्याइने बताइएको छ । अहिलेसम्म दुर्गम क्षेत्रमा गएर दुई वर्ष बसेको अवस्थामा यहाँको स्थायी बासिन्दाको अनुमतिका लागि योग्य हुने प्रावधान थियो ।

पछिल्लो समयमा आप्रवासीका रूपमा अस्ट्रेलिया भित्रिएका तथा विद्यार्थीहरू अधिकांशको रोजाइ सिड्नी, मेलबर्न लगायतका मुख्य सहर भएपछि देखिएको चाप कम गर्नसमेत यो भिसाको घोषणा गरिएको बताइएको छ । यसका साथै सरकारले ७५ अर्ब डलरको भौतिक संरचना निर्माणका लागि बजेट छुट्टयाउनेसमेत घोषणा गरेको छ ।

जसबाट जनसंख्याको वृद्धिसँगै रोजगार र भौतिक संरचनाको निर्माण र विकास हुने आशा गरिएको छ । अस्ट्रेलियाले दुर्गम मानिएका क्षेत्रहरूमा आवश्यकताअनुसार दक्ष कामदार उपलब्ध हुन नसकेको अवस्थामा सरकारको यो घोषणाले कामदार अभावलाई पूर्ति गर्ने विश्वास लिइएको छ ।

अस्ट्रेलियाले सन् २०१५ देखि वार्षिक १ लाख ९० हजार आप्रवासीलाई भित्र्याउने योजना लिएको हो । तथ्यांकअनुसार गत आर्थिक वर्षमा करिब १ लाख ६३ हजार आप्रवासी अस्ट्रेलिया भित्रिएका भए पनि १ लाख १२ हजार सिड्नी तथा मेलबर्नमा बसोबास गरेका थिए ।

यहाँ आएपछि बढी जनसंख्या भएका सहरमा आप्रवासीहरू थपिँदा जनसंख्याको चाप बढेका कारणसमेत सरकारले यो कदम चालेको हो । जनसंख्याको चाप बढ्दै गएपछि न्यु साउथ वेल्स तथा भिक्टोरिया राज्य सरकारले समेत आप्रवासी संख्या घटाउनुपर्ने बताउँदै आएका थिए ।

प्रकाशित : चैत्र ७, २०७५ ०८:४८
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

भारतमा तिब्बती शरणार्थी घटे

एजेन्सी

मुम्बई — भारतमा तिब्बती शरणार्थीको संख्या ७ वर्षमा ४४ प्रतिशतले घटेको तथ्यांक सार्वजनिक भएको छ । भारत सरकारको तथ्यांकअनुसार सन् २०११ मा भारतस्थित तिब्बती शरणार्थीको संख्या १ लाख ५० हजार रहेकामा हाल ८५ हजार मात्र छ । 

धर्मशालाका अधिकारीका अनुसार अधिकांश तिब्बतीहरू अमेरिका, क्यानडा, जर्मनी र स्विजरल्यान्ड गइसकेका छन् । केही भने तिब्बतमै फर्केको बताइएको छ । विभिन्न ४० देशमा तिब्बतीको संख्या १ लाख ५० हजार रहेको तिब्बती अधिकारीको भनाइ छ । सन् १९५९ को मार्चमा तिब्बतलाई चीनले कब्जामा लिएको घटनाको यसै महिना ६० वर्ष पुगेको छ ।

३४ वर्षीय कुन्साङ तेन्जिङ पनि अब भारत छाड्ने विचार गर्दै छन् । ‘यहाँ पैसा कमाउन धेरै गार्‍हो छ, जागिर पनि केही छैन,’ उनले भने । कागजातमा बाहेक तिब्बतीलाई भारत सरकारले औपचारिक रूपमा शरणार्थीको मान्यता दिएको छैन । उनीहरूलाई विदेशीका रूपमा लिइन्छ ।

भारतले १९५१ मै राष्ट्रसंघको शरणार्थीसम्बन्धी महासन्धिमा हस्ताक्षर गर्न अस्वीकार गरेको थियो । ‘यही कारण तिब्बतीलाई सरकारी जागिर दिइँदैन र कहिलेकाहीँ विश्वविद्यालयले समेत भर्ना लिँदैन,’ धर्मशालास्थित केन्द्रीय तिब्बती प्रशासनका प्रवक्ता सोनाम नोर्बु दाग्पोले भने । उनका अनुसार तिब्बतबाट भागेर आउनेको संख्या पनि घटेको छ । विगतमा १ वर्षमा ३ हजार जनासम्म आउने गरेकोमा गत वर्ष १ सय जनामात्र आए ।

तिब्बतीलाई आर्थिक समस्या प्रमुख रूपमा रहेको छ । उनीहरूलाई कुनै पनि सम्पक्ति खरिदबित्री गर्न या बैंक क्रेडिट कार्ड लिन मुस्किल छ । पछिल्लो समय भारतीय सरकारले कर्मचारी र नेतालाई प्रवासी तिब्बती सरकारको कार्यक्रममा सहभागी हुन रोक लगाएको थियो । भारतीय प्रधानमन्त्री नरेन्द्र मोदी र चिनियाँ राष्ट्रपति सी चिनफिङबीच भएको वार्तापछि यस्तो निर्देशन आएको थियो ।

प्रकाशित : चैत्र ७, २०७५ ०८:४७
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT