अमेरिकाले हुवावेलाई कमजोर ठान्यो - हुवावे संस्थापक तथा सीईओ रेन जेङ्फी

एजेन्सी

बेइजिङ/वासिङटन — चिनियाँ मोबाइल कम्पनी हुवावेका संस्थापक तथा प्रमुख कार्यकारी अधिकृत रेन जेङ्फीले अमेरिकाले आफ्नो कम्पनीलाई कमजोर ठानेको भन्दै अमेरिकी कदमको बेवास्ता गर्ने जनाएका छन् । 

चिनियाँ सरकारी सञ्चारमाध्यमसँगमंगलबार कुरा गर्दै रेनले ‘हुवावेको फाइभ-जी सेवालाई भविष्यमा कसैले पनि चुनौती दिन नसक्ने’ दाबी गरे ।

अमेरिकाले गत बुधबार चिनियाँ दूरसञ्चार कम्पनी हुवावेलाई कालोसूचीमा राखेपछि अमेरिकी कम्पनीले हुवावेसँग व्यापार तथा अन्य सहकार्यका लागि अनुमति आवश्यक पर्छ । उक्त कदमलाई चिनियाँ कम्पनीको अमेरिकामा व्यापार विस्तार रोक्ने अमेरिकी रणनीतिका रूपमा लिइएको छ ।

‘अमेरिकी राजनीतिज्ञको पछिल्लो कदमले हाम्रो शक्तिलाई कमजोर आकेको छ,’ रेनले भने । हुवावेले आफ्नो फाइभ जी सेवासम्बन्धी उत्पादनबारे युरोपेली देशले नकारात्मक प्रतिक्रिया झेलिरहेको छ ।

हुवावेले चिनियँँ सरकारका लागि जासुसी गर्ने अमेरिकी दाबी छ । उक्त आरोपको हुवावेले खण्डन गर्दै ‘आफू चिनियाँ सरकारबाट स्वतन्त्र रहेको’ बताउने गर्छ ।

अमेरिकी कम्पनी गुगलले एन्ड्रोइड अपरेटिङ सिस्टमका आफ्ना केही एप्सहरू हुवावे मोबाइलमा नराख्ने निर्णय गरेको थियो । यद्यपि, अमेरिकाले मंगलबार गुगललाई हुवावेसँग व्यापार गर्न ९० दिनको अनुमति प्रदान गरेको अमेरिकी वाणिज्यमन्त्री विल्बर रोसलाई उद्धृत गर्दै बीबीसीले जनाएको छ ।

यसअघि हुवावेकी प्रमुख वित्तीय अधिकृत तथा उपाध्यक्ष मेङ वाङ्झुलाई अमेरिकाको आग्रहमा क्यानडाले पक्राउ गरेको थियो । मेङ हुवावे संस्थापक रेनकी छोरी हुन् ।

अमेरिका र चीनबीच लामो समयदेखि जारी व्यापार विवाद मेङको पक्राउपछि थप चर्केको छ । अमेरिकाले केही चिनियाँ कम्पनीले आफ्नो बौद्धिक सम्पत्ति तथा प्रविधि चोरेको आरोप लगाउने गर्छ । अमेरिकी बुझाइमा त्यस्ता कम्पनीमा हुवावे पनि पर्छ ।

सोमबार गुगलले गरेको निर्णयसँगै हुवावेले आगामी दिनमा निर्माण गर्ने फोनमा गुगल प्लेस्टोर, गुगल सर्च, गुगल म्याप, गुगल क्रोम, युट्युब, जिमेललगायतका एपहरू राख्न पाउने छैन । तर ३ महिनाका लागि भने त्यो टरेको छ ।

गुगलले ‘अमेरिकी सरकारको निर्देशनअनुसार उक्त कदम चालेको र आशय समीक्षा’ गरिरहेको जनाएको थियो । गुगलको निर्णयपछि हुवावेले ‘एन्ड्रोइडको विकास र विस्तारमा कम्पनीको ठोस योगदान रहेको’ दाबी गर्दै ‘विश्वव्यापी ग्राहकका लागि सुरक्षित र भरपर्दो सफ्टवेयर बनाउने’ जनाएको थियो ।

प्रकाशित : जेष्ठ ८, २०७६ ०८:५८
ADVERTISEMENT
प्रतिक्रिया
पठाउनुहोस्
ADVERTISEMENT

अर्बपतिले तिरिदिए ४ सय विद्यार्थीको ऋण

एजेन्सी

जर्जिया — अमेरिकाको जर्जियास्थित मोरहाउस कलेजमा ग्र्याजुएसन कार्यक्रम चलिरहेको थियो । सोमबारको कार्यक्रममा सम्बोधनका लागि मञ्चमा उत्रेका अमेरिकी अर्बपति रोबर्ट फ्रेडरिक स्मिथको घोषणाले विद्यार्थी चकित परे । 

स्मिथको भाषणले कलेजका ४ सय विद्यार्थीको खुसीको सीमा रहेन् । केही वर्षअघिसम्म अन्जानजस्तै यी धनाढ्यका लागि घोषणाले भने उनी निकै चर्चित भए । ५६ वर्षीय धनाढ्यले शैक्षिक सत्र २०१९ मा कलेज अध्ययनका लागि लिएको ऋण तिरिदिने घोषणा गरेका हुन् । उनले ऋण लिएका विद्यार्थीको करिब ४ करोड अमेरिकी डलर तिरिदिने घोषणा गरेका हुन् ।

स्मिथले आफ्नो सहयोगी प्रयासले ‘भिस्टाले विविधता र उत्कृष्टतालाई जोड दिन सघाउन पुर्‍याउने’ जनाए । उनले ‘बुबा-आमा, हजुरबुबा-हजुरआमा तथा अफ्रिकी अमेरिकीको संघर्ष, साहस र प्रगतिका कारण आफू यो स्थानसम्म आइपुगेको’ बताए ।
अमेरिकाका अश्वेतमध्येका सबैभन्दा धनी स्मिथको व्यक्तिगत सम्पत्ति करिब ५ अर्ब डलर छ । उनी निजी लगानी कम्पनी ‘भिस्टा इक्विटी पार्टनर्स’ का संस्थापक हुन् । सफ्टवेअर कम्पनीको व्यवसायमा केन्द्रित भिस्टा करिब ४६ अर्ब डलरको कम्पनी हो ।

जर्जियाको डेन्भर कोर्लोयाडोस्थित अफ्रिकी अमेरिकीको बाहुल्य क्षेत्रमा हुर्केका स्थिमथका बुबाआमा विद्यालयका शिक्षक थिए । विद्यालयमै हुँदादेखि एक विज्ञान अनुसन्धान कम्पनीमा कामका गरेका स्मिथले कोर्नेल विश्वविद्यालयमा रासायनिक इन्जिनियरिङ पढेका हुन् ।

त्यसलगत्तै कोलम्बिया विश्वविद्यालयबाट एमबीए गरेका स्मिथले ‘गोल्डम्यान स्याक्स’ मा काम गरे । त्यसताका एपल र माइक्रोसफ्टजस्ता सूचना प्रविधि कम्पनीसँग काम गरेका स्मिथले सन् २००० मा भिस्टा कम्पनी खोलेका हुन् ।

सार्वजनिक जीवन खासै नरुचाउने स्मिथ आफ्नी पत्नीसहति टेक्सासमा बस्छन् । यसअघि उनले मोरहाउसको छात्रवृत्ति एवं संस्था विकासका लागि १५ लाख डलर सहयोग गरेका थिए । त्यसैगरी, उनले सन् २०१६ अश्वेत तथा महिला इन्जिनियरिङ विद्यार्थीको सहयोगका लागि कोर्नेल विश्वविद्यालयलाई ५ करोड अमेरिकी डलर दिएका थिए ।

प्रकाशित : जेष्ठ ८, २०७६ ०८:५६
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT