दुबईमा बस दुर्घटना, १७ को मृत्यु 

एजेन्सी

दुबई — संयुक्त अरब इमरेट्सको दुबईमा शुक्रबार भएको एक यात्रुवाहक बस दुर्घटनामा कम्तीमा १७ को मृत्यु भएको छ । दुर्घटनामा केही घाइते छन् । मृतकहरू विभिन्न देशका नागरिक छन् ।

भारतीय अधिकारीले आफ्नो देशका ८ जनाको ज्यान गएको पुष्टि गरेका छन् । दुबईस्थित भारतीय दूतावासले आफ्नो देशका मृतकको नाम सार्वजनिक गरेको छ । उसले मृतकका परिवारसँग सम्पर्क गरेको जनाएको छ ।

दुर्घटनामा परेर घाइते भएका अरू भारतीय नागरिकको उपचार हुँदै छ । अरू मृतकबारे थप जानकारी प्राप्त भएको छैन । अधिकारीका अनुसार ओमानमा दर्ता भएको बसमा ३१ यात्रु सवार थिए । प्रहरीका अनुसार शेख मोहम्मद बिन जाएद रोडमा राखिएको संकेत चिहृनमा बस ठोकिँदा दुर्घटना भएको हो ।

दुर्घटनामा घाइते करिब ५० वर्ष‍ीय बस चालकको उपचार भइरहेको छ । घटनाबारे अनुसन्धान सुरु गरिएको दुबई प्रहरीले जनाएको छ । प्रहरीले सामाजिक सञ्जाल ट्वीटरमा दुर्घटनाबारे दुःख व्यक्त गरेको छ । दुबई प्रहरी प्रमुख मेजर जनरल अब्दुल्लाह खालिफा अल-मार्रीले सवारीसाधन चलाउँदा सानो गल्ती वा लापरबाहीले नराम्रो परिणाम निम्तने बताए ।

स्थानीय सञ्चारमाध्यमका अनुसार सडकमा राखिएको उचाइबारे जानकारी दिने संकेत चिहृन छल्न खोज्दा बसको अर्कोतर्फ हुत्तिएको थियो । त्यस क्रममा बसको छत ध्वस्त भएको जनाइएको छ ।
ओमानी बस कम्पनी म्वासलतले घटनाप्रति दुःख व्यक्त गर्दै मस्कट र दुबईबीचको बस सेवा तत्कालका लागि स्थगित गरेको जनाएको छ ।


प्रकाशित : जेष्ठ २४, २०७६ २०:०२
प्रतिक्रिया
पठाउनुहोस्

दुई अधिकृतसहित चार पक्राउ

कान्तिपुर संवाददाता

काठमाडौँ — अख्तियार दुरुपयोग अनुसन्धान आयोगले इन्जिनियर र प्रहरी अधिकृतसहित चार जनालाई घूस रकमसहित पक्राउ गरेको छ ।

माडी-लुंग्र्री करिडोर सिँचाइ आयोजना, रोल्पाका इन्जिनियर तारा श्रेष्ठलाई योजनाको अन्तिम बिल भुक्तानीका बेला सेवाग्राहीसँग लिएको १ लाख रुपैयाँ घूससहित समातिएको अख्तियारले जनाएको छ ।

अख्तियारले इलाका प्रहरी कार्यालय रन्यौरा, रूपन्देहीका प्रहरी निरीक्षक केशवबहादुर बस्नेतलाई समेत पक्राउ गरेको छ । प्रक्रिया पूरा गरी गैडहवा गाउँपालिकाअन्तर्गत नदीजन्य पदार्थ ढुवानी गरिरहेका सेवाग्राहीसँग लिएको १५ हजार रुपैयाँ घूससहित बस्नेतलाई समातिएको अख्तियारको भनाइ छ ।

मालपोत कार्यालय चाबहिलका नायब सुब्बा चन्द्रबहादुर श्रेष्ठलाई पनि अख्यितारले घूससहित पक्राउ गरेको छ । स्वामित्व विवादका कारण सर्वोच्च अदालतमा विचाराधीन रहेको गोकर्णेश्वर नगरपालिका ४ मा रहेको जग्गाको प्रमाणित मिसिल उपलब्ध गराउन सेवाग्राहीसँग २ हजार रुपैयाँ घूससहित श्रेष्ठ पक्राउ समातिएका थिए ।

सशस्त्र प्रहरी बल, नेपाल नम्बर ११ गण, हजमिनिया रौतहटका जवान अरुण झा पनि पक्राउ परेका छन् । उनले नेपाल-भारत सीमाबाट कस्मेटिक सामान ल्याउन सहज गराइदिने भनी सेवाग्राहीसँग ३० हजार रुपैयाँ घूस लिएको अख्तियारले जनाएको छ । चारै जनालाई हिरासतमा राखी भ्रष्टाचार अभियोगमा छानबिन भइरहेको छ ।


प्रकाशित : जेष्ठ २४, २०७६ १९:५३
पूरा पढ्नुहोस्
प्रतिक्रिया
पठाउनुहोस्