हङकङमा सुपुर्दगी विधेयकको विरोध –'विदेशी शक्तिको हात’

एजेन्सी

हङकङ — चीनले हङकङमा प्रस्तावित सुपुर्दगीसम्बन्धी कानुनको विरोधमा आइतबार गरिएको प्रदर्शनमा विदेशी शक्तिको हात रहेको दाबी गरेको छ । चिनियाँ सरकारी सञ्चारमाध्यमले विदेशी शक्तिले चीनमाथि प्रहार गर्न हङकङमा विध्वंश निम्त्याउने प्रयास गरेको दाबी गरेको छ । 

सुपुर्दगी विधेयकको विरोधमा सोमबार बिहान हङकङमा गरिएको प्रदर्शनमाथि हस्तक्षेप गर्दै प्रहरी । तस्बिर : एपी

चिनियाँ भाषाको सरकारी अखबार ‘ग्लोबल टाइम्स’ ले लेखेको छ, ‘यो निश्चित छ कि केही अन्तर्राष्ट्रिय शक्तिले पछिल्ला महिनामा हङकङसँगको अन्तरक्रिया बढाउँदै लगेका छन् ।’ अखबारको सम्पादकीयमा हङकङका विपक्षी नेता र अमेरिकी विदेशमन्त्री माइक पोम्पियो तथा सभामुख नान्सी पेलोसीबीचको भेटवार्तालाई समेत उल्लेख गरिएको छ । त्यसैगरी अंग्रेजी भाषाको अखबार ‘चाइना डेली’ ले पनि कानुनको समर्थन गरेको छ ।

प्रस्तावित कानुनअनुसार चीनले हङकङस्थित राजनीतिक विपक्षीलाई निसाना बनाउने भन्दै सर्वसाधारणहरू विरोधमा उत्रेका हुन् । प्रदर्शनमा व्यवसायी, कानुनका विद्यार्थी, धार्मिक समूह र प्रजातन्त्र पक्षधरहरूको सहभागिता थियो । सहरका कतिपय स्थानमा सोमबार बिहानैदेखि नै विरोध प्रदर्शन जारी छ । प्रदर्शनकारीलाई भगाउन प्रहरीले पानीको फोहोरा प्रयोग गरेको समाचार संस्था एएफपीले जनाएको छ । कतिपय प्रदर्शनकारीलाई प्रहरीले लछारपछार पारेको सामाजिक सञ्जालमा सार्वजनिक तस्बिर तथा दृश्यहरूमा देखिएको छ ।

हङकङकी प्रमुख कार्यकारी क्यारी लामले विरोधका बाबजुद सुपुर्दगी विधेयक फिर्ता नहुने बताएकी छन् । संवाददाताहरूसँग सोमबार कुराकानी गर्दै लामले ‘देशको आवश्यकताअनुसार नै कानुन ल्याइएको’ दाबी गरिन् । उनले हङकङमा मानवाधिकार रक्षा हुनेमा कसैले शंका गर्नु नपर्ने बताइन् ।

आइतबार सेतो पोसाकमा सडकमा उत्रेका लाखौं मानिस घण्टौं लामो प्रदर्शनमा उत्रेका थिए । विरोधका क्रममा प्रहरी र प्रदशर्नकारीबीच हिंसात्मक झडप हुँदा दर्जनौं घाइते भए ।

मुकुन्डो लगाएका कतिपय प्रदर्शनकारी प्रहरीले खडा गरेको अवरोध पन्छाएर विधान परिषदको भवनमा प्रवेश गर्न खोजेपछि झडप भएको हो । बीबीसीका अनुसार झडपका क्रममा एक पत्रकारसहित ३ अधिकारी घाइते छन् । हङकङका प्रहरी प्रमुखले ‘शान्तिपूर्ण प्रदर्शन हुने देशको परम्परा तोडिएको’ दाबी गरे ।

हङकङको स्वतन्त्रतापछिकै ठूलो मानिएको प्रदर्शनमा १० लाख सहभागी भएको आयोजकको दाबी छ । तर प्रहरीले २ लाख ४० हजार सहभागी भएको दाबी गरेका छ । आयोजकहरूले बुधबार फेरि अर्को विरोध प्रदर्शन गरिने जनाएका छन् । सुपुर्दगीसम्बन्धी प्रस्तावित कानुनको प्रावधानअनुसार हङकङमा अपराध तथा बलात्कारमा आरोपीलाई चीन, ताइवान र मकाउका अधिकारीले सुपुर्दगीका लागि आग्रह गर्न सक्छन् । तर सुपुर्दगी गर्ने/नगर्ने घटनाको प्रकृतिका आधारमा निर्णय लिइने जनाइएको छ ।

हङकङका १९ वर्षीय युवाले गर्भवती प्रेमिकाको ताइवानमा हत्या गरी देश फर्केपछि सुपुर्दगी कानुनबारे बहस सुरु भएको हो । ताइवानी अधिकारीले ती युवकलाई सुम्पन हङकङसँग आग्रह गरे पनि कानुनी जटिलता देखिएको थियो । सन् १९९७ मा बेलायतबाट स्वतन्त्र भएयाता हङकङ ‘एक देश दुई व्यवस्था’ अन्तर्गत अर्ध–शासित छ ।

प्रकाशित : जेष्ठ २८, २०७६ ०९:०७
ADVERTISEMENT
प्रतिक्रिया
पठाउनुहोस्
ADVERTISEMENT

न्युजिल्यान्डमा सगरमाथा दिवस

नारायण खडका

अस्ट्रेलिया — न्युजिल्यान्डको संसद् भवनमा पहिलोपटक सगरमाथा दिवस मनाइएको छ । न्युजिल्यान्डका नागरिक सर एडमन्ड हिलारी र नेपाली तेन्जिङ नोर्गे शेर्पाले सगरमाथामा पहिलो पाइला राखेको सम्झना स्वरूप हरेक वर्ष न्युजिल्यान्डमा ‘एभरेस्ट डे’ मनाइने गरिन्छ ।


संसद् भवनमा आयोजना गरिएको कार्यक्रममा न्युजिल्यान्डका मन्त्री, सांसदहरूका साथै एडमन्ड हिलारीकी श्रीमतीको समेत उपस्थिति रहेको थियो ।

कार्यक्रममा इथ्निक मन्त्री जेनी सालेसा, अन्डर सेक्रेटरी माइकल उड, सांसदहरू डङन वेब, मेलिसा ली, सिमिओन ब्राउन, प्रियंका राधाकृष्णनका साथै न्युजिल्यान्डमा रहेका नेपाली समुदायका प्रतिनिधिहरूको सहभागिता थियो । हरेक वर्ष प्रवासी नेपालीको संगठन एनआरएनले यो दिवस मनाउने गरेको भए पनि यस वर्ष नेप्लिज सोसाइटी अफ वेलिङटनको सक्रियतामा संसद् भवनमै पहिलोपटक आयोजना गरिएको आयोजक संस्थाका अध्यक्ष रमिल अधिकारीले जानकारी दिए ।

कार्यक्रममा एडमन्ड हिलारीकी श्रीमती जुन हिलारीको उपस्थितिले कार्यक्रमलाई अझ रोचक बनाएको थियो । प्रायः सबै नेपाली कार्यक्रममा उपस्थिति जनाउने उनले नेपाल आफूलाई दोस्रो घर लाग्ने बताउँदै कार्यक्रम गरेकोमा आयोजकलाई धन्यवाद दिएकी थिइन् । कार्यक्रममा मन्त्री सालेसाले सगरमाथाको देशमा जन्मिएका नेपालीहरू भाग्यमानी भएको बताउँदै यस्ता कार्यक्रमले नेपाल र नेपालीको सम्बन्धलाई अझ प्रगाढ बनाउने बताएकी थिइन् ।

कार्यक्रममा नेपाल र न्युजिल्यान्डका साथै अन्य देशका व्यक्तिहरूले समेत सहभागिता जनाएका थिए । न्युजिल्यान्ड नेपाल सोसाइटीका अध्यक्ष दिनेश खडकाले यस कार्यक्रमले न्युजिल्यान्डमा नेपालीहरूको पहिचानलाई अझ फराकिलो बनाउनुका साथै नेपालको पर्यटन प्रवर्द्धनसमेत हुने बताए ।

प्रकाशित : जेष्ठ २८, २०७६ ०९:०६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT