भारतले अमेरिकी सामानमा कर बढायो

एएफपी

नयाँदिल्ली — भारतले आफ्नो देशमा भित्रने विभिन्न अमेरिकी सामानमा करवृद्धि गरेको छ । अमेरिकाले भारतलाई दिइआएको व्यापार सुविधा कटौती गरेको बदलामा २८ किसिमका सामानमा कर लगाइएको भारतीय अधिकारीहरूले जनाएका छन् ।

भारतीय केन्द्रीय राजस्व तथा भन्सार बोर्डका अनुसार अमेरिकाबाट आयात हुने बदाम, स्याउ र ओखरलगायत सामानमा करवृद्धि गरिएको हो । ओबामा प्रशासनमा निकै राम्रो सम्बन्ध रहेका भारत र अमेरिकाबीच पछिल्लो समय एकअर्काविरुद्ध करवृद्धि गरेका छन् ।

अमेरिकी राष्ट्रपति डोनाल्ड ट्रम्पले अमेरिकी सामानलाई भारतीय बजारमा सहज पहुँच नभएको र भारतले कृषिलगायत क्षेत्रमा ठूलो मात्रामा अनुदान दिएर प्रतिस्पर्धी क्षमता कमजोर पारेको आरोप लगाउँदै आएका छन् ।

भारतले अमेरिकी सामानमा १२० प्रतिशतसम्म करवृद्धि गरेको छ । आगामी जुन २८ र २९ मा जापानको ओसाकामा हुने २० औद्योगिक राष्ट्रहरूको सम्मेलनका क्रममा पनि करवृद्धिबारे भारत र अमेरिकी नेताबीच छलफल हुने अनुमानगरिएको छ ।

सरकारी तथ्यांकअनुसार भारतसँग अमेरिकी वस्तु तथा सेवाको व्यापार सन् २०१८ मा करिब १ खर्ब ४२ अर्ब अमेरिकी डलर बराबर भएको थियो । भारतसँग अमेरिकी व्यापार घाटा करिब २४ अर्ब अमेरिकी डलर छ ।

प्रकाशित : असार २, २०७६ ०९:००
ADVERTISEMENT
ADVERTISEMENT
प्रतिक्रिया
पठाउनुहोस्

गर्मी बढेपछि चितवनका ६ स्थानीय तहमा तीन दिन स्कुल बिदा

रमेशकुमार पौडेल

चितवन — गर्मी बढेसँगै चितवनका सातमध्ये ६ वटा स्थानीय तहले तीन दिन स्कुल विदा गरेका छन् । भरतपुर महानगरपालिकासहित राप्ती, खैरहनी, कालिका, रत्ननगर र माडी नगरपालिकामा सोमबारदेखि बुधबारसम्म सबै स्कुलहरु बन्द हुने छन् । 

जिल्लाको एक मात्र गाउँपालिका इच्छाकामना पहाडी क्षेत्रमा पर्ने भएका कारण गर्मी विदा भएको छैन ।

गाउँपालिका अध्यक्ष गीता गुरुङ पहाडी क्षेत्र भएका कारण गर्मीको चर्को समस्या नभएको हुँदा इच्छाकामाना गाउँपालिकाले विद्यालय बन्द नगरेको बताउँछिन् । जिल्लाको मैदानी क्षेत्रमा भने जेठको अन्तिमदेखि चर्को गर्मी सुरु भएको थियो । गर्मी अत्याधिक बढेका कारण वर्षे विदाबाट कटौती हुने गरेर महानगरभित्रका विद्यालयमा तीन दिन विदा दिएको भरतपुर महानगरका प्रमुख प्रशासकीय अधिकृत नेत्रप्रसाद सुवेदीले बताए ।

स्कुल विदाको घोषणा भएसँगै आइतबार दिउँसो चितवनमा पानी परेको थियो । ‘पानी पर्दा शितल भए पनि पानी रोकिएपछि गर्मी हुने नै गरेको छ । यस्तो बेलामा स्कुल चलाउँदा बालबालिकालाई असर पर्न सक्छ । विदा घोषणा भएपछि पानी त आयो तर गर्मी उस्तै छ । त्यसैले विदा कायमै छ’ रत्ननगर नगरपालिकाका मेयर नारायण वनले भने ।

गर्मी नघटेमा तीन दिनपछि पनि विदा बढ्न सक्ने मेयर वनले बताए । गर्मीले सवैभन्दा बढी माडी क्षेत्र प्रताडित हुने गरेको छ । माडीमा पनि सोमबारदेखि तीन दिन विद्यालय बिदा भएको उमपेयर ताराकाजी महतोले बताइन् । गर्मी विदाका कारण माडीमा असार १२ गतेबाट हुने पहिलो त्रमासिक परीक्षा १५ गतेबाट सुरु हुने नगरस्तरीय परीक्षा समितिका सचिव रामप्रसाद भण्डारीले बताए ।

राप्ती र कालिका नगरपालिकाकका केही वडा पहाडी क्षेत्रहरुमा पनि पर्दछन् । तर नगरपालिकाको सवै क्षेत्रमा गर्मी विदा दिएको राप्ती नगरपालिकाकी मेयर प्रभा बरालले बताइन् । चितवनमा पछिल्ला दिनहरुमा तापक्रम ३८ डिग्रीको हाराहारीमा पुग्ने गरेका कारण विद्यार्थीलाई असर गरेको थियो । अचेल चितवनका अधिकांश विद्यालयमा दिउँसो नै पढाइ हुने गरेको छ ।

प्रकाशित : असार २, २०७६ ०८:५९
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT