बेलायती राजदूतले दिए राजीनामा

(एएफपी)

लन्डन — अमेरिकाका लागि बेलायती राजदूत सर किम ड्यारोकले राजीनामा दिएका छन् । उनको ईमेल चुहावटपछि अमेरिकी राष्ट्रपति डोनाल्ड ट्रम्पसँग तिक्तता बढेकै बेला यो राजीनामा आएको हो ।

सर किमले ट्रम्पलाई ‘अयोग्य र असफल’ भएको टिप्पणी गरेको सार्वजनिक भएपछि विवाद चुलिएको थियो ।

बेलायती विदेश मन्त्रालयका अधिकारीलाई बुझाएको राजीनामा पत्रमा किमले ट्रम्पसँगको सम्बन्ध सुधार्न ‘असम्भव’ देखेर आफूले राजीनामा दिएको उल्लेख गरेका छन् । ‘सम्बन्ध सुधार र बेलायती चासोबारे पटक–पटक बुझाउने प्रयास गरे पनि सफल हुन सकिनँ’ उनले राजीनामा पत्रमा लेखेका छन, ‘मैले आफ्नो भूमिका राम्रोसँग निर्वाह गर्न अहिले असम्भवजस्तै भएको छ, त्यसैले मैले पदीय जिम्मेवारी त्याग्ने निर्णय गरेको छु ।’

बेलायत र अमेरिकाबीचको परिस्थितिलाई सहज बनाउन नयाँ राजदूतबाट सजिलो हुने विश्वासमा पनि आफूले राजीनामा दिएको बताए । उनले राजीनामाबारे प्रधानमन्त्री टेरेजा मेले संसद्मा जानकारी पनि दिइसकेको र राम्रो जिम्मेवारी निर्वाह गरेको भन्दै प्रमबाट धन्यवादसमेत पाइसकेको बताए । ट्रम्पको आलोचना गरेको किमको इमेल केही दिन अगाडि सार्वजनिक भएको थियो । इमेल सार्वजनिक भएसँगै ट्रम्पले पनि राजदूतकिमको आलोचना गरेका थिए ।

राष्ट्रपति ट्रम्पले राजदूत सर किमसँग ‘व्यवहारै नगर्ने’ भनेका थिए । बेलायतले भने आफ्नो राजदूतप्रति ‘प्रधानमन्त्रीको पूर्ण समर्थन रहेको’ प्रतिक्रिया मंगलबार दोहराएको थियो । ‘डाउनिङ स्ट्रिट’ ले आफ्ना राजदूत सर किमप्रति ‘पूर्ण समर्थन’ रहेको भनेको थियो । सर किमको ईमेल चुहावटपछि बेलायती सरकारले यसबारे जाँचको आदेश दिएको थियो ।

‘बीबीसी’ का कूटनीतिक संवाददाता जेम्स लेन्डनका अनुसार ट्रम्पले सर किमप्रति जुन प्रतिक्रिया व्यक्त गरे, त्यो आफ्नो मुलुकबाट विदेशी कूटनीतिकलाई देशबाहिर पठाउने औपचारिक कानुनी प्रक्रिया नै हो । राष्ट्रपति ट्रम्पले आफ्नो टीटमा जुन शब्दको प्रयोग गरेका थिए, त्यसले सर किमलाई बेलायत फिर्ता हुने भनेको विश्लेषण गरिएको थियो ।

प्रकाशित : असार २६, २०७६ ०९:३१
प्रतिक्रिया
पठाउनुहोस्

महिला विश्वकप, महिला प्रशिक्षक

प्रतियोगितामा सहभागी २४ मध्ये ९ टिमका प्रशिक्षकमात्र महिला थिए । सुखद संयोग के भने यसपल्ट तिनै टिममध्ये दुई फाइनल पुगेका छन् । 
(एएफपी)

लियोन — महिला विश्वकप फुटबलको इतिहासमा यस्तो भएको दोस्रोपल्ट मात्र हो । जति बेला अमेरिका र नेदरल्यान्ड्सबीच यसपालिको महिला विश्वकप फाइनल हुनेछ, बेन्चमा दुवै प्रशिक्षक महिला नै हुनेछन् । नेदरल्यान्ड्सका लागि सरिना वेगमन, डिफेन्डिङ च्याम्पियन अमेरिकाका लागि भने जिल एलिस । प्रतियोगितामा सहभागी २४ टिममध्ये ९ टिमका प्रशिक्षकमात्र महिला थिए । सुखद संयोग के भने यसपल्ट तिनै टिममध्येका दुई फाइनल पुगे ।

सन् २००३ यता मात्र यस्तो सुखद संयोग जुरेको हो । चार वर्षअघि ५२ वर्षीया एलिसकै नेतृत्वमा अमेरिकाले क्यानडामा भएको विश्वकप जितेको थियो । यस्तोमा उनी विश्वकप इतिहासमै लगातार उपाधि जित्ने विश्वकप जित्ने प्रशिक्षक पनि हुनसक्छन् । पुरुष फुटबलमा पनि यस्तो उपलब्धि सन् १९३० तिर इटालीका भिटोरियो पोजोले हात पारेका थिए । वेगमन पनि आफ्नो टिमले जितेको उपाधिका अर्को उपाधि थप्न चाहन्छन् ।

उनको नेतृत्वमा नेदरल्यान्ड्सले पनि सन् २०१७ मा युरोपेली च्याम्पियनसिप जितेको थियो । एलिसका लागि भने उनले अहिलेसम्म जति सफलता हात पारेकी छन्, ती आफैंमा अद्वितीय छन् । उनले लामो समय भयो, फुटबलको करिअरमा समय बिताएको । कुनै प्रकारको सम्झौता नगर्ने उनको व्यवस्थापन शैलीकै कारण अमेरिका पछिल्लो विश्वकपमा विजयी रहेको थियो । त्यतिमात्र होइन, अमेरिका विश्वकपको फाइनल पुगेको पनि यो लगातार तेस्रोपल्ट हो ।

सन् २०१४ मा प्रशिक्षक हुनुअगाडि एलिसले अमेरिकी महिला फुटबलमा धेरै प्रकारको भूमिका निभाइसकेकी थिइन् । उनले त्यो देशको फुटबलका लागि धेरै काम गरिन्, जसले उनलाई धेरै मौका पनि दियो । शाही नाबिक कमान्डरका छोरी एलिस दक्षिण इंग्ल्यान्डको पोर्टसमाउथमा जन्मेहुर्केकी हुन् । त्यति बेला पनि फुटबल निकै लोकप्रिय खेल त थियो, तर यसलाई खाली पुरुषको खेलका रूपमा मात्र लिइन्थ्यो ।

किशोरी छँदै उनी अमेरिका पुगिन् । ‘इंग्ल्यान्डमा मैले फुटबल खेल्ने अवसर नै पाइनँ । तर अमेरिकाले मलाई फुटबलमा सबै सम्भावना दियो,’ उनले भनिन् । उनको यो भनाइ त्यति बेला आएको जति बेला सेमिफाइनलमा अमेरिकाले इंग्ल्यान्डलाई नै हराएको थियो । म्यानचेस्टर युनाइटेडकी समर्थक रहेकी उनी भन्छिन्, ‘मभित्र फुटबलको संस्कृति हुनुको कारण इंग्ल्यान्डमा जन्म लिनुले पनि हो । त्यसैका लागि अनुग्रहित छु । सायद इंग्ल्यान्डमा नजन्मेको भए, यस्तो हुने थिएन ।’

उनको स्वरमा अझै बेलायती लवज पाइन्छ । तर दाबी गर्छिन्, ‘अब त म शतप्रतिशत अमरिकी नै हुँ ।’ उनको टिम विश्वकप उपाधिलाई सबैभन्दा बलियो प्रत्याशी हो । उनको बाटोमा त्यस्ती महिला प्रशिक्षक छिन्, जसले सन् ८० को दशकतिर कलेजमा फुटबल सिकेकी थिइन् । वेगमनले तीन दशकअगाडि नर्थ क्यारोलिना विश्वविद्यालयमा फुटबल सिकेकी थिइन् । ‘म त्यो विश्वविद्यालयमा के गएकी थिएँ, मेरो जीवन नै फेरियो,’ उनी भन्छिन् ।

त्यसअघि सानो छँदा उनी हेगतिर थिइन् । कपाल छोटो हुने गर्थ्यो र उनी केटा साथीसँग फुटबल खेल्थिन् । पछि नेदरल्यान्ड्सकै लागि फुटबल खेलिन् र यसक्रममा १०० क्याप जित्ने पहिलो महिला खेलाडी बनिन् । तर उनको समयमा डच महिला फुटबल राम्रो स्थितिमा थिएन । २००७ तिर मात्र आएर हो, उनले फुटबललाई आफ्नो पूर्णकालीन पेसा बनाएको । २०१४ मा उनी डच टिमको सहायक प्रशिक्षक बनिन्, २०१७ मा भने प्रमुख प्रशिक्षक ।

उनको नेतृत्वमा नेदरल्यान्ड्सले १२ ठूला प्रतियोगिता खेलिसकेको छ । पछिल्लो समय टिमको कडा मिहिनेत र संघर्ष गर्ने गुण गज्जब छ । उनी भन्छिन्, ‘अमेरिकी र हाम्रो फुटबल संस्कृति नै फरक छ । नेदरल्यान्ड्समा फुटबल खेल जीवनका लागि महिलाले संघर्ष नै गर्नुपर्ने हुन्छ, नाम कमाउन त अब्बल दर्जाको फुटबल नै खेल्नुपर्छ ।’ उनले डच फुटबलमा आफ्नो स्थान बनाउन यही काम गरेकी छिन् । त्यसैले आइतबारको फाइनल खुबै हेर्नलायक हुनेछ । यो हुनेछ दुई महिला प्रशिक्षकको भिडन्त ।

महिला विश्वकपको पूर्व विजेता
वर्ष टिम
१९९१ अमेरिका
१९९५ नर्वे
१९९९ अमेरिका
२००३ जर्मनी
२००७ जर्मनी
२०११ जापान
२०१५ अमेरिका
२०१९ ?

प्रकाशित : असार २२, २०७६ १०:१५
पूरा पढ्नुहोस्
प्रतिक्रिया
पठाउनुहोस्