शीतलनिवास अर्थात् राष्ट्रपति भवनमा जनताका सन्तति पुगेका छन् । यो सानो दुःखले आर्जिएको गणतन्त्र होइन । दुर्गानन्द झा र रामराजाप्रसाद सिंह जस्ताहरूको स्वप्न, समर्पण र संघर्षको परिणति हो । ज्यान र जग्गा सर्वस्वहरण हुँदासमेत अविचल अडानको भाग्यफल हो । गणतन्त्र कसैले चाँदीको थालीमा पस्किएर दिएको होइन । कोही एक्लोको आर्जन पनि होइन । कैयौं पुस्ताको बलिदानले गणतन्त्र सम्भव भएको हो । यो नेपाली जनताको स्वनिर्णयको उच्चतम अभिव्यक्ति थियो ।
