अरुण खोलामा एकतर्फी यातायात खुल्यो

खोलामा पानीको सतह घटेका कारण एकोहोरो यातायात संचालन गर्न सम्भव भएसँगै अवरुद्ध राजमार्ग एकतर्फी रुपमा संचालनमा आएको जिल्ला ट्राफिक प्रहरीले जानकारी दिएको छ ।

हयूमपाइप राखेर बनाइएको डाइभर्सनको माथिल्लो भाग बगाएपछि आइतबार साँझ ५ बजेदेखि यातायात अवरुद्ध भएको थियो । वर्षा रोकिएको र खोलामा पानीको सतह घटेका कारण गाडी खोलैखोल आउजाउ गर्न शुरु गरेका हुन् ।

६ दिन अघि अरुण खोला पुलमा गाडी ठोक्किएका कारण पुल भाँचिएपछि ३ दिन लगाएर वैपल्पिक सडक बनाएर आवगमन खुलाइएको थियो । हयूमपाइप राजमार्ग अवरुद्ध हुँदा पूर्व–पश्चिम हिँडेका हजारौं यात्रु अलपत्र परेका थिए ।