इण्डो–नेपाल ट्वान्टी २० क्रिकेट :  उपाधिका लागि मधेस प्रदेश र कोलकाता भिड्ने

जितको लागि लखनउले दिएको १४८ रनको लक्ष्य मधेस प्रदेशले १९.४ ओभरमा आठ विकेट गुमाउँदै पूरा गर्‍यो । मधेसलाई जित्न अन्तिम ओभरमा ११ रनको आवश्यकता थियो । अन्तिम ओभरको पहिलो बलमा प्रदीप पासवान रन आउट भए । दोस्रो बलमा अभिषेक तिवारीले रन जोड्न सकेनन् । तेस्रो र चौथो बलमा तिवारीले लगातार दुई छक्का प्रहार गर्दै मधेसलाई महत्त्वपूर्ण जित दिलाए ।

मधेसका लागि तिवारीले अविजित १४ बलमा २३ रन बनाए । उनले दुई चौका र दुई छक्का प्रहार गरेका थिए । यस्तै रोहन बिकले ५० बलमा ८३ रन बनाए । उनले ६ चौका र ६ छक्का प्रहार गरे । उनकै महत्त्वपूर्ण पारीले मधेसले बलियो टोली लखनउलाई पराजित गर्न सफल भयो । मधेसका अन्य ब्याटरले भने राम्रो प्रदर्शन गर्न सकेनन् ।

लखनउका लागि प्रिन्स शाहीले चार ओभरमा १६ रन खर्चिएर पाँच विकेट लिए पनि टिमलाई जिताउन सकेनन् । मोहम्मद सरिम र कार्तिक यादवले समान १ विकेट लिए । पहिले ब्याटिङ गरेको लखनउले आठ विकेटको क्षतिमा १४७ रन बनाएको थियो । लखनउका लागि सन्दीप मितलले २६ बलमा ३६ रन, निखिल रावले २२ बलमा २३ रन बनाए ।

मधेसका लागि भुलन सहनीले चार ओभरमा १५ रन खर्चिदै तीन विकेट लिए । विशाल पटेल र अभिषेक तिवारीले समान एक एक विकेट लिए । खेलमा महत्त्वपूर्ण पारी खेलेका मधेशका रोहन बिकप्लेयर अफ दि म्याच घोषित भए । लिग चरणमा लखनउसँग पराजित भएको मधेस चौथो स्थानमा रहेर सेमिफाइनलमा पुगेको थियो । लखनउ शीर्ष स्थानमा रहेर सेमिफाइनलमा स्थान बनाएको थियो ।

यस्तै शुक्रबार नै भएको दोस्रो सेमिफाइनल खेलमा सुदूरपश्चिम प्रदेशलाई ७ विकेटले पराजित गर्दै अर्को भारतीय टोली तालतला इन्स्टिटाइट कोलकाताले उपाधिका लागि मधेससँगको भिडन्त पक्का गरेको छ । सुदूरपश्चिमले दिएको १४५ रनको लक्ष्य कोलकाताले १५.३ ओभरमा ३ विकेट गुमाउँदै १५० रन बनाएर जित हासिल गर्‍यो ।

कोलकातालाई सहज जित दिलाउन विकास चौधरीले ७१ रनको विस्फोटक पारी खेले । उनले ४२ बलमा पाँच छक्का र ६ चौकाको मद्दतमा ७१ रन बनाए । रमन कदयनले ३७ बलमा तीन छक्का र सात चौका प्रहरी गर्दै ६० रन बनाए । कुनाल नगरले ६ बलमा १३ रन बनाए । सुदूरपश्चिमका लागि नरेन साउदले चार ओभरमा ३७ रन खर्चिँदै दुई विकेट लिए । दीपक बोहोराले चार ओभरमा ३८ रन खर्चिएर एक विकेट लिए ।

पहिले ब्याटिङ गरेको सुदूरपश्चिम प्रदेश १४४ रनमा अलआउट भएको थियो । सुदूरपश्चिमका लागि खडक बोहोराले सर्वाधिक ५८ रन बनाए । उनले ४३ बलमा १ छक्का र ६ चौका प्रहार गरे । बसन्त कार्कीले १९ बलमा ३४, दीपक बोहोराले १३ बलमा १५ रन बनाए ।

मधेसलाई अलआउट गर्न कोलकाताका सन्दीप गुप्ताले तीन ओभरमा १६ रन खर्चिँदै महत्त्वपूर्ण चार विकेट लिए । सौरभ यादवले चार ओभरमा २१ रन खर्चिँदै तीन विकेट लिए । अभिषेक सिंह, प्रशान्त र मिलन यादवले समान एक विकेट लिए ।

खेलमा कोलकाताका विकास चौधरी प्लेयर अफ दि म्याच घोषित भए । लिग चरणमा सुदूरपश्चिम प्रदेशले कोलकातालाई पराजित गर्दै प्रतियोगितामा दोस्रो स्थानमा उक्लिदै सेमिफाइनल पुगेको थियो ।

प्रतियोगिताको फाइनल खेल शनिबार हुनेछ ।