नक्कली नेपाली नोट फेला
स्याङ्जा — पुतलीबजार नगरपालिकास्थित नेपाली एक हजारको नक्कली नोट फेला परेको छ । यहाँको जयजनता बहुउदेश्यीय सहकारी संस्थाले बजारमा दैनिक बचतकर्ताबाट मंगलबार संकलन गरेको रकममा नक्कली नोट फेला परेको हो ।
सहकारीले गण्डकी विकास बैंकमा जम्मा गर्ने क्रममा नोट नक्कली भएको पुष्टि भएको बैकका प्रबन्धक प्रवीण श्रेष्ठले बताए । फेला परेका ४ वटै नोट एकै नम्बर च २५–६१४१६३ रहेका छन् ।
सहकारीका बचतकर्ताले पुतलीखेत, घुम्ती र मुख्य बजारबाट संकलन गरेको रकममा नोट फेला परेको सहकारीका अध्यक्ष संघ ताम्राकारले जानकारी दिए । गर्भनर युवराज खतिवडाको हस्ताक्षर रहेको नक्कली नोटमा छपाई, रङ् र विभिन्न चिह्नमा फरक रहेको छ । बजारको सबै क्षेत्रबाट नक्कली हजारको नोट फेला परेपछि बजारमा धेरै नक्कली नोट हुन सक्ने अनुमान स्थानीयले गरेका छन् ।
नोटलाई विधि विज्ञान प्रयोगशालाबाट परीक्षण गर्ने र गिरोहको खोजी गर्ने बताइएको छ ।
प्रकाशित : वैशाख १२, २०७५ १८:३५