पहिलाभन्दा फरक प्रकृतिमा प्रत्यक्ष प्रसारण गरेर सुरु गरिएको कांग्रेस केन्द्रीय समितिको पछिल्लो बैठकबारे विभिन्न कोणबाट बहस भइरहेको छ । कसले कसलाई खुइल्यायो, को शक्तिशाली भयो र को कमजोर देखियोजस्ता विषयमा चोक र गल्लीहरूमा चियाचर्चाहरू भए । तर त्यहाँभित्र खास गरी कांग्रेसका पदाधिकारी नरहेका युवा या जुझारु मानिने उल्लेख्य सदस्यहरूले गम्भीर रूपमा उठाएको एउटा विषय निर्वाचन प्रणाली हो ।
नयाँ संविधान अन्तर्गत पहिलो चरणमा चुनिएर आएका स्थानीय तहहरूले ५ वर्षको कार्यकाल पूरा गर्दैगर्दा नेपालमा कस्तो निर्वाचन प्रणाली उचित हुने भन्ने बहसले फेरि एक पटक लय लिएको छ । निर्वाचनको बहसमा खास गरी संघीय र प्रदेशको उदाहरण आउने भए पनि जनतासँग प्रत्यक्ष जोडिएको स्थानीय तह उत्तिकै महत्त्वपूर्ण छ । वडा तह निर्वाचनमा कम्तीमा १५ लाखदेखि १८ लाख रुपैयाँसम्म अनुमानित खर्च भएको विगतका कारण कतिपयले अब कसरी निर्वाचनमा जाने भनेर चिन्ता प्रकट गर्ने र निकटस्थबीच कानेखुसी गर्ने गरेको पाइन्छ ।
