इतिहास लिपिबद्ध नै हुन्छ भन्ने छैन । पुराना घटना तथा पात्र जुगौंजुगसम्म रहेका कैयौं उदाहरण छन् । राजा वीरेन्द्र शाहको सम्झना पनि नेपाली लगायत उहाँका समीपमा भएका विदेशीहरूले बारम्बार गर्छन् ।
नेपालको राजनीतिक हिसाबकिताबमा राजसंस्थाको महत्त्व कसैले नकार्नै सक्दैन । त्यसमा पनि प्रजातान्त्रिक राजनीतिक निकास तथा विकासमा राजा वीरेन्द्र शाहको भूमिका महत्त्वपूर्ण छ ।
आज जेठ १९ गते, राजा वीरेन्द्रको अकल्पनीय अस्त भएको दिन । नारायणहिटी दरबार हत्याकाण्डका बारे मलाई धेरैले सोधिरहन्छन् । त्यस्तो बेला एक मनले भन्छ, कति बयान दिइरहनु, कति एउटै कुरा दोहोर्याइरहनु, अब त रोक्नुपर्छ; अर्कोले मनले भन्छ, २०५८ पछि जन्मिएको पुस्तालाई राजा वीरेन्द्रबारे मैले जाने–बुझेको सुनाउनैपर्छ । अनि फेरि कलम–कापी समाउने गर्छु ।
