होचा सागरको सर्वोच्च शिखर चुम्ने लक्ष्य

वसन्तकालीन सिजनमा चुचुरोमा पुग्ने सागरको लक्ष्य सफल भएको खण्डमा उनले सगरमाथा आरोहण गर्ने विश्वकै होचो मान्छेको कीर्तिमान कायमसमेत गर्नेछन् । होचापुड्का संघ काठमाडौंमा आबद्ध ३० वर्षीय सागरले आरोहणका लागि आइतबार लुक्लातर्फ जाने बताएका छन् । ‘पत्रकार सम्मेलन गरेर मेरो अभियानबारे जानकारी गराएँ,’ सुनारले भने, ‘दुई/तीन दिनमा पर्यटन विभागबाट आरोहण अनुमति लिने काम सकिन्छ । त्यसपछि आइतबार खुम्बुतर्फ लाग्नेछु ।’

सगरमाथा आरोहणका लागि यो उनको दोस्रो प्रयास हो । एक वर्षअघि चौथो शिविरसम्म पुगेका उनी खराब मौसमका कारण फर्कन बाध्य भएका थिए । आरोहणका क्रममा उनी ७ हजार ९ सय ५० मिटर उचाइमा रहेको चौथो शिविरसम्म पुगेका थिए । ‘गतवर्ष मौसमले साथ नदिएपछि चौथो शिविरबाटै फर्किएँ,’ सुनका गहना बनाउने पेसाबाट हाल पर्वतारोहण क्षेत्रमा आएका उनले भने । त्यतिबेला उनले होचापुड्कामाथि हुने सामाजिक विभेदविरुद्ध र जलवायु परिवर्तनको असरबारे जागरण फैलाउने उद्देश्यले सगरमाथा आरोहणको अनुमति पाएका थिए ।

आरोहण अभियानका लागि खर्च हुने करिब ८५ लाख रुपैयाँ जुटाउन सागरले सहयोग संकलनसमेत गरिरहेका छन् । रकम जुटाउन उनलाई दिदी उर्मिलाले सघाइरहेकी छन् । बुकिङ वान प्रालिको व्यवस्थापनमा आरोहण गर्न लागेका सागरका गाइड नरविन मगर छन् ।

सम्बन्धित समाचार

• सगरमाथा आरोहण गर्दै सागर