प्रधानमन्त्रीको सकस

माओवादी पार्टीबाट उपराष्ट्रपति बनेका नन्दबहादुर पुनका छोराहरू सुन काण्डमा जोडिएका छन् । उनीहरूमाथि कसरी अनुसन्धान र कारबाही हुने हो ! प्रधानमन्त्रीका विश्वास पात्र नारायणकाजी श्रेष्ठ जति पटक माओवादी सरकारमा सहभागी हुन्छ, मन्त्री बनिहाल्छन् । उनले जनताको नजरमा उपलब्धिमूलक काम खासै गर्न सकेका छ्रैनन् ।

भुटानी शरणार्थी प्रकरण, मिटरब्याजपीडितको समस्या, सहकारीपीडितलाई न्याय वा ललिता निवास जग्गा प्रकरणमा उनले बोलेका कुरा पूरा भएनन् । गृहमन्त्री रवि लामिछाने सहकारीको रकम अपचलनका कारण विवादित छन् । आफ्नो मुद्दाको टुङ्गो नलाग्दै गृहमन्त्री पदमा बस्नु कति सम्मको नैतिकता हो ? उनलाई गृहमन्त्री बनाउन प्रधानमन्त्री दाहाललाई कुन नैतिकताले दियो ।

जनतालाई सरकारको अनुभूति दिने गरी काम गर्न सक्षम र विवादरहित व्यक्ति पाउन नसकेकै हुन् त प्रधानमन्त्रीले ? एमालेबाट पनि विगतमा मन्त्री भएकालाई नै दोहोर्‍याइएको छ । यस्तो अवस्थामा प्रधानमन्त्री दाहाललाई जनताको पक्षमा काम गरेर देखाउन र आफूलाई प्रधानमन्त्रीका रूपमा सफल पार्न फलामको चिउरा चपाउनुसरह हुनेछ ।
– भगवान पुडासैनी, जोरपाटी, काठमाडौं