पिकासोको नक्कल

कान्तिपुर संवाददाता

काठमाडौँ — चित्र कोर्नेहरू हरेकको सपना हुन्छ, पाब्लो पिकासो जस्तै प्रख्यात बन्ने । १८ औं शताब्दीका यी विश्वविख्यात चित्रकारलाई पच्छयाउने आधुनिक पुस्ताका नेपाली चित्रकाहरू थुप्रै छन् ।

तीमध्ये एक हुन्, ललितकलामा स्नातकोत्तर गरेका उपकार घमाल । उनी पिकासोका जबर्जस्त फयान हुन् । कलेज अध्ययनकै क्रममा पढ्नुपर्ने विषयमा परे पनि उनी पिकासोका हरेक आनीबानी गुगल सर्च गरेर हेर्छन् । ‘पिकासोको रंग संयोजन निकै गहिराइका साथ अध्ययन गर्न मन लाग्छ,’ उनले भने । यतिसम्म कि केही चित्र त क्यानभासमै कपीसमेत गरेका छन् उनले ।

केही साताअघि भने उपकार लाजिम्पाटस्थित अरुपण आर्ट ग्यालरीमा पिकासोले बनाएका चित्र क्यानभासमा उतार्दै थिए । ग्यालरीका प्रमुख तथा कला समीक्षक रमेश खनालले अमेरिकाबाट पिकासोका स्टिकर साइजका चित्रका प्रतिलिपि ल्याएका थिए, जसलाई उपकार लगायत सात युवा चित्रकारहरूले नक्कल गरे ।

एक साइडमा बसिरहेकी युवतीको आकृतिलाई उपकारले दुइटा हात एकैचोटि चलाएर दुवै साइडमा आकृति बनाए । ‘पिकासो एउटै हातले काम गर्थे, मचाहिँ दुवै हातले कुची चलाउँछु,’ उनले भने, ‘तर, उनको नक्कल उतार्नु पनि निकै गार्‍हो काम रहेछ ।’ पिकासोले कस्तो रंग चलाउँथेभन्दा पनि उनको सोचबाट आफू प्रभावित भएको उपकारले बताए । अरूले जे गरेका छन्, त्यसको ठीक विपरीत कलाकर्म गर्ने पिकासोको स्वभाव पनि उपकारलाई मन पर्छ ।

ब्याचलर्स अफ आर्ट (बीएफए) दोस्रो वर्ष अध्ययनरत प्रज्ञा नकर्मी पनि पिकासोका फयान हुन् । हालैको दिन उनी पनि पिकासोको चित्रको नक्कल गर्ने क्रममा थिइन् । तर, चित्र हेरेर क्यानभासमा उतार्न उनलाई झन्डै ६ घण्टा लाग्यो । पिकासोका चित्र हेर्दा जति सजिलो र सरल देखिन्छ बनाउँदा उति नै कठिन भएको प्रज्ञाको अनुभव छ । ‘सायद, यही नै पिकासोको कामको विशेषता होला,’ उनले भनिन्, ‘उनको आफ्नै शैली छ, त्यसलाई कपी गर्नै सकिँदैन ।’

बीएफए दोस्रो वर्षकै विद्यार्थी मनीषा डंगोल भने पिकासोबारे सुनेकी मात्रै थिइन् । उनको काम कस्तो छ ? गुगल सर्च गरेरसम्म उनले हेर्न भ्याएकी थिइन् । तर, जब ग्यालरीमा पिकासोका चित्र हेरिन्, त्यसपछि उनलाई अनौठो लाग्यो । ‘सधैं देखिरहेको भन्दा निकै बेग्लै चित्र देखेझैं लाग्यो,’ उनले भनिन्, ‘पिकासोबारे सुन्नु र उनका काम प्रत्यक्ष हेर्नुमा धेरै फरक रहेछ ।’

उनले पिकासोको चित्रबाट कुर्सीमा बस्दै गरेकी महिलाको आकृति आफ्नो क्यानभासमा उतारिन् । चित्र बनाइसकेपछि पिकासोको प्रिन्ट चित्र र आफूले बनाएको वास्तविक चित्र दाँजिन् । ‘रंग संयोजन र स्केचको रेखामा निकै मिहिनेत गर्नुपर्ने रहेछ,’ उनले भनिन् ।

यसरी पिकासोका चित्र बनाउनेमा सुजिता चौधरी, शर्मिला तामाङ, तीर्थकुमारी सुनुवार, चिरञ्जीवी श्रेष्ठ लगायत थिए । रमेशका अनुसार पिकासोका चित्र हेरेर क्यानभासमा उतार्न सक्नु भनेको आफैंमा ठूलो साधना हो ।

ललितकलाका विद्यार्थीले कलाको इतिहास अध्ययन गर्न आवश्यक रहेको जनाउँदै उनले ग्यालरीमा पिकासोको चित्रमाथि कार्यशाला गरेका थिए ।

प्रकाशित : भाद्र २१, २०७५ ०८:३३
प्रतिक्रिया
पठाउनुहोस्

उनकै सम्झना उनकै गीत

कान्तिपुर संवाददाता

काठमाडौँ — वरिष्ठ गायिका शोभा तिवारी लोहनीले नेपाली लोक संगीतको खोज, अनुसन्धान र प्राध्यापनमा शोभाले ठूलो योगदान पुर्‍याएकी थिइन् ।

उनै शोभाप्रति समर्पित गरी एल्बम ‘संगीत र सर्मपण’ ल्याएको छ । बुधबार राजधानीको जमलस्थित राष्ट्रिय नाचघरमा कवि तथा संस्कृतिविद् तुलसी दिवसले एल्बमको लोकार्पण गरे ।

क्यान्सरका कारण नौ वर्षअघि दिवंगत भइसकेकी शोभाको परिवारले उनीप्रति समर्पित गर्दै उनैले गाएका गीतहरूको संग्रह निकालेको हो । संग्रहमा ‘बिर्से पनि मलाई तिमीले..’, ‘सँधै हरिलो सँधै भरिलो..’, ‘मेरो दिलको एक ईश्वरलाई...’, ‘प्रभुको पदमा..’, ‘हे प्रभु कृष्ण..’, ‘कलिलो राम्रो हजुरको पाउ..’, ‘नेपाल जननी बन्दे...’, ‘लौन गरौँ..’ लगायत ११ वटा लोक गीत र भजन समावेश छन् ।

एल्बममा शोभाले नै संगीत र रचना गरेको एउटा गीत पनि छ भने महाकवि लक्ष्मीप्रसाद देवकोटादेखि कृष्णप्रसाद पराजुली, लक्ष्मण लोहनी, गौरी नेवा, रवीन्द्र शाह, विक्रम राणा, भैरव नाथ रिमाल, खेमराज केशवशरण, किशोर थापा, ओमकार गर्ताैलाको रचना रहेको छ । संगीत नातीकाजी, हुतराज शर्मा, दिपक जंगम, कृष्णमान डंगोल, गोपाल योञ्जनले भरेका छन् । शोभाले तीन दशक नेपाल ललितकला क्याम्पसमा प्राध्यापनसमेत गरेकी थिइन् ।

कार्यक्रममा शिला विष्ट, मिनु वाइबा, रचयिता थपलिया, राधिका भण्डारी र शोभासँग संगीत सिकेका विद्यार्थीले शोभाद्वारा गाइएको गीतहरूको लाइभ प्रस्तुतिसमेत दिए ।

प्रकाशित : भाद्र २१, २०७५ ०८:३२
पूरा पढ्नुहोस्
प्रतिक्रिया
पठाउनुहोस्