दक्षिण कोरियाली राष्ट्रपतिले भने– ‘उत्तरसँग वार्ता गर्न तयार छु’

सोल — दक्षिण कोरियाली राष्ट्रपति मुन जाय इनले दुई कोरियाबीचको सम्बन्धमा सुधार हुन्छ भने आफू उत्तर कोरियाली नेतासँग भेटवार्ता गर्न तयार रहेको बताएका छन् । राष्ट्रपति कार्यालय ब्लु हाउसमा आयोजित पत्रकार सम्मेलनमा उनले उक्त धारणा राखेका हुन् । 

दक्षिण कोरियाका राष्ट्रपति मुन जाय इन बुधबार आयोजित पत्रकार सम्मेलनमा ।

‘कोरियाली प्रायद्वीपमा देखिएको अशान्तिको अवस्था तथा सम्बन्धमा सुधार हुन्छ भने हामी भेटघाट र वार्ता गर्न तयार छौं, त्यसका लागि म खुला नै छु,’ उनले भने ।
मुनले दुई कोरियाबीचको वार्ताको ‘क्रेडिट’ अमेरिकी राष्ट्रपति डोनाल्ड ट्रम्पलाई जाने पनि बताएका छन् । वार्ताका लागि अमेरिकी नेतृत्वको प्रतिबन्ध र दबाबले भूमिका खेलेको उनले बताए ।
गत वर्ष राष्ट्रपतिमा निर्वाचित मुनलेनयाँ वर्षका अवसरमा अर्थात् गत जनवरी १ मा दिएको शुभकामना सन्देशमा पनि सम्बन्ध सुधारका लागि कोरियाली सम्मेलन (कोरिया समिट) को आयोजना गर्न सुझाव दिएका थिए ।
उनले अहिले नै दुई कोरियाबीच उच्च तहमा वार्ता गरी आवश्यक सम्बन्ध सुधारका साथै कोरियाली प्रायद्वीपमा शान्ति स्थापनाका लागि प्रयास गर्नुपर्ने प्रस्ताव गरेका छन् ।
दुई कोरियाबीच दक्षिण कोरियामा वार्ता सुरु भएको एक दिनपछि राष्ट्रपति मुनको यो धारणा आएको हो । लामो समयदेखि नै शत्रुतापूर्ण सम्बन्ध रहेका दुई कोरियाबीच दुई वर्षपछि मंगलबार पहिलो पटक यति उच्चस्तरमा औपचारिक वार्ता भएको हो ।
यो वार्तापछि वातावरण निर्माण भएकाले सम्बन्ध सुधारका लागि थप केही गर्नुपर्नेमा मुनले जोड दिएका हुन् । मंगलबारको वार्तापछि उत्तर कोरियाले दक्षिण कोरियामा आयोजना हुने शीतकालीन ओलम्पिकमाआफ्ना खेलाडी र प्रतिनिधि पठाउने जनाएको छ । आफ्नो टोलीमा खेलाडी, कलाकार, पत्रकार, सरकारी अधिकारीहरू र चियरलिडर्स सामेल गर्ने उत्तर कोरियाले जनाएको छ ।
वार्ता शीतकालीन ओलम्पिकका विषयमा केन्द्रित थियो । त्यस क्रममा दक्षिणले ओलम्पिकको उद्घाटन समारोहमा दुवै कोरियाले संयुक्त मार्चपास गर्ने प्रस्ताव
गरेको छ । सन् २००६ को शीतकालीन ओलम्पिकमा पनि दुवै कोरियाले मार्चपास गरेका थिए । यस्तै, कोरियाली युद्धकाकारण अलग भएका परिवारबीच पुनर्मिलन गर्नुपर्ने र सैनिक मुद्दा तथा आणविक कार्यक्रमसम्बन्धी वार्ता पुन: सुरु गर्न दक्षिण कोरियाले प्रस्ताव गरे पनि कुनै निर्णय भएको छैन । उत्तर कोरियाली वार्ता प्रतिनिधिले यस विषयमा आफूहरूले कुनै निर्णय दिन नसक्ने बताएका थिए ।
दक्षिण कोरियाले राष्ट्रसंघसँगको समन्वयमा केही प्रतिबन्धहरू अस्थायी रूपमा फुकुवा गर्नेबारे सोच्ने पनि जनाएको छ ।

प्रकाशित : पुस २७, २०७४ ०७:५८
प्रतिक्रिया
पठाउनुहोस्

बालिकाको हत्यापछि हिंसात्मक प्रदर्शन

इस्लामाबाद — पाकिस्तानको कसुर जिल्लामा एक बालिकाको बलात्कारपछि हत्या भएको घटनापछि हिंसात्मक प्रदर्शन सुरु भएको छ । त्यस क्रममा एक जनाको मृत्यु भएको छ । 

मंगलबार बेपत्ता भएकी ८ वर्षीया बालिकाको शव घरबाट दुई किलोमिटर टाढा फोहोरको थुप्रोमा फेला परेको थियो । उक्त घटनापछि कसुर जिल्लामा प्रदर्शन भएको हो । स्थानीय सञ्चारमाध्यमका अनुसार प्रदर्शनकारीमाथि प्रहरीले गोली प्रहार गर्दा केही मानिस मारिएको आशंका छ । तर यसको पुष्टि भएको छैन । प्रहरीले दोषीको खोजीका लागि
२ सयभन्दा बढी अधिकृतखटिएका छन् ।
लाहौर उच्च न्यायालयले स्थानीय प्रशासनसँग घटनाबारे विस्तृत रिपोर्टमा मागेको छ । पन्जाब प्रान्तका मुख्यमन्त्री सहबाजसरिफले पनि घटनाका बारेमा जानकारी लिएका छन् । उनले
आफ्नो ट्वीटमा यस घटनाबारेमा सुरक्षा अधिकारीहरूसँग वार्ता गरेको र दोषी पत्ता लगाएर कडाकारबाही गर्न निर्देशन दिएको उल्लेख गरेका छन् ।
बालबालिकाको अपहरणपछि हत्या गरिएका यस्ता घटना अरू पनि भएको प्रहरीले जनाएको छ । यस्तो घटनामा एकै व्यक्तिको हात रहेको हुन सक्ने प्रहरीको आशंका छ । यो घटनापछि पाकिस्तानमा सामाजिक सञ्जालमा व्यापक आक्रोश पोखिएका छन् । ‘जस्टिसफरजैनाव’ हयासटयागका साथ विश्वभरबाट डेढ लाखभन्दा बढी ट्वीट भएका छन् ।

प्रकाशित : पुस २७, २०७४ ०७:५६
पूरा पढ्नुहोस्
प्रतिक्रिया
पठाउनुहोस्