दुर्घटनाग्रस्त इरानी विमान भेटियो
तेहरान — इरानको दक्षिणी क्षेत्रमा आइतबार दुर्घटनाग्रस्त विमानको भग्नावशेष मंगलबार फेला पारेको अधिकारीले जनाएका छन् ।
राजधानी तेहरानबाट दक्षिण–पश्चिमी सहर यासुजतर्फ गइरहेको एसिमन एयरलान्सको जहाज जाग्रोस पहाडमा आइतबार दुर्घटना हुँदा ६६ जनाको मृत्यु भएको थियो ।
विमानमा चालक, सहचालक, २ परिचारिका, २ सुरक्षाकर्मीसहित ६६ जना रहेका थिए । उनीहरू सबैको दुर्घटनामा मृत्यु भएको थियो । स्थानीय सञ्चारमाध्यमले अधिकारीलाई उद्धृत गर्दै डेना पहाडमा विमानको भग्नावशेष भेटिएको उल्लेख गरेका छन् ।
इरानी रेभोल्युसनरी गार्डको हेलिकोप्टरले जार्गोस शृंखलाअन्तर्गतको खोजीका क्रममा हिउँले आधा पुरिएको भग्नावशेष फेला परेको आपतालीन सेवाका प्रवक्ता रमेजान सरिफले बताए ।
हेलिकोप्टर पाइलटले आफूले दुर्घटनास्थलमा मानिसका छरिएका शव देखेको स्थानीय सञ्चारमाध्यममा बताएका छन् । उनले खराब मौसमका कारण शव संकलन गर्न कठिनाइ भएको उल्लेख गरे ।
प्रकाशित : फाल्गुन ९, २०७४ १०:३६