युवाले चाहेको कांग्रेस

नेपाली कांग्रेस सशक्त बन्नसके मात्र नेपाललाई अधिनायकवादतर्फ जानबाट बचाउन सकिन्छ ।
विजयसन्ताेषी राई

काठमाडौँ — सक्रिय तथा ऊर्जाशील र समाधानमुखी तथा संघ, प्रदेश तथा स्थानीय तहमा प्रमुख प्रतिपक्षको सशक्त भूमिका निवार्ह गर्नसक्ने आधुनिक कांग्रेस युवाले चाहेका छन् । गुट–उपगुटले गाँजेको, समस्या नै समस्याले भरिएको अनि विकृति–विसंगतिले सताएको र पुरानै शैलीको कांग्रेस अबको चाहना होइन ।

तर निर्वाचनमा पराजय भएको यतिका लामो समयसम्म पनि कांग्रेसले पार्टी रूपान्तरणलाई ध्यान नदिएको र हारको पीडालाई शक्तिमा बदल्न नसकेको अवस्था छ । पार्टीमा आन्तरिक एकतासमेत कायम गर्न नसक्दा तीनै तहको सदनदेखि सडकसम्म कांग्रेस कमजोर देखिएको छ ।

सरकारबाट जनविरोधी निर्णयहरू भइरहँदा, दैनिक उपभोग्य सामग्रीको चर्को मूल्यवृद्धि हुँदा, बालकृष्ण ढुंगेललाई कैद मिनाहा गरिँदा संघीय तथा प्रदेश संसद र सडकमा सशक्त रूपमा विरोध गर्न नसक्नुले प्रतिपक्ष दल प्रभावहीन बनेको महसुस सबैले गर्न थालेका छन् । त्यसैले यी मुद्दालाई अब कांग्रेसले सदन र सडक दुवै ठाउँमा चर्को रूपमा उठाउनुपर्छ ।

Yamaha

लोकतन्त्रलाई गतिशील बनाउन सरकारसंँगै प्रतिपक्ष पनि उत्तिकै शक्तिशाली र बलियो हुनुपर्छ । तर यतिबेला संघ, प्रदेश र स्थानीय तहमा संख्यात्मक हिसाबले र भूमिकाको दृष्टिले पनि कांग्रेसको उपस्थिति अत्यन्तै कमजोर छ । त्यसैले यतिबेला सत्तापक्षसँंगै प्रतिपक्ष दलको बलियो र प्रभावकारी भूमिकाको खोजी महत्त्वपूर्ण विषय भएको छ । उमेर, कर्म र सिद्धान्तले पनि जेठो पार्टी नेपाली कांग्रेस समय अनुरुप आफूलाई रूपान्तरण गर्न नसेकैले यतिबेला इतिहासकै कमजोर स्थितिमा पुगेको हो । यसले गर्दा सरकार स्वेच्छाचारी र अधिनायकवादतर्फ अग्रसर देखिन्छ ।

नेपाली कांग्रेसकै अगुवाइमा राणा र राजासँगको संघर्ष जितेर लोकतन्त्र स्थापना भएको हो । नेपाली कांग्रेसले राजनीति सधैं जितेको छ । अहिले एउटा निर्वाचनमा हार्दा लडाइँमा हारेको सिपाहीको जस्तो मानसिकतामा गुज्रनु हुँदैन । पार्टीलाई नयाँ संरचनाका साथ नयाँ गति दिएर कांग्रेस अघि बढ्नुपर्छ । राज्य पुनर्संरचनापछि भएको संघ, प्रदेश र स्थानीय तहको निर्वाचनमा कांग्रेसले नयाँ संरचना अनुसार संगठन निर्माण गर्न नसक्दा नराम्रोसंँग पराजय भोग्नुपरेको हो ।

नेपाली कांग्रेसले अब केन्द्र, प्रदेश, स्थानीय तहको वडा–वडासम्म छाया सरकार गठन गर्नुपर्छ । भ्रातृ तथा शुभेच्छुक संस्थाहरूको नियमित अधिवेशन गरी तिनीहरूलाई देशभरि परिचालन गराउनुपर्छ । विकास निर्माण लगायत जनताको समस्या र आवश्यकता तथा काम र सेवामा अब कांग्रेसको अर्थपूर्ण उपस्थिति बढाउनुपर्छ । युवा नेताहरूले पनि पार्टी नेतृत्वलाई खबरदारी गर्नुको साटो नेताहरूकै चाकडी तथा चाप्लुसी गरी विभिन्न गुट तथा उपगुटमा विभाजित हुने प्रवृत्ति अन्त्य गर्नुपर्छ । युवा पुस्ताको ध्यान अब पार्टीलाई पहिलो बनाउनतिर हुनुपर्छ । पार्टीका नेताहरूमा पुरातन व्यवहार परिवर्तन हुनुपर्छ ।

राणाशासनले मास्न नसकेको, राजा र पञ्चायतले छेक्न र रोक्न नसकेको कांग्रेस हो । निर्वाचन परिणामले कांग्रेस अहिले कमजोर भएको मात्र हो । यसलाई पहिलेको भन्दा सशक्त र ऊर्जाशील बनाउन सकिन्छ । त्यसका लागि देशभरका कांग्रेस नेता–कार्यकर्ता आत्मसमीक्षा गर्दै कार्यशैलीमा रूपान्तरण ल्याउनुपर्छ । मेचीदेखि महाकाली, हिमाल, पहाड, तराईसम्म सशक्त जागरण अभियान सञ्चालन गर्नुपर्छ । कांग्रेस इतिहास बोकेको, वर्तमान भएको र भविष्य पनि सुनिश्चित भएको पार्टी हो । कांग्रेसका अहिलेका तन्नेरी इतिहास भजाएर खाने होइन, नयाँ इतिहास रच्न जुट्नुपर्छ ।

संघीय लोकतान्त्रिक गणतन्त्र स्थापना भएर अहिले संविधान कार्यान्वयन चरणमा छ । यो परिवर्तनको युगमा नेपाली कांग्रेसले नयाँ नीति र कार्यक्रमका साथ आफ्नो सिद्धान्त पुनव्र्याख्या गर्दै संगठनको पुनर्निमार्णमा जुट्न अति आवश्यक भएको छ । पार्टीभित्र युवासँगै आदिवासी जनजाति, दलित, मधेसी र महिला तथा सिमान्तकृत वर्गलाई पनि नेतृत्वमा निर्णायक ढंगमा सहभागी गराउँदै पार्टीलाई सबैको साझा बनाउनुपर्छ ।

योग्यता र क्षमताका आधारमा युवा, प्रौढ र पाका तीनै पुस्तालाई पार्टीको नेतृत्वमा समायोजन गर्नुपर्छ । पदाधिकारी तहसम्म युवालाई सहभागी गराएर रूपान्तरण अभियान सञ्चालन गर्नुपर्छ । नेपाली कांग्रेस सशक्त बन्नसके मात्र नेपाललाई अधिनायकवादतर्फ जानबाट बचाउन सकिन्छ । महासमितिको बैठक तत्काल बोलाएर नयाँ परिवेशमा पार्टीको संघीय विधान पारित गर्दै राष्ट्र, राष्ट्रियता, लोकतन्त्र, समाजवादका सन्दर्भमा समेत २१ औं शताब्दीको परिवेश अनुरुप पुनव्र्याख्या गर्नुपर्छ ।

पार्टीलाई पनि नयाँ ढंगबाट संगठित गर्नुपर्छ । नयाँ युगका लागी नयाँ एजेन्डा बोकेर हिँड्न सक्ने कांग्रेसको संगठनको ढाँचा महासमितिको बैठकबाटै तय गर्नुपर्छ । पार्टी चरम संकटमा पँmसेका बेला पार्टी सभापति लगायत संस्थापन पक्षले पनि सबैलाई समेटेर एकताबद्ध ढंगले पार्टी सञ्चालन गर्नुपर्छ र अन्य पक्षले पनि संस्थापन पक्षलाई सहयोग गर्नुपर्छ, अनिमात्र कांग्रेस देशले खोजेको पार्टी बन्न सक्छ ।

राई नेपाली कांग्रेस धनकुटाका सचिव हुन् ।
bijayasrai075@gmail.com

प्रकाशित : असार २५, २०७५ ०८:०२
प्रतिक्रिया
पठाउनुहोस्
ADVERTISEMENT

उपाधि होडमा उभिएकाहरू

राजु घिसिङ

मस्को — सर्वाधिक पाँचपल्टको च्याम्पियन ब्राजिल र उरुग्वे क्वाटरफाइनलमै पराजित भएसँगै २१ औं विश्वकप युरोपेली टिमको कब्जामा गइसकेको छ । यसपालि अन्तिम चारमा पुगेका चार टिममध्ये फ्रान्स र इंग्ल्यान्ड च्याम्पियन नै भइसकेका छन् ।

इंग्ल्यान्डले घरेलु भूमिमा सन् १९६६ मा उपाधि जितेको थियो भने सफलता फ्रान्सले १९९८ मा हात पारेको थियो । जिनेदिन जिदान नेतृत्वको फ्रान्स २००६ को विश्वकप फाइनलमा भने इटालीसँग हारेको थियो ।

सेमिफाइनलमा फ्रान्स र बेल्जियम मंगलबार सेन्ट पिटर्सबर्गमा भिड्नेछन् । अर्को सेमिफाइनल इंग्ल्यान्ड र क्रोएसियाबीच मस्कोमा बुधबार हुनेछ । बेल्जियम र क्रोएसिया दुवै दोस्रोपल्ट सेमिफाइनल पुगेका हुन् तर दुवैले फाइनल खेल्ने अवसर पाएका छैनन् ।

त्यसैले यसपालिको विश्वकपको फाइनलमा दुवै टिम नयाँ पनि हुनसक्छ । अथवा दुवै टिम दोस्रोपल्ट विश्वविजेता बन्ने होडमा फाइनलमा खेल्न पनि सक्छन् । रुसमा उत्कृष्ट प्रदर्शन गर्दै अन्तिम चारमा पुगेका टिम कस्ता छन् :

फ्रान्स

स्टार खेलाडीले भरिएको टिम हो फ्रान्स । म्यानचेस्टर युनाइटेडका मिडफिल्डर पल पोग्बादेखि एटलेटिको म्याड्रिडका फरवार्ड एन्टोइन ग्रिजमन अनि नयाँ पेलेका रूपमा उदाइरहेका पेरिस सेन्ट जर्मेनका युवा खेलाडी किलियन एम्बाप्पेसम्म फ्रान्सेली टिममा छन् । उसका २३ खेलाडी नै स्टार फुटबलर भन्न लायक छन् ।

फ्रान्सले यो विश्वकपको सुरुआत भने सुस्त गतिमा गरेको थियो । उसले पहिलो खेलमा अस्ट्रेलियालाई र दोस्रोमा पेरुलाई पराजित गर्न निकै संघर्ष गर्नुपरेको थियो । समूह चरणको अन्तिम खेलमा डेनमार्कविरुद्ध गोलरहित रहँदा पनि उसका खेलाडीले नाम र कौशलअनुसार प्रदर्शन गरेका थिएनन् । तर सही समयका उसका खेलाडी लयमा फर्किए ।

लियोनल मेसी नेतृत्वको अर्जेन्टिनाविरुद्ध अन्तिम १६ को प्रतिस्पर्धामा फ्रान्सले वास्तवमै लोभलाग्दो खेल देखाएको थियो । त्यसमा १९ वर्षीय एम्बाप्पेको प्रदर्शन निर्णायक रहेको थियो । उनले क्वाटरफाइनलमा उरुग्वेविरुद्ध हात पारेको जितमा पनि प्रभाव देखाएका थिए । तर उनी अझै परिपक्व भइसकेका छैनन्, युवा नै छन् ।

अग्रपंक्तिमा एम्बाप्पे र ग्रिजमनले कुनै पनि डिफेन्सलाई ध्वस्त पार्नसक्छन् । अर्का फरवार्ड ओलिभर जिरोड भने चल्न सकेका छैनन् । उसको डिफेन्सको प्रदर्शन सुधारिएको छ । त्यसैले दुई दशकपछि फेरि फ्रान्स विश्वविजेता बन्ने बाटोमा अगाडि बढ्न सक्छ ।

मुख्य खेलाडी
किलियन एम्बाप्पे
विश्वकप २०१८ यात्रा
गोल प्रतिद्वन्द्वी
२–१ अस्ट्रेलिया
१–० पेरु
०–० डेनमार्क
४–३ अर्जेन्टिना
२–० उरुग्वे

बेल्जियम
इतिहासको तथ्यांकले पनि मनोवैज्ञानिक रूपमा मैदानको खेलमा असर गर्छ भनिन्छ । स्टारहरूले भरिएको टिमको चुनौती चाँडै समाप्त भएका उदाहरणले पनि त्यसलाई प्रमाणित गर्छ । तर, यसपालि बेल्जियमको पक्षमा भने त्यस्तो भएन । उसले पनामालाई ३–० ले हराएर सानदार सुरुआत गरेको थियो र त्यसलाई क्वाटरफाइनलसम्म निरन्तरता दिएको छ । उसले पाँचै खेल निर्धारित समयमै जितेको छ ।

म्यानचेस्टर युनाइटेडका फरवार्ड रोमुलु लुकाकु र चेल्सीका इडन हाजर्डले रुसमा सुरुबाटै मैदानमा प्रभाव देखाइरहेका छन् । म्यानचेस्टर सिटीका विंगर केभिन डे ब्रुयनी पनि सही समयमा लयमा फर्किएका छन् ।

उनकै उत्कृष्ट प्रदर्शनको सहयोगमा बेल्जियमले क्वाटरफाइनलमा उपाधिको सबैभन्दा बलियो दाबेदार मानिएको ब्राजिललाई पराजित गरेको थियो । त्यसमा डे ब्रुयनी, लुकाकु र हाजर्डको संगठित अक्रमण गजबको थियो ।

उनीहरूलाई ब्राजिलको डिफेन्सले कुनै पनि बेला रोक्न सकेको थिएन । लुकाकुले चार गोल गरेका छन् । भिन्सेन्ट कोम्पनी नेतृत्वको बेल्जियम डिफेन्स पनि राम्रो लयमा छ, जसले नेयमरसहित ब्राजिली आक्रमणलाई खासै मौका दिएको थिएन । पहिलोपल्ट विश्वकपको फाइनल पुग्ने दाउमा रहेको बेल्जियमको बेन्च पनि बलियो छ । बेल्जियम सन् १९८६ मा सेमिफाइनल पुगेको थियो, जहाँ उसलाई डिर्गाे म्यमराडोनोको टिमले रोकेको थियो ।

मुख्य खेलाडी: केभिन डे ब्रुयन
विश्वकप २०१८ यात्रा
३–० पानामा, ५–२ ट्युनिसिया, १–० इंग्ल्यान्ड
३–२ जापान, २–१ ब्राजिल

क्रोएसिया
डेभोर सुकरको टिम क्रोएसिया विश्वकप १९९८ मा एकपछि अर्को उत्कृष्ट खेल्दै सेमिफाइनलसम्म पुगेको थियो । त्यसबेला उसलाई लिलियम थुरामको दुई गोलमा फ्रान्सले रोकिदिएको थियो । यसपालि लुका मोडरिचको टिमलाई २० वर्षअघिको सफलतालाई उछिनेर कीर्तिमान बनाउने चुनौती छ ।

मिडफिल्डमा मोडरिचसँगै इभान राकिटिचले लोभलाग्दा अवसर सिर्जना गरिरहेका छन् । उसको अग्रपंक्तिमा युभेन्ट्सका फरवार्ड मारियो मान्जुकिच छन् । इभान पेरिसिचसहित उनीहरूले क्रोएसियालाई देश स्वतन्त्रता भएयताको सबैभन्दा ठूलो उपहार दिन सक्नेछन् । गोलकिपर डानिएल सुबासिचको ग्लोब्स पनि लोभलाग्दो देखिएको छ । उनले टाइब्रेकरमा चार वा चारभन्दा बढी पेनाल्टी रोक्ने पहिलो कीर्तिमान बनाइसकेका छन् ।

क्रोएसियाली टिम निकै सन्तुलित पनि छ । उसको बेन्चमा पनि उत्कृष्ट खेलाडी छन् । त्यसैले क्रोएसिया ऐतिहासिक उपलब्धितर्फ अघि बढ्न सक्छ । तर त्यसका लागि डिफेन्समा डेजान लोभरेनको कमजोरी भने सच्याउन आवश्यक छ । समूह चरणमा शतप्रतिशत जित निकाल्ने क्रममा अर्जेन्टिनामाथि ३–० को जित हात पारेको उसले अन्तिम १६ र क्वाटरफाइनलमा भने सफलता हात पार्न टाइब्रेकरको प्रतीक्षा गर्नुपरेको थियो ।

मुख्य खेलाडी: लुका मोडरिच
विश्वकप २०१८ यात्रा
२–० नाइजेरिया, ३–० अर्जेन्टिना, २–१ आइसल्यान्ड
१–१ डेनमार्क (३–२ टाइब्रेकर)
२–२ रुस (४–३ टाइब्रेकर)

इंग्ल्यान्ड

इंग्लिस प्रिमियर लिग विश्वकै सर्वाधिक लोकप्रिय घरेलु लिग हो । तर लिगको लोकप्रियता र स्तरअनुसार इंग्ल्यान्डले अन्तर्राष्ट्रिय फुटबलमा फाइदा लिन सकेको छैन । इंग्ल्यान्डले सन् २००६ पछि क्वाटरफाइनल यात्रा तय गर्न पनि सकेको थिएन । गारेथ साउथगेटको टिमलाई यसपालि दाबेदार टिमका रूपमा लिइएको थिएन ।

सबै अनुमानलाई गलत साबित गर्दै ह्यारी कप्तानीको थ्री लायन्स फाइनलको नजिक पुगेको छ । उपाधि जितेको ५२ वर्षपछि इंग्ल्यान्डले फेरि त्यस्तै सपना बुनेको छ । यसका लागि युवा खेलाडीहरू जोसिएका छन् । केनको प्रेरणादायी नेतृत्वमा रहेको टिमका १८ खेलाडी सन् १९९० मा जन्मिएका पनि थिएनन्, उनीहरू अहिले वास्तवमै विश्वकप जित्न सक्ने हैसियतमा उभिएका छन् ।

नकआउट चरणमा बल्ल इंग्ल्यान्डको परीक्षण सुरु भएको थियो । समूहका तीन खेलमा आठ गोल गरेपनि साउथगेट खुसी थिएनन् । उनी जसरी भए पनि खेलाडीको अवसरलाई सफलतामा बाँध्न चाहन्छन् । नकआउट चरणमा उसलाई अत्त्यतिर गोल गर्दै कोलम्बियाले बराबरीमा रोकेको थियो । त्यसपछि जोर्डनज हेन्डरसनले टाइब्रेकरमा दुईपल्ट बचाउ गर्दै इंग्ल्यान्डलाई सफलताको बाटोमा अग्रसर गराएका थिए ।

मुख्य खेलाडी: ह्यारी केन
गोल प्रतिद्वन्द्वी
२–१ ट्युनिसिया
६–१ पानामा
०–१ बेल्जियम
१–१ कोलम्बिया –४–३ टाइब्रेकर)
२–० स्वीडेन

प्रकाशित : असार २५, २०७५ ०७:५२
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT