दोर्दी ‘ए’ सुरुङको ब्रेक थ्रु

आश गुरुङ

लमजुङ — दोर्दीखोलामा निर्माण भइरहेको २५ मेगावाटको माथिल्लो दोर्दी ‘ए’ जलविद्युत् आयोजनाको मुख्य सुरुङको ‘ब्रेकथ्रु’ भएको छ । 

२०७१ असोजबाट निर्माण थालिएको आयोजनाको मुख्य सुरुङ अडिट पोर्टलबाट इनलेट पोर्टलतर्फ (अडिट अप स्ट्रिम) को १.३४ किलोमिटर सुरुङको ‘ब्रेकथ्रु’भएको हो ।
आयोजनाको मुख्य सुरुङ २.६२ किमिमध्ये उक्त ब्रेकथ्रुसँगै सुरुङ निर्माणको ७५ प्रतिशत काम सकिएको छ । चार फेसबाट टनेल खन्ने कार्य भइरहेकामा इनलेट पोर्टल र अडिट अप स्ट्रिमको बाटो खोलिएपछि अब अडिट डाउन स्ट्रिमबाट १ सय २० मिटर र आउटलेट पोर्टलबाट ५ सय ३३ मिटर गरी ६ सय ५३ मिटर मात्रै सुरुङ खन्न बाँकी रहेको आयोजनाले जनाएको छ । सुरुङको लम्बाइ २ दशमलव ६ किमिलाई दुई भागमा विभाजन गरी खन्ने काम धमाधम छ । सुरुङ आगामी मे महिनासम्म सम्पन्न गरिसक्ने आयोजनाका सञ्चालक राजेन्द्र वस्तीले बताए ।

Yamaha

आयोजनाका मुख्य कार्यकारी इन्जिनियर विष्णुबहादुर सिंहले बुधबार ‘ब्रेकथ्रु’ का क्रममा जलविद्युत् निर्माणका लागि सुरुङ निर्माण एक महत्त्वपूर्ण कार्य रहेको बताए । उनले सुरुङमा पहिलो चरणको काम सम्पन्न हुँदा उत्साहित हुँदै तोकिएको समयमा आयोजना निर्माण सकिने विश्वास व्यक्त गरे ।
आयोजनाका सहायक प्रोजेक्ट म्यानेजर एवं अन्डर ग्राउन्ड इन्चार्ज सूर्य जोशीले सुरुङ निर्माण कार्य निकै कठिन हुने भए पनि मानवीय क्षतिबिना सुरक्षित तवरबाट निर्माण गर्न सफल भएको बताए । यसअघि सुरुङ निर्माणको जिम्मा पाएको ठेकेदार कम्पनी मेगाटेकले निर्माणमा ढिलाइ गरेपछि उसलाई हटाएर सुरुङ निर्माणको जिम्मा वाइबा कन्ट्रक्सनलाई दिइएको थियो । लिबर्टी इनर्जी कम्पनी लिमिटेडद्वारा निर्माण भइरहेको माथिल्लो दोर्दी ‘ए’ आयोजनाको निर्माणकार्य ६० प्रतिशत सकिएको छ । डयामको फाउन्डेसन निर्माण सकिएको छ । फिजिकल कन्ट्रक्सन ५० प्रतिशत सकिएको छ । आयोजनाको हेडवक्र्स र पावरहाउस बज्रगुरु कन्ट्रक्सन प्रालिले निर्माण गरिरहेको छ । पावरहाउसको पनि फाउन्डेसन निर्माण सकिएको छ ।

प्रकाशित : पुस ३०, २०७४ ०७:३९
प्रतिक्रिया
पठाउनुहोस्
ADVERTISEMENT
ADVERTISEMENT

कारोबार रकम ३७ प्रतिशतले घट्यो

कान्तिपुर संवाददाता

काठमाडौँ — गत साताको तुलनामा सेयर कारोबार करिब ३७ प्रतिशतले घट्यो । साताभरको व्यापारमा १ अर्ब ७१ करोड रुपैयाँ बराबरको सेयर कारोबार भयो । गत साताको तुलनामा कारोबार रकम ३६.७९ प्रतिशतले कम हो । उक्त अवधिमा करिब १७ हजार ४ सय कारोबारबाट १ सय ७४ कम्पनीका ४१ लाख ५ हजार २ सय १० कित्ता सेयर खरिदबिक्री भए । गत साता ६४ लाख ७९ हजार ८ सय ९० कित्ता सेयर किनबेच हुँदा २ अर्ब ७० करोड ७१ लाख ३७ हजार रुपैयाँ परिचालन भएको थियो ।

सार्वजनिक बिदा परेकाले बिहीबार सेयर कारोबार भएन । यसकारण यो साता चार दिन मात्र सेयर किनबेच भए । तीमध्ये तीन दिन परिसूचक बढयो, १ दिन घट्यो । अधिकांश दिन परिसूचक बढे पनि कारोबार रकम लगातार घटयो । यसकारण गत साताको तुलनामा यो साता कारोबार रकममा उल्लेख्य कमी आयो ।
चार दिनको कारोबारमा नेप्से परिसूचक साढे ८ अंकले बढ्यो । आइतबार १ हजार ४ सय ३१.८० विन्दुमा रहेको बुधबार १ हजार ४ सय ४०.२९ विन्दुमा उक्लियो । केही साता यता नेप्से परिसूचकमा सुधार देखिएको छ । खासगरी, सरकार गठन छिटै हुने सम्भावना बढेकाले नेप्से सुधारको बाटोमा लागेको विश्लेषकहरू बताउँछन् । यही कारण पछिल्ला दिनहरूमा बजारमा खरिद चाप बढ्न थालेको छ ।
यो साता कारोबार रकम (२३ करोड ७६ लाख ५० हजार रुपैयाँ) का आधारमा नेपाल लाइफ इन्स्योरेन्स कम्पनी अग्रस्थानमा छ । कारोबार सेयर संख्या (एक लाख ९९ हजार कित्ता) का आधारमा नेपाल लाइफ इन्स्योरेन्स कम्पनी सबैभन्दा अघि छ । साताभर कारोबार संख्या (१ हजार ४ सय ७५ वटा) का आधारमा पनि नेपाल लाइफ इन्स्योरेन्स कम्पनी नै अग्रस्थानमा छ ।
विगतका साताहरूमा जस्तै यो साता पनि कुल कारोबारमा सबैभन्दा बढी हिस्सा बंैकिङ र बिमा समूहले ओगटेका छन् । कुल कारोबारमा वाणिज्य बैंकहरू आबद्ध बैंकिङ समूहको हिस्सा ३५.३२ प्रतिशत छ । गत साताको तुलनामा कारोबार हिस्सा कम हो । गत साता यो समूहको कारोबार हिस्सा ४२ प्रतिशत थियो । गत साताको तुलनामा यो साता बिमा समूहको हिस्सा बढेको छ । यो साता कुल कारोबारमा यो समूहको हिस्सा २७.६८ प्रतिशत छ । गत साता यो समूहको हिस्सा १३.८३ प्रतिशत थियो । यसले यो साता बिमा कम्पनीहरूको सेयरमा लगानीकर्ताको आकर्षण बढेको देखाउँछ । यसैगरी, जलविद्युत् समूहको हिस्सा १०.४४, लघुवित्तको ८.०९, विकास बैंकको ४.७२, ‘अन्य’ को ३ र संस्थापक सेयरको कारोबार हिस्सा ७.०९ प्रतिशत रहेको नेप्सेले जनाएको छ ।
साप्ताहिक कारोबारमा बीमा र उत्पादन तथा प्रशोधनबाहेक सबै समूहका लगानीकर्ताको सम्पत्तिबढ्यो । साताभरको कारोबारमा बीमा समूहको परिसूचक १३.३८ अंक र उत्पादन तथा प्रशोधन समूहको परिसूचक करिब २८ अंकले घट्यो । तर, बैकिङ समूहको परिसूचक ११.१९, होटलको २२.५५, विकास बैंकको ९.५१, जलविद्युत्को १.१६, वित्त कम्पनीको ३.८६, व्यापारको १.६९ र ‘अन्य’ समूहको १०.२८ अंकले बढ्यो ।
यो साता नेपाल स्टक एक्सचेन्जको कारोबार कक्ष नियमित कारोबारका लागि ४ दिन खुला रह्यो । विगतमा जस्तो यो साता पनि ऋणपत्रतर्फ संस्थागत र सरकारी ऋणपत्रको कारोबार भएन । यो साता एक्सेल डेभलपमेन्ट बैंकको हकप्रद सेयर सूचीकृत भयो । यसैगरी, ङादी ग्रुप पावर, सानिमा बैंक, नबिल बैंक र टुरिजम डेभलपमेन्ट बैंकको बोनस सेयर यही साता सूचीकृत भएको नेप्सेले जनाएको छ ।

प्रकाशित : पुस ३०, २०७४ ०७:३९
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT