एनआरएनएद्वारा १० अर्बको पूर्वाधार कोष घोषणा

भट्टले उक्त लगानी कोषमा निश्चित अंश वैदेशिक रोजगारमा जाने नेपालीको सुरक्षा सुनिश्चित गरिने जनाउँदै कोषमा आफ्नो क्षमताअनुसारको लगानी गर्न सबै गैरआवासीय नेपालीहरूलाई आह्वान गरेका छन् ।

उनले वैदेशिक रोजगारमा गएका र सानास्तरका लगानी गर्ने गैरआवासीय नेपालीहरूलाई पनि सहभागी गराउन आवश्यक रहेको जनाउँदै भनेका छन्, ‘यसका लागि नयाँ स्थापना हुन लागेको कम्पनी आईपीओमा जान आवश्यक छ । कम्पनी स्थापना भएर स्रोत संकलन गरी लगानी गर्न सुरु गरेलगत्तै आईपीओमा जान पाउने व्यवस्था गर्न हामी नेपाल सरकारलाई अनुरोध गर्दछौं ।’

कोषबारे नेपाल सरकार र सरोकारवाला पक्षहरूसँग आवश्यक छलफलपछि प्रारम्भिक अवधारणापत्र तयार गरी विभिन्न राष्ट्रिय समन्वय परिषदहरूमा छलफलको चरणमा रहेको संघले जनाएको छ । संघले स्थापना कालदेखि नै यस्ताखाले कोषको घोषणा गर्दै आइरहेको छ । यसअघि ३५ देशका ८३५ लगानीकर्ताको सहभागितामा स्थापित ‘एनआरएन इन्भेस्टमेन्ट कम्पनी’ ले नेपालको निजी क्षेत्रको साझेदारीमा लमजुङको दोर्दी खोलामा २७ मेगावाट जलविद्युत् परियोजना निर्माण कार्य सम्पन्न गर्न लागेको छ ।

कार्यक्रमका प्रमुख अतिथि नेपाल राष्ट्र बैंकका गभर्नर चिरञ्जीवी नेपालले एनआरएनएको उक्त घोषणाको स्वागत गर्दै यसमा सरकारको उपस्थिति रहने आश्वासन दिए । ‘वैदेशिक लगानीका लागि उदार अर्थव्यवस्था र स्थिर सरकार आवश्यक छ,’ गर्भनर नेपालले भने, ‘अब नेपालमा अलमलिनुपर्ने केही छैन । अबको बाटो आर्थिक विकासको हो ।’

गभर्नर नेपालले अब एक डेढ महिनाभित्र नेपालमा २० अर्ब रुपैयाँ चुक्ता पुँजीको पूर्वाधार बैंक सञ्चालन हुन लागेको समेत जानकारी दिए । एनआरएनएको उक्त कोष घोषणालाई विशेष अतिथि बेलायतका लागि नेपालका राजदूत दुर्गाबहादुर सुवेदीले ऐतिहासिक, दूरगामी र महत्त्वपूर्ण घोषणा भएको बताए । राजदूतले नेपालमा राजनीतिक उपलब्धि संस्थागत भएको र आर्थिक समृद्धिको सुनिश्चितता गर्ने दिशामा देश अग्रसर भएकाले देशलाई गाली नगरी लगानी गर्न आह्वान गरे । नेपाल सरकारले लगानीमैत्री वातावरण सिर्जना गर्नेमा आश्वस्त पार्दै राजदूतले लगानीका लागि कर्मचारीतन्त्रको कुनै अवरोध नरहनेसमेत दाबी गरे ।

उक्त अन्तरक्रियामा नेपाल उद्योग वाणिज्य महासंघका उपाध्यक्ष तथा ग्लोबल आईएमई बैंकका अध्यक्ष चन्द्र ढकाल, गैरआवासीय नेपाली संघका केन्द्रीय उपाध्यक्षद्वय कुमार पन्त र कुल आचार्य, एनआरएनए यूके अध्यक्ष योगकुमार फगामीलगायतले आफ्नो धारणा राखेको थिए । एनआरएनए संरक्षक जीवा लामिछानेले स्काइपमार्फत मन्तव्य दिए ।

कार्यक्रममा युरोप र जापानलगायतका देशहरूबाट समेत गैरआवासीय नेपालीहरूको सहभागिता थियो ।