जुम्ला — आउँदो चैतसम्म जुम्ला जिल्लामा मात्र करिब २० हजार स्याउ बोटको बिमा हुने भएको छ । करिब तीन वर्षदेखि सुरु भएको मौसममा आधारित स्याउको बिमा यो वर्ष उच्च दरले बढेको हो । हाल नेपालमा शिखर इन्स्योरेन्सले मात्र मौसममा आधारित स्याउको बिमा गर्दै आएको छ ।
‘यो वर्ष (चैतसम्म) मात्र थप १९ देखि २० हजार स्याउ बोटको बिमा गर्ने लक्ष्य छ,’ शिखर इन्स्योरेन्सका क्षेत्रीय प्रबन्धक ऋषिराज पाण्डेले भने, ‘त्यसका लागि सबै तयारी पूरा भएको छ । ती किसानको आकर्षण हेर्दा बिमा भएको स्याउको बोट कम्तीमा पनि २५ हजारभन्दा बढी पुग्ने पाण्डेको दाबी छ । मौसममा अधारित स्याउको बिमामा निश्चित सिमा(६० एमएम) भन्दा कम पानी परेको अवस्थामा बिमा कम्पनीबाट दाबी भुक्तानी गरिन्छ । यसका आधारमा जति कम पानी पर्छ त्यति बढी दाबी भुक्तानी पाइन्छ ।
सक्षम एक्सेस टु फाइनान्सको सहयोगमा शिखर इन्स्योरेन्सले विगत ३ वर्षदेखि जुम्मामा मौसममा आधारित स्याउको बिमा गर्दै आएको छ । पहिलो वर्ष ४७ जना किसानको ७ सय ५५ वोट स्याउको बिमा भएको थियो । गत वर्ष बिमा गर्ने किसान संख्या बढेर १ सय ४७ जनाले ५ हजार ४ सय वोटको बिमा गरेको थियो । हाल कम्पनीले जुम्लामा मात्रै १ सय ६६ जना किसानको ६ हजार ६ सय वटा स्याउको बोटको बिमा गरिएको क्षेत्रीय प्रबन्धक पाण्डेले बताए । ‘मौसममा आधारित बिमाका असिनाबाट भएको नोक्सानी पनि समावेश गरिएको हुन्छ,’ उनले भने, ‘यसकारण यो बिमामा किसानको आकर्षण निकै बढ्दो छ ।’
कृषि विमाका प्रिमियम (बिमा शुल्क) को ७५ प्रतिशत सरकारी अनुदान छ । यसकारण स्याउको बिमा गर्दा किसानले प्रतिबोट ४२ रुपैयाँ बिमा शुल्क तिर्नुपर्छ । जुम्लामा यो बिमा सुरु गर्दाको वर्ष तोकिएको भन्दा बढी पानी परेकाले कम्पनीले दाबी भुक्तानी दिएन । तर, गत वर्ष कम पानी परेकाले १ सय ४७ जना किसानलाई न्यूनतम २ हजार ९ सय ५० रुपैयाँदेखि १ लाख ११ रुपैयाँसम्म दाबी भुक्तानी दिइएको कम्पनीले बताएको छ ।
जुम्लामा स्याउको बिमा गर्नेहरूको संख्या बढ्दै गएको जानकारहरू बताउँछन । पानी कम पर्नुका साथै असिना, हावाहुरीले स्याउ नष्ट भएमा बिमा कम्पनीबाट पैसा पाइने भएपछि यसतर्फ किसानहरूको आकर्षण बढेको उनीहरूको भनाइ छ । थोरै लगानीमा धेरै रकम प्राप्त हुने भएपछि बिमाप्रतिको आकर्षण बढ्दो क्रममा देखिएको हो ।
सरकारी कार्यक्रमअनुसारले इन्स्योरेन्स कम्पनीहरू अहिले कर्णालीका ग्रामीण क्षेत्रमा जाने गरेका छन् । यसकारण कर्णालीबासीले निर्जीवन, पशु कृषि, स्वास्थ्य सवारी साधन बिमा सुविधा उपभोग गर्न पाएका छन् ।
जुम्लाबाट सुरु भएको निर्जीवन बिमा मुगु, कालिकोट, डोल्पा र हुम्लामा संचालन भइरहेको छ । जुम्लामा निर्जीवन बिमाले धेरैलाई राहात पुराएको छ । अहिलेसम्म जुम्लामा ४७, डोल्पामा ६९ र मुगुमा पहिलोपटक ३० जनाले बिमा बापत दाबी भुक्तानी प्राप्त गरिसकेका छन् । हुम्ला र कालिकोटमा पनि दाबी भुक्तानी वितरणको तयारी भइरहेको बिमा कम्पनीहरूले जनाएका छन् ।
हालसम्म जुम्लामा सबैभन्दा बढी १ हजार स्याउको बिमा गरिएको छ । यो कर्णालीका अन्य जिल्लाहरूमा भन्दा सबैभन्दा बढी हो । मुगुमा सबैभन्दा कम १० वटा स्याउका वोटको बिमा भएको छ । निर्जीवन बिमा कार्यक्रममा सरकारले कुल बिमा शुल्कको ७५ प्रतिशत अनुदान दिएको छ । यसको अर्थ किसानले २५ प्रतिशत मात्र बिमा शुल्क तिरे पुग्छ ।
बिमाका फाइदाका बारेमा पछिल्लो समय बढ्दै गएको चेतनाका कारण बिमा गराउने कृषकहरूको संख्या बढ्दै गएको जुम्लाका बिमा सहजकर्ता लक्षिराम महतले बताए । उनका अनुसार थोरै लगानीले धेरै पाउने चेतनाले छोएपछि बिमा गर्नेहरूको संख्या बढ्दै छ । कर्णाली ४ जिल्लाभन्दा जुम्लामा सबैभन्दा बढी बिमित रहेका छन् । जसमध्ये ४७ जनाले एक वर्ष यताको भुक्तानी पाएका छन् भने जुम्लामा झन्डै ५ सयभन्दा बढी बिमित संख्या छ । स्थानीयको सहजताका लागि इस्सोरेन्स कम्पन्नीहरूले भुक्तानी रकम सीधै बैंक खातामा हाल्ने र चेक हस्तान्तरण गर्ने गरेका छन् । चेतना वृद्धिसँगै बिमा गर्नेको संख्या बढेपछि विभिन्न किसिमका जोखिमबाट किसानहरू सुरक्षित रहेको जानकारहरू बताउँछन् ।
करिब २१ हजार घरधुरी भएको जुम्लामा २० हजार स्याउ खेतीमा आबद्ध भएको कृषि विकास कार्यालय जुम्लाले बताएको छ । कार्यालयका अनुसार जुम्लाको २ हजार ८ सय हेक्टर क्षेत्रफलमा स्याउ उत्पादन हुन्छ । तीमध्ये हाल ९ सय हेक्टरमा व्यावसायिक रूपमा स्याउ खेती हुँदै आएको छ । यो वर्ष (०७३ मा) जुम्लामा करिब १८ करोड रुपैयाँ बराबरको स्याउ उत्पादन भएको छ । सिजनमा प्रतिकिलो ४० देखि ४५ रुपैयाँका दरले बारीबाटै स्याउ बिक्री हँुदै आएको छ । गत वर्ष जुम्लामा साढे १६ करोड रुपैयाँ बराबरको स्याउ उत्पादन भएको थियो । ०७१ मा ५५ सय मेट्रिक टन स्याउ उत्पादन भएको जनाइएको छ ।
जुम्लाको स्याउ गुणस्तरीय हुने भए पनि विगतमा मोटरबाटोको सुविधा नहुँदा बजार पाएको थिएन । ०६३ सालमै सुर्खेत जुम्मा जोड्ने सडकको ट्रयाक खुले पनि करिब ६ वर्षअघि फराकिलो बनाइएको हो । त्यसपछि यहाँको स्याउले राम्रो बजार पाएको छ । करिब ३ वर्षअघि उक्त बाटो कालोपत्रै गरिएको छ । त्यसपछि स्याउ फारम (स्याउ बारी) बाटै सीधै बिक्री हुँदै आएको किसानहरू बताउँछन् ।
प्रकाशित : फाल्गुन १४, २०७४ ०७:४३