बैंकबाट तलब भुक्तानी गर्न तालिका

कान्तिपुर संवाददाता

काठमाडौँ — श्रमिकको तलब सुरक्षा गर्नका लागि बैंकबाट अनिवार्य तलब भुक्तानी गर्न सरकारले क्षेत्रगत रूपमा समयतालिका निर्धारण गरेको छ । मन्त्रिपरिषद्ले सोमबार समयतालिका निर्धारण गरेको हो ।

केन्द्र, प्रदेश तथा स्थानीय तह, विश्वविद्यालय, नेपाल सरकारको पूर्ण वा आंशिक स्वामित्व भएका संस्थान, समिति, परियोजना, प्रतिष्ठान र मातहतका निकायमा काम गर्ने सबै श्रमिक तथा कर्मचारीको पारिश्रमिक एवं वित्तीय सुविधालाई साउनदेखि असोज मसान्तभित्र अनिवार्य रूपमा बैंक खातामार्फत भुक्तानीको व्यवस्था मिलाउने निर्णय गरेको छ ।

आम सञ्चार, बैंक वित्तीय संस्था, बिमा कम्पनी, होटल, एयरलाइन्स, ट्राभल एजेन्सीलगायत सेवा उद्योग, सहकारी संस्था र श्रमिक आपूर्तिकर्ता, सामुदायिक एवं संस्थागत शिक्षण संस्था तथा कानुनबमोजिम दर्ता भएका गैरसरकारी संघसंस्था, ट्रस्ट, कम्पनी ऐन, विशेष ऐन, गठन आदेशलगायत कानुनबमोजिम गठित सबै संघसंस्थाले पुस मसान्तभित्र अनिवार्य रूपमा बैंक खातामार्फत पारिश्रमिक दिनुपर्नेछ ।
यसबाहेकका सबै प्रतिष्ठान मातहत काम गर्ने श्रमिक तथा कर्मचारी र घरेलु श्रमिकको पारिश्रमिक एवं वित्तीय सुविधा २०७६ पुस मसान्तभित्र बैंकमार्फत दिनुपर्ने निर्णयमा छ ।

Yamaha

‘कुनै स्थानीय तहमा बैंक तथा वित्तीय संस्था नभए त्यस्तो स्थानमा बैंक तथा वित्तीय संस्था स्थापना भएको मितिले ३ महिनाभित्र कार्यरत श्रमिक तथा कर्मचारीहरूलाई अनिवार्य रूपमा बैंक खातामार्फत पारिश्रमिक एवं वित्तीय सुविधा भुक्तानीको व्यवस्था मिलाउनेछ,’ निर्णयमा भनिएको छ, ‘आकस्मिक वा आंशिक रोजगारीबापतको भुक्तानी नगदै वा चेकमार्फत गर्न सकिनेछ ।’

श्रम, रोजगार तथा सामाजिक सुुरक्षामन्त्री गोकर्ण विष्टले सबै प्रकारका श्रमिक एवं कर्मचारीलाई न्यूनतम पारिश्रमिक तथा सुविधाको साथै योगदानमा आधारित सामाजिक सुरक्षा प्रत्याभूत गर्न बैंकबाट तलब भुक्तानीको व्यवस्था गरिएको बताए ।

प्रकाशित : श्रावण १, २०७५ ०८:४७
ADVERTISEMENT
प्रतिक्रिया
पठाउनुहोस्
ADVERTISEMENT

कच्चा तेलको मूल्य घट्न थाल्यो

कान्तिपुर संवाददाता

एजेन्सी — विश्व बजारमा कच्चा तेलको मूल्य उच्च रेकर्डमा पुगेसँगै अब ओरालो लाग्न सुरु भएको छ । अमेरिकापछि साउदी अरबले कच्चा तेलको उत्पादन बढाउने घोषणा गरेलगत्तै तेलको मूल्य ओरालो लागेको सञ्चारमाध्यमहरूले सोमबार जनाएका छन् ।

अघिल्लो साता अमेरिकी बजारमा कच्चा तेलको मूल्य निकै तल झरेको थियो । कच्चा तेलको मूल्यमा गिरावटसँगै विभिन्न मुलुकमा पेट्रोल–डिजेलको मूल्य घट्न सक्ने अडकलबाजी सुरु भएको छ । यसैबीच भारतको चार सहरमा पेट्रोलको मूल्य सोमबार घटेको ‘टाइम्स अफ इन्डिया’ ले जनाएको छ । १० दिनअघि एक रुपैयाँभन्दा बढीले तेलको मूल्यमा वृद्धि भएको थियो । नयाँदिल्ली, मुम्बई, कोलकाता र चेन्नईमा पेट्रोलको मूल्यमा १० पैसादेखि १२ पैसा र डिजेलमा १३ पैसादेखि १५ पैसाले घटेको ‘जी न्युज’ ले जनाएको छ ।

साउदी अरबले एसियामा थोरै खरिदकर्ताका लागि आफ्नो अतिरिक्त लाइट क्रुड तेल प्रस्ताव गरेको छ । उता अमेरिकाले इरानसँग कच्चा तेल निर्यात बन्द गर्नुपर्ने माग गरिरहेको छ । अमेरिकामा ६६० मिलियन ब्यारेल स्ट्रेटेजिक पेट्रोलियम रिजर्भ (एसपीआर) लाई बजारमा ल्याउने तयारी भइरहेको छ ।

साउदी र अमेरिकाले आपूर्ति बढाउने घोषणाको प्रभाव अन्तर्राष्ट्रिय तेल बजारमा देखिन थालेको छ । अगस्टमा डेलिभरीका लागि ‘न्युयोर्क मर्कन्टाइल एक्सचेन्ज’ मा कच्चा तेल ७२ सेन्टले घटेर ७० दशमलव २९ डलर प्रतिब्यारेल पुगेको छ । त्यस्तै करिब सय दिनको औसतमा तेलको मूल्यमा करिब २८ प्रतिशतले गिरावट आएको छ ।

पछिल्लो साता कच्चा तेलको भाउमा २ दशमलव ७९ डलरले गिरावट हुँदै ७१ दशमलव ०१ डलर रहेको थियो । घट्दो मूल्य ठूला तेल आयातकर्ता मुलुकहरूका लागि खुसीको कुरा हो । यसले सरकारको आयात बिल कम गर्नेछ भने सर्वसाधारणले पेट्रोल–डिजेल कम मूल्यमा पाउनेछन् ।

‘रोयटर्सले रसियाले एस्सोनमोबिलको नेतृत्वमा रहेको ‘साखालिन १’ परियोजनाबाट कच्चा तेल आयात गर्ने योजना बनाएको जनाएको छ । उद्योगका स्रोतहरूले सोमबार दिएको जानकारीअनुसार रसियाले प्रतिदिन २ लाख ६० हजारदेखि २ लाख ६६ हजार ब्यारेलसम्म तेल निर्यात गर्ने योजना बनाएको हो ।

प्रकाशित : श्रावण १, २०७५ ०८:४५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT