कच्चा तेलको आयात बढ्यो

शंकर आचार्य

पर्सा — वीरगन्जका २ वटा भन्सार नाकाबाट भटमास र सूर्यमुखी कच्चा तेलको आयात उल्लेख्य रूपमा बढेको छ ।

वीरगन्ज भन्सार कार्यालय र सिर्सिया सुक्खा बन्दरगाह भन्सार कार्यालयको तथ्यांकले अघिल्लो आर्थिक वर्षको तुलनामा गत आर्थिक वर्षमा यी वस्तुको आयात बढेको देखाएको छ ।

Yamaha

भटमासको कच्चा तेल अर्जेन्टिना र ब्राजिलबाट भित्र्याइन्छ । सूर्यमुखीको कच्चा तेल भने टर्की, मलेसिया र सिंगापुरबाट आयात हुने गरेको छ ।

यी दुई वस्तु उत्पादनका लागि सुहाउँदो हावापानी र माटो नेपालमा भए पनि अन्य मुलुकबाटै ल्याउने गरिएको छ । अझ पछिल्लो समय यी दुई वस्तुको आयात बढेको तथ्यांकले देखाएको छ ।

तथ्यांकअनुसार गत आवमा यो नाकाबाट १० अर्ब ८१ करोड रुपैयाँ बराबरको ११ करोड ७९ लाख ८९ हजार ९ सय ४५ किलो भटमासको कच्चा तेल आयात भएको छ ।

अघिल्लो आवमा ९ अर्ब १९ करोड रुपैयाँ बराबरको ९ करोड ९४ लाख किलो आयात भएको थियो । गत आवमा यो नाकाबाट आयात मूल्यको आधारमा आयात भएका मुख्य वस्तुको छैटौं नम्बरमा यो वस्तु परेको छ ।

त्यसैगरी यो नाकाबाट गत आवमा २ अर्ब २१ करोड ५५ लाख रुपैयाँ बराबरको २ करोड ४४ लाख ५० हजार ९ सय १९ किलो सूर्यमुखीको कच्चा तेल आयात भएको छ । अघिल्लो आर्थिक वर्षमा ३२ करोड ५३ लाख रुपैयाँ बराबरको ३५ लाख किलो यो वस्तुको आयात भएको थियो ।

तुलनात्मक रूपमा हेर्दा अघिल्लो आवभन्दा गत आवमा यसको आयात ६ गुनाभन्दा पनि बढेको छ । यो नाकाबाट गत आवमा आयात वृद्धि भएका वस्तुको सूचीमा सूर्यमुखीको कच्चा तेल ११ औं नम्बरमा रहेको छ ।

वीरगन्ज भन्सार कार्यालयका सूचना अधिकृत सन्तोष यादवले भटमासको कच्चा तेलको आयात अर्जेन्टिना र ब्राजिलबाट हुने गरेको बताए । यसको आयातमा १० प्रतिशत भन्सार शुल्क र १३ प्रतिशत मूल्य अभिवृद्धि कर लाग्छ ।

सिर्सिया सुक्खा बन्दरगाहको तथ्यांकअनुसार गत आवमा यो नाकाबाट १ अर्ब ६३ करोड रुपैयाँ बराबरको १ करोड ७७ लाख ४८ हजार ४ सय ५९ किलो सूर्यमुखीको कच्चा तेल आयात भएको छ । यो नाकाबाट अघिल्लो आवमा ११ करोड ३१ लख रुपैयाँ बराबरको १२ लाख १६ हजार किलो भटमासको कच्चा तेल आयात भएको थियो ।

गत आवमा भने यो नाकाबाट यो वस्तुको आयात नै भएन । आयातकर्ताले नाका परिवर्तन गरी वीरगन्ज भन्सार नाकाबाट यसको आयात गरेको अनुमान गरिएको छ ।

सुक्खा बन्दरगाह भन्सार कार्यालयका सूचना अधिकृत धनबहादुर सूर्यमुखीको कच्चा तेल टर्की, मलेसिया र सिंगापुरबाट आयात हुने गरेको बताउँछन् । यसको आयातमा १५ प्रतिशत भन्सार शुल्क र १३ प्रतिशत मूल्य अभिवृद्धि कर लाग्छ ।

पछिल्लो समय नेपालीको भान्सामा तोरीको तेलको विकल्प बन्दै गएको सूर्यमुखी र भटमासको तेलको खपत वृद्धिसँगै माग पनि उच्च हुँदै गएको हुन सक्ने उनको ठम्याइ छ । स्वदेशी तेल उद्योगहरूले यस्ता कच्चा तेललाई प्रशोधन गरी बजारमा बिक्री वितरण गर्छन् ।

वीरगन्जस्थित वीरगन्ज भन्सार नाका । यो नाकाबाट गत आर्थिक वर्षमा भटमास र सूर्यमुखीको कच्चा तेलको आयात उल्लेख्य रूपमा बढेको छ । तस्बिर : शंकर आचार्य/ कान्तिपुर

Esewa Pasal

प्रकाशित : श्रावण १५, २०७५ २०:२९
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

ढिलासुस्ती मान्य नहुने गृहमन्त्रीको चेतावनी

रासस

काठमाडौँ — गृहमन्त्री रामबहादुर थापाले गृह मन्त्रालय र मातहतका निकायका कर्मचारी तथा सुरक्षाकर्मीहरुलाई कार्यसम्पादनमा ढिलासुस्ती नगर्न निर्देशन दिएका छन् । 

गृहमन्त्रीले चार महिनाअघि सार्वजनिक गरेको ८२ बुँदे गृह प्रशासन सुधार कार्ययोजनाबारे म‌ंगलबार गृह मन्त्रालयमा आयोजित समीक्षा बैठकमा गृहमन्त्री थापाले कार्ययोजना कार्यान्वयन सन्तोषजनक रहेपनि अझै गति बढाउन आवश्यक रहेको बताए । उनले भने, 'प्राविधिक कारणले केही बुँदामा ढिलासुस्ती भएको भए केही छैन । अन्यथा जानाजान ढिलासुस्ती गरिएको हो भने त्यो मान्य हुनेछैन ।' उनले मन्त्रालयले दिएको जिम्मेवारीअनुसार शान्ति, सुरक्षा, सुव्यवस्था र सशासनका लागि प्रतिबद्ध भएर काम गर्न मातहतका निकायहरुलाई निर्देशन दिए ।

उनले भने, 'अहिले हामी सक्रिय भएपछि अपराधीहरु निस्कृय जस्तो देखिएका छन्, मौका मिल्ने बित्तिकै उनीहरु फेरि सक्रिय हुन्छन् । त्यसैले उनीहरुको सञ्जाल तोडिने गरी काम गर्नुहोस् ।' उनले यो अवधिमा यातायात क्षेत्रको सिन्डिकेट अन्त्य, सुन तस्करीलगायत क्षेत्रमा बेथिति अन्य गर्न सफलता मिलेको भन्दै यसका लागि मातहतका कर्मचारी र प्रहरीहरुलाई धन्यवाद दिए ।

कार्यक्रममा गृह मन्त्रालयमा सचिव प्रेमकुमार राईले आर्थिक मितव्ययिता कायम गर्न आग्रह गर्दै काम गर्न आवश्यक स्रोत र साधनको भने कमी हुन नदिइने स्पष्ट पारे ।

बैठकमा गृह मन्त्रालयअन्तर्गतका महाशाखा नेपाल प्रहरी, सशस्त्र प्रहरी बल, अध्यागमन विभाग, कारागार व्यवस्थापन विभागले ८२ बुँदे गृह प्रशासन सुधार कार्ययोजनाअनुरुप आफूहरुले हालसम्म गरेका कामकारवाहीको विवरण प्रस्तुत गरेका थिए । ती ८२ बुँदे मध्ये ७२ ओटा बुँदा केही कार्यान्वयनमा आइसकेको, केही कार्यान्वयनको प्रक्रियामा रहेको तथा १० बुँदा भने अझै काम सुरु नभएको विवरण बैठकमा प्रस्तुत गरिएको थियो ।

प्रकाशित : श्रावण १५, २०७५ २०:०३
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT