वाग्मतीबाट मंसिरमा २२ मेगावाट विद्युत्

प्रताप विष्ट

हेटौंडा — भीमफेदी इपापञ्चकन्यामा निर्माणाधीन वाग्मती विद्युत् आयोजनाले आगामी मंसिर अन्तिम साताबाट २२ मेगावाट विद्युत् उत्पादन गर्ने भएको छ ।

मान्डु हाइड्रोपावर कम्पनी र चिनियाँ सिइच्वाङ हेइच्वाङ कम्पनीको संयुक्त लगानीमा वाग्मतीको पानीबाट विद्युत् उत्पादन गर्न तीव्र गतिमा काम भइरहेको छ । ‘बर्खाले गर्दा केही समय काम रोकिएको थियो,’ आयोजनाका आवासीय इन्जिनियर रत्न बोम्जनले भने, ‘बुधबारदेखि पेनेस्टकको काम सुरु हुन्छ ।’ सिभिल वर्कको करिब ९५ प्रतिशत काम सम्पन्न भइसकेको छ । इलेक्ट्रमेकानिकलको काम पनि ५० प्रतिशतभन्दा बढी भइसकेको छ ।


यहाँ हाल करिब दुई सयजनाले काम गरिरहेका छन् । ‘असारमा काम सम्पन्न गर्ने योजना थियो तर चाँडै नै बर्खा सुरु भएकाले विद्युत् उत्पादन गर्न ६ महिना ढिलाइ हुने भो,’ बोम्जनले भने । वाग्मतीबाट विद्युत् उत्पादन गर्ने यो पहिलो कम्पनी हो । ४ अर्बको लगानीमा आयोजनाको निर्माण कार्य २०७२ जेठबाट सुरु भएको हो । ‘भूकम्प र नाकाबन्दीका कारण निर्माण कार्य सुरुमा अवरुद्ध हुन पुगे पनि अहिले युद्धस्तरमा काम भइरहेको मान्डु हाइड्रो कम्पनीका प्राविधिक सुरज पन्तले बताए । ‘वाग्मती र कोगटेको पानी इपापञ्चकन्या दोभानमा १० देखि १३ मिटर उचाइ ५५ लम्बाइको बाँध बनाएर सुरुङमार्फत इपापञ्चकन्याको बगरबेंसीस्थित विद्युत् गृह पुर्‍याएर विद्युत् उत्पादन गरिन्छ,’ पन्तले भने ।

Yamaha


वाग्मतीको बाँध हुँदै सुरुङबाट प्रतिसेकेन्ड १२ दशमलव ४ क्युसेक पानी बग्ने गर्छ । वाग्मतीमा निर्माण गरिएको बाँधबाट विद्युत् गृह २ हजार ४ सय ४० मिटरको दूरीमा छ । आयोजनाको सिभिल वर्कको साउथ एशियन इन्फ्रास्ट्रक्चरले गरेको हो । कम्पनीले १ अर्ब २९ करोडमा सिभिल वर्कको निर्माण गर्ने ठेक्का लिएको हो ।

‘विद्युत् गृह निर्माणको कार्य चार महिनाभित्रमा सम्पन्न गरिसक्छौं,’ इन्जिनियर योगेश सुवेदीले भने । इलेक्ट्रो मेकानिकलको कामका निम्ति एक दर्जन चाइनिजसहित ५० जना नेपाली कामदार र प्राविधिकहरू खटिएका छन् । दुईवटा रोटर रहने उक्त पावर हाउसका निम्ति आवश्यक पर्ने उपकरणहरू निर्माणस्थलमा पुगिसकेका छन् । उक्त आयोजनाको ६ सय मिटर लामो पेनेस्टक पाइप रहनेछ । ‘स्थानीयबासी र भीमफेदी गाउँपालिकाका अध्यक्ष हिदम लामालगायत जनप्रतिनिधिहरूको सहयोग भएकाले निर्माण कार्यलाई गति दिन सहज भएको छ,’ बोम्जनले भने, ‘यो विद्युत् आयोजनालाई नेपालको नमुना आयोजना बनाउन चाहिरहेका छौं ।’ तोकिएको समयमा नै विद्युत् उत्पादन गरेर प्राधिकरणलाई बिक्री गर्नेछांै । कम्पनीले नेपाल विद्युत् प्राधिकरणसँग वर्षायाममा प्रतियुनिट ४ रुपैयाँ ४० पैसा र हिउँदमा ८ रुपैयाँ ४० पैसामा बिक्री गर्ने सम्झौता गरेको छ ।


आयोजनाले विद्युत् उत्पादन गरेर कुलेखानी प्रथमको सबस्टेसन धोर्सिङको राष्ट्रिय प्रसारण लाइनमा जोड्ने योजना रहेको छ । सबस्टेसनसम्म उत्पादित विद्युत् पुर्‍याउन ४४ वटा टावर निर्माण गरी तार पनि तान्ने काम सम्पन्न भइसकेको छ ।


आयोजनाबाट प्रभावित मकवानपुरको इपापञ्चकन्या, सिस्नेरी, कोगटे र ललितपुरका माल्टा र धुसेल गाविसका बासिन्दालाई कम्पनीले सेयर वितरण गर्ने जनाएको छ ।

Esewa Pasal

प्रकाशित : भाद्र १५, २०७५ ०८:५०
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

काठमाडौं विमानस्थल अब २२ घण्टा

आन्तरिक टर्मिनल बिहान ५ बजेदेखि खुल्ने
सुरज कुँवर

काठमाडौँ — काठमाडौं विमानस्थल शनिबारदेखि २२ घण्टा खुला हुने भएको छ । अब काठमाडौंस्थित विमानस्थल रातिको ३ बजेदेखि ५ बजेसम्मका लागि २ घण्टा मात्रै बन्द हुनेछ ।

त्रिभुवन अन्तर्राष्ट्रिय विमानस्थलले आन्तरिक टर्मिनल बिहान ५ बजेदेखि खुला गर्ने निर्णय गरेको हो । सरकारले जेठ ७ गतेदेखि अन्तर्राष्ट्रिय विमानस्थल सञ्चालनको समयमा अढाइ घण्टा थप्दै २१ घण्टा (बिहान ६ देखि राति ३ बजेसम्म) पुर्‍याएको थियो ।


चाडपर्व र पर्यटकीय सिजन सुरु भएपछि बढ्ने यात्रुको चापलाई व्यवस्थापन गर्न विमानस्थलले ६७ वर्षको इतिहासमा पहिलोपटक आन्तरिक सेवालाई ५ बजेदेखि सुचारु गर्न लागिएको विमानस्थलका महाप्रबन्धक राजकुमार क्षेत्रीले बताए । भूकम्प र टर्किस एयरलाइन्सको विमान काठमाडौं धावनमार्गमा दुर्घटनामा परेको अवस्थामा भने काठमाडौं विमानस्थल केही समयका लागि चौबिसै घण्टा सञ्चालनमा ल्याइएको थियो ।


‘सुरक्षा जाँच, टिकट, यात्रु बोर्डिङ, पाइलटहरूले वायुयान चेकजाँच गर्दागर्दै आन्तरिक उडान भने साढे ५ बजेदेखि सुरु हुनेछन्,’ क्षेत्रीले भने । यसअघि बिहान ६ बजे विमानस्थल खुला हुन्थ्यो तर उडान साढे ६ बजे हाराहारीबाट सुरु हुन्थे । नयाँ व्यवस्थाले पर्वतीय उडान, लुक्लालगायतका पर्यटकीय सहरमा हुने उडानलाई सजिलो हुनेछ । यसबाट जहाजले ग्राउन्ड र आकाशमा भोग्नुपर्ने अत्यधिक होल्डको समय घट्ने अपेक्षा विमानस्थलले गरेको छ ।


विमानस्थलका प्रमुख एयर ट्राफिक कन्ट्रोलर (एटीसी) सीताराम भण्डारीका अनुसार नागरिक उड्डयन प्राधिकरण र विमानस्थलले आन्तरिक उडानका लागि जाडोयाम (सेप्टेम्बर–अक्टोबर) को स्लट (उडान तालिका) बनाइसकेको छ ।


यो तालिकाअनुसार अब रात्रि उडान सुविधा भएका विराटनगर, सिमरा, धनगढी, भैरहवा, नेपालगन्जलगायत सुगम रुटका लागि हुने आन्तरिक उडान बेलुकी ८ बजेसम्म हुनेछन् । ‘दुई महिनाको समीक्षापछि ट्राफिक चाप, यात्रुको सुविधा, उडान सुरक्षालगायतका विषयलाई टेवा पुग्ने गरी आन्तरिक उडानको अर्को स्लट जारी गर्नेछौं,’ प्रमुख एटीसी भण्डारीले भने ।


यसैबीच नेपालमा सबैभन्दा धेरै (दोहा–काठमाडौं दैनिक ५ वटा उडान) गर्दै आएको कतार एयरले शनिबारदेखि राति १ बजे काठमाडौं आइपुग्ने उडान थपेको छ । दोहाका लागि कतार काठमाडौंबाट राति २ बजे फर्किनेछ । कतारबाहेक अन्य विदेशी चार्टर र नयाँ एयरलाइन्सलाई रातिको उडान समय उपलब्ध गराउने तयारी भइरहेको भण्डारीले बताए ।


नेपाल भ्रमण वर्षलाई मद्दत पुग्ने गरी यहाँको विमानस्थल चौबीसै घण्टा सञ्चालन गर्ने योजनाअनुसार संस्कृति, पर्यटन तथा नागरिक उड्डयन मन्त्रालयले गएको चैत १६ गते सयदिने कार्यक्रममार्फत साढे १८ घण्टासम्म सञ्चालन हुँदै आएको काठमाडौं विमानस्थललाई २१ घण्टा (बिहान ६ बजेदेखि राति ३ बजेसम्म) सञ्चालन गर्ने कार्यक्रम घोषणा गरेको थियो । विमानस्थलको समय बढाएपछि रातिको समयमा नयाँ एयरलाइन्सले उडान भने गरेका थिएनन् । मध्य चैतदेखि मध्य कात्तिकसम्म जारी हुने गर्मीयामको समर सेडयुलअनुसार विदेशी एयरलाइन्सले उडान तालिकाको अनुमति लिएकाले थपिएको समयमा नयाँ एयरलाइन्स नआएका हुन् ।


गर्मीयामको तालिका मध्य कात्तिकदेखि सकिन्छ । यसपछि जाडोयामको विन्टर सेडयुल लागू हुन्छ । अहिले गर्मीयामको तालिका (समर सेडयुल) अनुसार ३१ वटा एयरलाइन्स अन्तर्राष्ट्रिय उडानमा छन् । नेपालले ३८ वटा मुलुकसँग हवाई सम्झौता गरे पनि १५ वटा मुलुकका विदेशी एयरलाइन्सले नेपाललाई बाँकी विश्वसँग जोडेका छन् । अन्तर्राष्ट्रिय उडानमा नेपाल वायुसेवा निगमसहित हिमालयन र बुद्ध गरी तीनवटा स्वदेशी एयरलाइन्स छन् ।

प्रकाशित : भाद्र १५, २०७५ ०८:५०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT