पूर्वी पहाडमा हवाई सेवा ठप्प

जितेन्द्र साह

विराटनगर — मोरङस्थित पथरी–शनिश्चरेका ३३ वर्षीय दुर्गा श्रेष्ठ विराटनगरदेखि काठमाडौंसम्म हतपत्ती हवाईजहाजमा यात्रा गर्दैनन् । अपर्झटमा जानै परे नेपाल वायु सेवा निगमको सस्तो दरकै टिकट रोज्छन् ।

नेपाल वायुसेवा निगमको विमानबाट विराटनगर विमानस्थलमा ओर्लेर गन्तव्यतर्फ लाग्दै काठमाडौंबाट आएका यात्रु । तस्बिर : जितेन्द्र साह । कान्तिपुर

अन्य निजी क्षेत्रका विमान सेवाभन्दा प्रतिटिकटमा कम्तीमा हजार रुपैयाँसम्म फरक पर्ने गरेको उनले बताए । ‘तत्कालै ओहोरदोहोर गर्नुपर्दा निगमको विमानले धेरै राहत भएको छ,’ श्रेष्ठले भने ।

निगमको हवाईजहाज थन्किएको बेला त निजी क्षेत्रका लाई दोब्बर भाडा तिरेर उड्नुपर्ने स्थिति रहेको उनले बताए । ‘न त भाडादरको कुनै वैज्ञानिक आधार छ, न त राज्यले अनुगमन नै गरेको छ,’ उनले भने साथै निगमले दिनमा एक पटक मात्र त्यो पनि बिहानीपख विराटनगर–काठमाडौं उडान गर्नुप्रति उनको असन्तुष्टि छ ।

Yamaha

‘एउटा मात्र हवाईजहाज उड्दा टिकट पाउनै कठिन हुन्छ, पाइहाले पनि ९ बजेअगावै उड्ने हुनाले बिहानै विमानस्थलसम्म पुग्ने हतारो हुन्छ,’ श्रेष्ठले भने । झापा गौरादह नगरपालिका ३ की गृहिणी ५६ सुमित्रा विष्टले निगमको टिकट नपाउँदा त बसबाटै ओहोरदोहोर गरेको बताइन् ।

लामो समयदेखि विराटनगरबाट पहाडी क्षेत्रमा निगमको जहाज नउडेकाले यात्रु मर्कामा परिरहेको विष्टले थपिन् । ‘आकस्मिक काम वा विपत् परेका बेला तत्कालै यहाँबाट पहाड जान र उताका यता आउन सक्दैनन्,’ उनले भनिन्, ‘सरकारले चाँडै पहाडतिर पनि जहाज उडाउनुपर्‍यो, निजीवालाले उडाए पनि सर्वसाधारणले भाडै तिर्न सक्दैनन् ।’

विराटनगरस्थित जागृति ट्राभल्स एन्ड टुर्स प्रालिका प्रबन्ध निर्देशक गणेशविक्रम गोलेले निगमले विराटनगर–काठमाडौं दैनिक एक मात्र उडान गर्दा सेवाग्राही मर्कामा परिरहेको बताए । योसँगै हाल विराटनगरबाट पहाडी भेकका लागि निगमले उडान नगरिरहेकाले मानवीय एवं पर्यटकीय रूपले पनि ठूलो नोक्सानी भइरहेको उनले बताए ।

‘निगमले चाँडै पहाडी भेकमा पहिला झैं सातामा दुई/तीन उडान गर्ने जानकारी पाउँदा खुसी लागेको छ,’ ३६ वर्षीय गोलेले भने, ‘पहाडी भेकको पर्यटनलाई बढावा मिल्छ, साथै यो आपतविपदमा सहयोगी पनि बन्छ ।’ हुन त निगमको भन्दा निजी क्षेत्रको विमानको टिकट बेच्दा ट्राभल्स एव टुर्स व्यवसायीलाई बढी फाइदा हुन्छ तर उनले भने, ‘यो सत्य हो तर थोरै टिकट बेचेर धेरै नाफा कमाउनुभन्दा धेरै टिकट बेचेर धेरै कमाउँदा व्यापार लामोसम्म चल्छ ।’ टिकट सस्तिएर धेरैभन्दा धेरैले सहज यात्रा गरून् भन्ने चाहना रहेको गोलेले बताए ।

विमान र चालक अभावमा विराटनगर–काठमाडौं दैनिक एक मात्र उडान हुने गरेको निगमको विराटनगरस्थित कार्यालयका वाणिज्य विभागका क्षेत्रीय प्रबन्धक नारायण पुरीले प्रस्टयाए । ‘काठमाडौंबाट आएको विमान नै पुन: यात्रु बोकेर फर्कन्छ,’ उनले भने, ‘विमानसँगै चालक पनि कम छन् ।’ एक जानकारका अनुसार निगमले करोडौं रुपैयाँ खर्चेर तालिम दिई तयार पारेको चालक अनुभवी भएपछि बढी तलब र सुविधाका लागि निजीतिर लम्किनु यसको कारण हो ।

निगमको बिहानको यो एक मात्र उडानपछि यात्रुले निजी विमान सेवाकै भर पर्नुपर्छ । प्राविधिक कारणले एक महिनायता विराटनगरदेखि पहाडी भेकको हवाई सेवा त ठप्पै भएको उनले बताए । यसअघि यहाँबाट भोजपुर र खोटाङको खानीडाँडासम्म उडान जारी थियो ।

प्रदेश १ को मुख्यमन्त्रीको कार्यालयले समेत निगमसँग पहाडी भेकमा सेवा सुचारु गर्नुका साथै उडान संख्या बढाउन आग्रह गरेको छ । उक्त कार्यालयले विराटनगरलाई आधार बनाएर ताप्लेजुङ, संखुवासभाको तुम्लिङटार, भोजपुर, ओखलढुंगाको रुम्जाटार र खोटाङको लामिडाँडा एवं खानीडाँडासम्म नियमित उडान गर्न भनेको छ ।

Esewa Pasal

प्रकाशित : भाद्र १६, २०७५ ०८:२७
ADVERTISEMENT
प्रतिक्रिया
पठाउनुहोस्
ADVERTISEMENT

प्रदेश राजधानीमा जाम

जितेन्द्र साह

विराटनगर — नयाँ महानगर एवं प्रदेश १ को अस्थायी राजधानी विराटनगरमा सवारी साधनको जाम बढेको छ । प्रदेशसभा सचिवालय वरिपरिका निर्माणाधीन सडकले गर्दा हस्पिटल चोक, रंगशाला एवं जिल्ला प्रशासन कार्यालयको सडकमा सवारीको चाप बढेको हो ।

मुलुकभरिकै निजी एवं सरकारी सवारी गुड्ने धरान–विराटनगर बलभद्र मार्गमा पनि घुइँचो बढ्दो छ । महानगरकै जीवन रेखा मानिने यो मार्गमा मात्रै सबै खाले गरी दिनहुँ झन्डै १ हजार २ सय सवारी साधनको ओहोरदोहोर हुने गरेको पूर्वी नेपाल राष्ट्रिय यातायात व्यवसायी संघको कार्यालयले जनाएको छ ।

‘सवारीको बढिरहेको लाम हेर्दा विराटनगर बल्ल महानगर भए जस्तो अनुभूति हुन थाल्यो,’ हस्पिटल चोकका औषधि व्यवसायी आनन्द सारडा व्यंग्य गर्छन् । अस्थायी राजधानी बनेसँगै गति लिएको राजनीतिक एवं प्रशासनिक गतिविधिले उनकै अघिल्तिरको हस्पिटल मार्गमा दिउँसो १ बजेसम्म र बेलुकी ४ बजेपछि जाम हुन्छ ।

विशिष्ट व्यक्तिको सवारी हुँदा त झनै कडा सुरक्षा प्रबन्धका कारणले यो मार्गलगायत विराटनगरको जनजीवन ठप्प हुन्छ । हालै प्रधानमन्त्री केपी ओलीको सवारी हुँदा यो महानगरको विराटनगर–धरान सडक मुख्य मार्गमा निजी एवं सार्वजनिक वाहन चल्न नदिँदा स्थानीय तनावग्रस्त भए । मुलुकभरिका सवारी साधन यही मार्गबाट प्रवेश गर्ने हुनाले जाम खुलेपछि पनि आवागमन सहज हुन निकै समय लाग्छ ।

मुख्य मार्ग अवरुद्ध भएपछि बिक्री चौपट्ट हुने गरेको स्थानीय सहिद मार्गका मासु व्यवसायी किरण मरिकले बताए । उनी बुंगुरका ताजा मासु बेच्छन् । ‘ठूला मान्छेको भ्रमणका बेला ग्राहक आउन नपाएर ४ हजार ५ सय रुपैयाँ जतिको मासु बाँकी रहन्छ,’ उनले भने, ‘फ्रिजमा राखिदिन्छु, अर्को दिन बिहान बिक्री गर्छु ।’

यो महानगरमा हालै र त्यसअघि पनि विस्फोटका घटना भइसकेकाले सुरक्षा निकायले भीआईपीको भ्रमणमा आवश्यक सुरक्षा सतर्कता अपनाउँछ । गृहमन्त्रालयबाटै कडा निर्देशन आउने गरेको एक प्रहरी अधिकृतले बताए । ‘वरिपरिका सडक बनिनसकेकाले मुख्य मार्ग प्रयोग गर्नु परेको हो, अन्यत्र कहाँबाट लाने समस्या छ,’ ती अधिकृतले भने, ‘भीआईपीको कार्यक्रम पूर्वनिर्धारित हुन्छ, त्योअनुरूप गन्तव्यसम्म पुर्‍याउने प्रबन्ध मिलाउनुपर्छ ।’

प्रधानमन्त्री एवं राष्ट्र प्रमुखको सवारी हुँदा विराटनगर विमानस्थलदेखि नै मुख्य सडकको दुवैतिर र यस मार्गसँग जोडिने बाटाहरूको मुखैमा बिहानदेखि उल्लेखनीय संख्यामा सुरक्षाकर्मी तैनाथ हुन्छन् । जननिर्वाचित प्रधानमन्त्रीकै भ्रमणको बेला सडकको छेउछाउमा जनतालाई उभिन समेत नदिनु, घर निर्माण र पसलमा काम गरिरहेका श्रमिकलाई काम गर्नबाट रोक्नु अन्याय भएको स्थानीयको बुझाइ छ ।

हाल विमानस्थलदेखि सीमावर्ती विराटनगरको रानीसम्म सडक, नाला एवं पेटी निर्माण जारी छ । विकास र व्यापार विस्तारको सम्भावनासँगै उक्त मुख्य मार्ग छेउछाउमा सपिङ मल, घर र सटर निर्माणले गति लिएको छ ।

प्रकाशित : भाद्र १५, २०७५ ११:१३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT