सामूहिक कृषि उत्पादनमा युवा

हरि गौतम

रुकुम पश्चिम — चौरजहारी नगरपालिकाका युवा सामूहिक कृषि तथा पशु उत्पादनमा जुटेका छन् । चौरजहारी–५, ६ र १० नम्बर वडाका युवा मिलेर तरकारी उत्पादन, बाख्रा र भैंसीपालन थालेका हुन् ।

रुकुम पश्चिम चौरजहारी ५ का युवाहरूद्वारा सञ्चालित सामूहिक भैंसी फार्म । तस्बिर : हरि गौतम

वडा नम्बर ५ र ६ का ८ जना युवा मिलेर ६ नम्बर वडाको शान्ति बजारमा तरकारी खेती सुरु गरेका छन् । आफ्नै लगानीमा ५ वटा टनेलमार्फत उनीहरूले व्यावसायिक तकारी खेती थालेका हुन ।

८ रोपनी जग्गा भाडामा लिई टमाटर, अकबरे खुर्सानी, चाइनिज बोडी र भान्टाको खेती सुरु गरेका छन् । पुर्खाहरूको निर्वाहमुखी पेसाले हालको समयमा नपुग्ने भएपछि व्यावसायिक तरकारी खेती सुरु गरेको चुस्कु रोकाले बताए । ‘हामीले आफैं लगानी गरी तकारी उत्पादन सुरु गरेका छौं,’ उनले भने, ‘यसलाई ठूलो परिमाणमा पुर्‍याउने लक्ष्यसहित अघि बढेका छौं । रोजगारीका लागि विदेश गई फर्किएका र गाउँमै बेरोजगार बसेका युवाहरू मिलेर व्यावसायिक तरकारी उत्पादन सुरु गरेको उनले बताए ।

सात युवा मिलेर ५ नम्वर वडामा व्यावसायिक दूध उत्पादनका लागि भैंसीपालन सुरु गरेका छन् । ११ वटा भैंसी खरिद गरी दूध उत्पादन सुरु गरेका उनीहरूले एक वर्षमा भैंसी र दूध उत्पादन बढाउनले लक्ष्य लिएका छन् चौरजहारी नगरपालिकासँगको साझेदारीमा उनीहरूले भैंसीपालन सुरु गरेका हुन् ।

Yamaha

हाल ४ वटा भैंसीको दूध बिक्री वितरण गर्छन् भने ७ वटा भैंसी ब्याउनेछन् । चौरजहारी उपत्यकालाई दूध पुर्‍याउने लक्ष्यसहित भैंसीपालन सुरु गरेको गोरख रावतले बताए । ‘बजारमा दूध नपुगेको अवस्थामा हामीहरू काम नपाएको अवस्थामा व्यवसाय सुरु गरिएको हो,’ उनले भने, ‘व्यवसायबाट दूधको माग पूरा हुने र हामी स्वरोजगार बन्ने अपेक्षा छ ।’

चौरजहारी–१० का युवाहरू मिलेर बाख्रापालन सुरु गरेका छन् । मासु उत्पादनका लागि प्राविधिकको सल्लाहबमोजिम बाख्रापालन सुरु गरिएको उनीहरूले बताएका छन् । ६० वटा बाख्राबाट व्यावसायिक रुपमा बाख्रापालन सुरु गरिएको रोशन रानाले बताए । ‘ यो क्षेत्र बाख्रापालनका लागि उपयुक्त हो भन्ने पुष्टि भएपछि बढ्दो मासुको मागलाई पूर्ति गर्न बाख्रापालन सुरु गरिएको रानाको भनाइ छ । उनीहरूजस्तै नगरका अन्य वडामा पनि व्यावसायिक तरकारी तथा पशु उत्पादनको सुरुआत हुन लागेको नगरपालिकाले जनाएको छ ।

चौरजहारी नगरपालिकाले किसानले उत्पादन गरेका कृषि तथा पशुजन्य वस्तु खरिद गर्ने नीति बनाएपछि किसान तथा युवाहरू हौसिएका छन् । नगर प्रमुख विशाल शर्माले कृषि तथा पशु उत्पादनको सुरुआती चरणदेखि बिक्री वितरण गर्नसम्म नगरपालिकाले सहयोग गर्ने बताए । ‘हाम्रो गाउँठाउँको आयस्रोत भनेकै कृषिउपज हो,’ उनले भने, ‘त्यसैले हाम्रो नगरपालिकाले कृषि उत्पादनमा लाग्न र त्यसैबाट जनता र नगरलाई समृद्ध बनाउने उद्देश्य छ ।’

चौरजहारी नगरपालिकाले कृषि तथा पशु उत्पादन तथा बजारीकरणमा किसानलाई सघाउन भन्दै चालु आर्थिक वर्षका लागि एक करोड १५ लाख रुपैयाँ बजेट विनियोजन गरिएको छ । किसानलाई अनुदान, ऋण, तथा समायोजनको साथै उनीहरूको उत्पादन किन्नका लागि पनि बजेटको व्यवस्था गरिएको नगर प्रमुख शर्माले बताए ।

Esewa Pasal

प्रकाशित : भाद्र १७, २०७५ ०९:१९
ADVERTISEMENT
प्रतिक्रिया
पठाउनुहोस्
ADVERTISEMENT

नेपालको कठिन जित

कान्तिपुर संवाददाता

काठमाडौँ — नेपालले एसिया कप छनोटमा पहिलो जित हात पारेको छ । पहिला दुई खेलमा पराजित भएको नेपालले मलेसियामामाथि शनिबार १९ रनको कठिन जित हात पार्दै एसिया कपमा पुग्ने आशालाई जीवितै राखेको छ ।

एसिया कप छनोटअन्तर्गत मलेसियाविरुद्ध ब्याटिङ गर्दै नेपालका ब्याट्सम्यान आरिफ शेख । तस्बिर : एसीसी

वर्षाका कारण ३० ओभरमा छोट्याइएको खेलमा टस हारेपछि ब्याटिङ गर्न आएको नेपालले ७ विकेट गुमाई १ सय ८८ रन बनायो । नेपाललाई कडा चुनौती दिएको घरेलु टोली मलेसियाले ९ विकेट गुमाई १ सय ६९ रनमात्र बनाउन सक्यो । नेपाल पहिलो दुई खेलमा ओमान र यूएईसँग पराजित भएको थियो ।

दिनको खेलका अन्य नतिजाले अंक तालिकालाई रोमाञ्चित बनाउनुका साथै नेपालको झिनो आशालाई पनि ब्युँत्याएको हो । ओमानले सिंगापुरलाई ८ विकेटले पराजित गरी फाइनलमा पुग्ने सम्भावनालाई बलियो बनायो । ओमानको यो लगातार तेस्रो जित हो । राउन्ड रोबिनमा ६ टोली प्रतिस्पर्धा गरेपछि शीर्ष दुई टोली फाइनलमा खेल्नेछन् र विजेता टोली एसिया कपमा पुग्नेछ ।

सिंगापुरले बनाएको २१५–८ को स्कोरलाई ओमानले २७ ओभरभित्र पूरा गरेको हो । रनरेट निकै राम्रो भएका कारण पनि ओमानको फाइनल सम्भावना बलियो देखिएको हो । अर्को खेलमा हङकङले यूएईलाई १ सय ८२ रनले पराजित गर्‍यो । बाबर हायत र कप्तान अंशुमन रथको शतकपछि हङकङले ४९ ओभरमा छोट्याइएको खेलमा ८ विकेट गुमाई २ सय ७५ रन बनायो । पहिलो दुई खेल जितेको यूएई जवाफमा २५ ओभरभित्र ९३ रनमा अलआउट भयो ।

नेपालले फाइनलमा पुग्ने आशालाई जीवितै राख्न सिंगापुर र हङकङसँग बाँकी रहेका दुवै खेल राम्रो अन्तरमा जित्नुपर्ने हुन्छ । ओमानले हङकङ र यूएई, यूएईले मलेसिया र ओमान तथा हङकङले ओमान र नेपालसँग खेल्न बाँकी छ । ओमानले दुवै खेल जितेमा नेपालको फाइनल पुग्ने सम्भावना बन्नेछ । नेपालले सिंगापुरसँग आइतबार खेल्नेछ ।

तुलनात्मक रूपमा कमजोर मानिएको मलेसियासँग पनि नेपालको प्रदर्शन सन्तोषजनक हुन सकेन । नेपालले ६० रन बनाउँदा सुवास खकुरेल (९), ज्ञानेन्द्र मल्ल (११), कप्तान पारस खडका (१३), अनिलकुमार शाह (१६), सागर पुन (०) पेभेलियन फर्किसकेका थिए । दीपेन्द्रसिंह ऐरी र आरिफ शेखले ८८ बलमा १ सय १ रन जोडेपछि मात्र नेपाल जोगिएको थियो ।

वायुमास ओभल मैदानमा दीपेन्द्रका लागि फेरि यादगार बनेको थियो । १० महिनाअघि उनले यही मैदानमा भारत यू–१९ विरुद्ध नेपाल यू–१९ लाई स्मरणीय १९ रनको जित दिलाउने क्रममा ८८ रन बनाउनुका साथै २ विकेट लिएका थिए । उनले शनिबार पनि त्यस्तै प्रदर्शनलाई निरन्तरता दिंदै म्यान अफ द म्याच प्रदर्शन गरे । उनले ५१ बलमा ५४ रन बनाउनुका साथै ६ ओभरमा २५ रनमात्र खर्चेर १ विकेट लिए । दीपेन्द्रले ६ चौका र १ छक्का प्रहार गरे ।

आरिफ ६४ रन बनाई अविजित रहे । उनले ४८ बलको इनिङ्समा ५ चौका र २ छक्का प्रहार गरे । सोमपाल कामी पनि पहिलो बलमा आउट भए भने वसन्त रेग्मीले नटआउट ६ रन बनाए । मलेसियाका सियाजरुल इद्रुस र सर्भिन मुनिएन्डीले ३–३ विकेट लिए ।

मलेसियाले आक्रामक सुरुआत गरे पनि नियमित जस्तो विकेट गुमाइरहँदा नेपाललाई सजिलो भयो । ओपनर अनबर अरुद्दिन र सैयद अजिजले समान ३४ रन बनाए । अरुद्दिनले ४० बल र अजिजले २५ बल खेली समान ३ चौका र २ छक्का प्रहार गरे । कप्तान अहमद फैजले २८ बलमा २ चौका र १ छक्का प्रहार गरी २२ र वीरनद्वीप सिंहले ३४ बलमा २१ रन बनाए ।

नेपालबाट देब्रेहाते स्पिनर वसन्त रेग्मीले ३ विकेट लिए । उनले ६ ओभरमा ३६ रन खर्चेका थिए । सन्दीप लामिछानेले ६ ओभरमा १ मेडन राख्दै २० र सोमपाल कामीले ६ ओभरमा ३९ रन खर्चेर समान २ विकेट लिए । सागरको नाममा १ विकेट रह्यो ।

प्रकाशित : भाद्र १७, २०७५ ०९:१४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT