‘एभरेष्ट डे’ हाइकमा उल्लेख्य सहभागिता

किसन राई

हङकङ — एभरेष्ट हाइकको सफलताले उत्साहित हङकङका नेपाली कन्सुल जनरल कमलप्रसाद भट्टराईले ‘एभरेष्ट डे’लाई अन्तर्राष्ट्रिय ब्राण्डको रुपमा विकसित गर्नुपर्ने बताएका छन् ।

सेन्ट्रलस्थित अब्जरभेसन ह्विलअघि हाइक शुरु हुनुअघि आयोजक तथा सहभागीहरु ।

‘गैरनेपालीको सहभागिता उल्लेखनीय रुपमा रह्यो जसलाई कार्यक्रमको सफलताको रुपमा लिन सकिन्छ,' कन्सुल जनरल भट्टराईले भने, ‘हङकङबाट शुरु भएको यसलाई अन्तर्राष्ट्रिय ब्राण्डको रुपमा विकसित गर्नुपर्ने सुझाव म सरकार समक्ष पेश गर्नेछु ।’

उनका अनुसार यस कार्यक्रमबाट पर्यटनलगायतको प्रचार गर्दा प्रभावकारी हुने देखिएको छ । गैरनेपाली सहभागीलाई नेपालको पर्यटनलगायत विविध जानकारीमूलक सामग्रीसहितको नेपाली झोला प्रदान गरिएको थियो ।

‘एभरेष्ट डे’को अवसरमा नेपाली कन्सुलेट जनरल र गैरआवासीय नेपाली संघ (एनआरएनए) को संयुक्त आयोजना रहेको ‘एभरेष्ट हाइक’मा विभिन्न देशका कुटनीतिक नियोगका प्रतिनिधि, स्थानीय सरकार र विभागका प्रतिनिधि, विभिन्न विश्वविद्यालयका प्राध्यापक तथा विद्यार्थी, संघसंस्थाका पदाधिकारी तथा प्रतिनिधिलगायत तीन सयको हाराहारीमा सहभागिता रहेको थियो । सहभागी मध्ये लगभग ४० प्रतिशत गैरनेपालीको रहेको देखिन्थ्यो ।

एनआरएनएका अध्यक्ष राधिका गुरुङ पनि आयोजनाबाट सन्तुष्ट देखिइन् । उनका अनुसार नेपाल र नेपालीका बारेमा गैरनेपालीलाई जानकारी दिन पाइने कार्यक्रमलाई वार्षिक क्यालेन्डरको रुप दिइने छ । समापनमा नेपाली परिकार खाजाको रुपमा प्रदान गरिएको थियो ।
कार्यक्रमबाट नेपाली एकता प्रदर्शन हुने उनको ठहर रहेको छ । नेपाल सरकारबाट मान्यता प्राप्त विश्वभर सञ्जाल रहेको एनआरएनए र सरकारी निकायबीच सहकार्य आवश्यक रहेकोमा उनले जोड दिइन् ।

सेन्ट्रलस्थित अब्जरभेसन ह्वीलबाट द पिकसम्म ९.८ किलोमिटरको हाइक पूरा गर्नेलाई मेडल प्रदान गरिएको थियो । एकातिर एभरेष्ट हाइक र अर्कोतिर गैरआवासीय नेपाली संघको लोगो अंकित आकर्षक मेडल प्राप्त गर्दा सहभागीहरु रोमाञ्चित भएका थिए ।
विश्वको सर्वोच्च शिखर सगरमाथामा पहिलो पटक मानव पाइला टेकिएको मे २९ लाई ‘एभरेष्ट डे’ को रुपमा मनाइने गरिएको छ । उक्त अवसर पारेर हङकङमा गत वर्षदेखि हाइकको आयोजना गर्न शुरु गरिएको हो ।


प्रकाशित : जेष्ठ १६, २०७५ १३:१४
ADVERTISEMENT
प्रतिक्रिया
पठाउनुहोस्

महराले झाडु लगाएर सुरु गरे स्वच्छ वातावरण महाअभियान 

कान्तिपुर संवाददाता

काठमाडौँ — सभामुख कृष्णबहादुर महराले शंखापार्कमा झाडु लगाएर स्वच्छ वातावरण महाअभियान–२०७५ सुरु गरेका छन् ।

तस्बिर : सभामुख कृष्णबहादुर महराको सुचिवालय ।

विश्व वातावरण दिवसको सन्दर्भ पारेर वन तथा वातावरण मन्त्रालयको पहलमा बुधबारदेखि स्वच्छ वातावरण महाअभियान सुरु भएको हो । सभामुख महराले काठमाडौंस्थित शंखपार्कको सडकमा झाडु लगाएर यसको उद्घाटन गरे ।

'स्वच्छ वातावरण निर्माणका लागि आफैबाट सरसफाइको शुरुवात गर्नुपर्छ' उनले भने, ‘सरसफाइ आफूबाटै शुरु गरौं, एक–एक इकाईबाट समूह बन्छ र त्यसले संस्थागत रुप लिन्छ ।'

सरसफाई आम नागरिकको स्वास्थ्य, इज्जत, स्वस्थ र सबल जनशक्ति निर्माणसँग जोडिएको भन्दै उनले वातावरण दिवसकै दिनदेखि शुरु भएको अभियानले स्वच्छ देश निर्माणको यात्रालाई सफल बनाउने विश्वास व्यक्त गरे ।

सरसफाई कार्यक्रम अन्तर्गत शंखपार्कबाट सडक छेउछाऊको फोहर उठाउँदै शुरु भएको कार्यक्रम विशालनगर चोक हुँदै धुम्बाराही, पीपलबोटबाट पुन: शंखपार्कमा पुगेर समापन गरिएको थियो । सरसफाइ कार्यक्रममा सभामुख महराका साथै वन तथा वातावरण मन्त्री शक्तिबहादुर बस्नेत, मन्त्रालयका सचिव, कर्मचारी, सुरक्षाकर्मी र उल्लेख्य सर्वसाधारणको उपस्थिति रहेका थिए ।

प्रकाशित : जेष्ठ १६, २०७५ १२:५९
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT