मकाओमा आत्महत्या प्रयास गर्नेलाई कन्सुल जनरलले भेटे

किसन राई

हङकङ — मकाउमा आत्महत्याको प्रयास गर्ने ईश्वर थिङलाई नेपाली कन्सुल जनरल कमलप्रसाद भट्टराईले भेटेका छन् । प्रहरीको कडा निगरानीमा स्थानीय सान्तोङ अस्पतालमा उपचाररत उनीसंग कसैलाई भेट्न दिइएको थिएन ।

उपचाररत ईश्वर थिङलाई भेट्न पुगेका नेपाली कन्सुल जनरल कमलप्रसाद भट्टराई र एनआरएनए मकाउकी अध्यक्ष शान्ति अधिकारी ।

कन्सुल जनरल भट्टराईसंगै रहेकी गैरआवासीय नेपाली संघ (एनआरएनए) की अध्यक्ष शान्ति अधिकारीका अनुसार थिङको अवस्था सामान्य रहेको छ । घाटीको घाउमा खाटा बसिसकेको भएपनि प्लास्टिकको पाइप लगाइएकोले बोल्न कठिनाइ रहेको छ ।

Yamaha

उपचारकै क्रममा पनि उनले आत्महत्याको प्रयास गरेको चिकित्सकले बताएका छन् । घाटीमा प्वाल पारेर लगाइएको प्लास्टिकको पाइप निकालेर फ्याकेको कारण उनको उपचारमा ढिलाइ भएको हो ।
उपचारपछि स्थानीय कानुन अनुसार उनीमाथि छानबिन हुने छ । आत्महत्या पनि अपराध हुने भएकोले सोही बमोजिमको कार्वाही हुने संभावना छ । कार्वाही पश्चात् उनलाई मकाउ निकाला गरिने छ, उनी स्वयं पनि नेपाल फर्कन चाहन्छन् ।

उनलाई पठाउने काठमाडौंस्थित देवान कन्सल्टेन्ट्स प्रालिले मकाउ आउन लागेको सम्पूर्ण रकम फिर्ता दिने आश्वासन दिएको छ । मकाउ प्रतिनिधि एल.जे. लामेइरसले उक्त कम्पनीसंग सम्पर्क भइरहेको बताएका छन् ।
कागजी रुपमा देवान कन्सल्टेन्ट्स प्रालि भए पनि काठमाडौंका विशाल थपलिया र मकाउका युवराज न्यौपानेमार्फत सम्पर्क भएको कारण सम्पूर्ण रकम फिर्ता हुनेमा भुक्तभोगीहरु आशंका व्यक्त गर्छन् ।

अघिल्लो महिना मात्र कामको लागि आइपुगेका २६ वर्षीय ईश्वर थिङ मकवानपुरका हुन् । १२ लाख खर्च गरेर आएका उनी सम्झौता अनुसार सुविधा नभएपछि खुसी नभएको निकटकाले बताउने गरेका छन् । ग्लोबल सेक्युरिटि म्यानेजमेन्ट लिमिटेडमा कार्यरत १२ जनालाई एउटै फ्लाटमा कोचिएको उनले गुनासो सुनाउने गरेका थिए ।

काममा लागेको केही दिनमै विरामी विदामा बसेपछि कम्पनीबाट दुर्व्यवहार र मानसिक यातना दिइएको सहकर्मीहरुलाई उनले बताउने गरेका थिए । अनुसन्धान भइरहे पनि घटनाको कारण मानसिक यातना र अनावश्यक दवाव रहेको अनुमान गरिएको छ । आत्महत्याको प्रयासमा उनले ज्येष्ठ १९ का दिन कोठामै चक्कुले घाटी रेटेका थिए ।

प्रकाशित : असार ३, २०७५ १२:४६
ADVERTISEMENT
प्रतिक्रिया
पठाउनुहोस्

‘एभरेष्ट डे’ हाइकमा उल्लेख्य सहभागिता

किसन राई

हङकङ — एभरेष्ट हाइकको सफलताले उत्साहित हङकङका नेपाली कन्सुल जनरल कमलप्रसाद भट्टराईले ‘एभरेष्ट डे’लाई अन्तर्राष्ट्रिय ब्राण्डको रुपमा विकसित गर्नुपर्ने बताएका छन् ।

सेन्ट्रलस्थित अब्जरभेसन ह्विलअघि हाइक शुरु हुनुअघि आयोजक तथा सहभागीहरु ।

‘गैरनेपालीको सहभागिता उल्लेखनीय रुपमा रह्यो जसलाई कार्यक्रमको सफलताको रुपमा लिन सकिन्छ,' कन्सुल जनरल भट्टराईले भने, ‘हङकङबाट शुरु भएको यसलाई अन्तर्राष्ट्रिय ब्राण्डको रुपमा विकसित गर्नुपर्ने सुझाव म सरकार समक्ष पेश गर्नेछु ।’

उनका अनुसार यस कार्यक्रमबाट पर्यटनलगायतको प्रचार गर्दा प्रभावकारी हुने देखिएको छ । गैरनेपाली सहभागीलाई नेपालको पर्यटनलगायत विविध जानकारीमूलक सामग्रीसहितको नेपाली झोला प्रदान गरिएको थियो ।

‘एभरेष्ट डे’को अवसरमा नेपाली कन्सुलेट जनरल र गैरआवासीय नेपाली संघ (एनआरएनए) को संयुक्त आयोजना रहेको ‘एभरेष्ट हाइक’मा विभिन्न देशका कुटनीतिक नियोगका प्रतिनिधि, स्थानीय सरकार र विभागका प्रतिनिधि, विभिन्न विश्वविद्यालयका प्राध्यापक तथा विद्यार्थी, संघसंस्थाका पदाधिकारी तथा प्रतिनिधिलगायत तीन सयको हाराहारीमा सहभागिता रहेको थियो । सहभागी मध्ये लगभग ४० प्रतिशत गैरनेपालीको रहेको देखिन्थ्यो ।

एनआरएनएका अध्यक्ष राधिका गुरुङ पनि आयोजनाबाट सन्तुष्ट देखिइन् । उनका अनुसार नेपाल र नेपालीका बारेमा गैरनेपालीलाई जानकारी दिन पाइने कार्यक्रमलाई वार्षिक क्यालेन्डरको रुप दिइने छ । समापनमा नेपाली परिकार खाजाको रुपमा प्रदान गरिएको थियो ।
कार्यक्रमबाट नेपाली एकता प्रदर्शन हुने उनको ठहर रहेको छ । नेपाल सरकारबाट मान्यता प्राप्त विश्वभर सञ्जाल रहेको एनआरएनए र सरकारी निकायबीच सहकार्य आवश्यक रहेकोमा उनले जोड दिइन् ।

सेन्ट्रलस्थित अब्जरभेसन ह्वीलबाट द पिकसम्म ९.८ किलोमिटरको हाइक पूरा गर्नेलाई मेडल प्रदान गरिएको थियो । एकातिर एभरेष्ट हाइक र अर्कोतिर गैरआवासीय नेपाली संघको लोगो अंकित आकर्षक मेडल प्राप्त गर्दा सहभागीहरु रोमाञ्चित भएका थिए ।
विश्वको सर्वोच्च शिखर सगरमाथामा पहिलो पटक मानव पाइला टेकिएको मे २९ लाई ‘एभरेष्ट डे’ को रुपमा मनाइने गरिएको छ । उक्त अवसर पारेर हङकङमा गत वर्षदेखि हाइकको आयोजना गर्न शुरु गरिएको हो ।


प्रकाशित : जेष्ठ १६, २०७५ १३:१४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT