अस्ट्रेलियाले घटायो आप्रवासीको संख्या

यसवर्ष करिब १ लाख ६३ हजारलाई मात्र प्रवेशको अनुमति पाएका छन् । गतवर्ष करिब १ लाख ८४ हजारले आप्रवासीका रुपमा प्रवेशको अनुमति पाएका थिए । अध्यागमन विभागको तथ्यांकअनुसार सबैभन्दा धेरै स्किल माइग्रेसन कार्यक्रमअन्तर्गत प्रवेश पाउनेहरुको संख्या करिब १२ हजारले कम गरिएको छ भने पारिवारिक शीर्षकअन्तर्गत आउनेहरुको संख्या करिब ९ हजारले कम भएको छ ।

अस्ट्रेलियाले हरेक वर्ष निश्चित संख्यामा आप्रवासीहरुलाई अस्ट्रेलिया प्रवेशको अनुमति दिने गरेको छ ।

अस्ट्रेलियाका अध्यागमन मन्त्री पिटर डट्टनले आप्रवासीहरुको संख्या कम हुनुमा अध्यागमन विभागको चुस्त कार्य र आवेदकको झुठो आवेदनका कारण रहेको बताए । उनले देशको भलाईका लागि आप्रवासीहरुको संख्या कम गर्नुपर्ने बताउँदै आएका छन् । अस्ट्रेलिया प्रवेश पाएपछि उपलब्ध सेवा लिनेभन्दा पनि सरकारलाई केही योगदान दिनेहरुको आवश्यक्ता रहेको उनको भनाइ थियो ।

अस्ट्रेलियामा सबैभन्दा धेरै आप्रवासीको संख्या भारतबाट रहेको छ भने त्यसपछि चीन र बेलायतका छन् ।