साथी बचाउन २५० किलोमिटर पदयात्रा

नारायण खडका

अस्ट्रेलिया — क्यान्सरपीडित, त्यो पनि ब्रेन क्यान्सरको तेस्रो स्टेजमा पुगेर बाँच्ने संघर्ष गरिरहेको साथी बचाउन केसम्म गर्न सकिन्छ ? सिड्नीका एक अस्ट्रेलियाली नागरिकले आफ्ना नेपाली साथीको उपचारमा सहयोग जुटाउन २ सय ५० किलोमिटर जंगल पदयात्रा गर्दै छन् । त्यो पनि लगातार १० दिनसम्म ।

Yamaha

९ वर्षअघि विद्यार्थी भिसामा श्रीमतीसहित अस्ट्रेलिया आएका काठमाडौंका विदुर कर्माचार्यलाई ३ महिनाअघि ब्रेन क्यान्सर भएको पत्ता लाग्यो ।

सामान्य टाउको मात्र दुख्ने समस्या रहेका उनी अचानक अस्वस्थ बनेपछि अस्पताल गए । उपचार क्रममा क्यान्सर लागेको थाहा भयो ।

सामान्य काम गरेर जीविका चलाइरहेका २ साना नानीका अभिभावक उनलाई आर्थिक भार त पर्‍यो नै, जीवन कसरी व्यवस्थित बनाउने समस्या थपियो । उनीहरूको समस्याबाट परिचित विदुरका अस्ट्रेलियाली साथी म्याट लोयडले सहयोग जुटाउने नयाँ उपाय निकाले ।

विदुरकै लागि भनेर न्युकासलदेखि सिडनीसम्म २ सय ५० किलोमिटर जंगल पैदलयात्रा गर्ने र न्यूनतम १० हजार डलर (करिब ८ लाख रुपैयाँ) सहयोग संकलन गरिदिने ।

म्याटले एक वेबसाइटमार्फत आफ्नो पैदलयात्राका लागि सहयोग जुटाउन आह्वान गरेका छन् । उनले अहिलेसम्म झन्डै ९ हजार ५ सय डलरभन्दा बढी सहयोग संकलन गरिसकेका छन् । उनको पदयात्रा २३ तारिखमा १० दिनपछि टुंगिनेछ ।

म्याट विदुरलाई नेपालमै भेटेको र अत्यन्तै मिल्ने साथी भएकाले पनि आफू सहयोग संकलनमा लागेको सुनाउँछन् । ‘विदुरजस्तो टिपिकल नेपाली साथी पाउन एकदमै मुस्किल पर्छ ।’ उनले कान्तिपुरसँग भने, ‘यसैका लागि पनि म उनलाई बचाउन र परिवारलाई सहयोग पुर्‍याउन यो अभियानमा लागेको हुँ ।’

म्याटले सुरु गरेको यो अभियानमा करिब १ सय जनाले न्यूनतम १० डलरदेखि ५ सय डलरसम्म सहयोग गरिसकेका छन् । सहयोग अभियान अझै २ साता बढी चल्ने भएकाले थप रकम जुट्ने विश्वासमा उनी छन् ।

भन्छन्, ‘यो अभियानको उद्देश्य सहयोग जुटाउने भए पनि साथीका लागि हामीले चाह्यौं भने धेरै गर्न सकिन्छ भन्ने भावनाको विकास गर्नु पनि हो ।’

उनी यही सेप्टेम्बर २३ तारिखमा ५० वर्ष पुग्दै छन् र आफू ५० वर्ष पुगेको खुसियाली विदुरसँगै अस्पतालमा गएर मनाउने योजनामा छन् । ‘मैले आफ्नो जन्मदिन प्रिय नेपाली साथी जो बाँच्नका लागि संघर्षरत छ, उससँग मनाउन पाउनु ठूलो अवसर हुनेछ ।’

सिडनीबाट ५ घण्टाको दूरीमा रहेको डब्बोमा बसोबास गर्ने विदुर ३ महिनादेखि उपचार क्रममा अस्पतालमै छन् । विशेषज्ञ डाक्टरहरूबाट नियमित उपचार गराइरहनुपर्ने आर्थिक संकटबाट गुज्रिरहेको भए पनि उनीहरूले कसैलाई सार्वजनिक रूपमा सहयोगको आग्रह गरेका छैनन् ।

उपचारमा नियमित सहयोग पुर्‍याइरहेकी उनकी श्रीमती बिनु महर्जनले म्याटको अभियानमा सहयोग पुर्‍याउन र उनको पैदलयात्रा टुंगिने दिन सिडनीको सर्कुलर कि मा उपस्थित भइदिन आग्रह गरेकी छन् ।

Esewa Pasal

प्रकाशित : भाद्र २२, २०७५ १५:०४
ADVERTISEMENT
प्रतिक्रिया
पठाउनुहोस्

अस्ट्रेलियामा बढदै नेपालीको आत्महत्या

‘कामको धपेडी, समयसीमाको चिन्ता, सम्बन्धमा आउने जटिलता, आर्थिक समस्या प्रमुख कारण’
नारायण खडका

अस्ट्रेलिया — अध्ययनका लागि अस्ट्रेलियाको ब्रिसबन पुगेका एक नेपाली विद्यार्थीले मंगलबार आत्महत्या गरे । चार महिनाअघि मात्र नेपालबाट आएर जेम्स कुक युनिभर्सिटीमा अध्ययनरत उनले आत्महत्या गर्नुको कारण खुलेको छैन ।

प्रतिकात्मक तस्बिर

करिब दुई महिनाअघि पनि सिड्नीमा अध्ययनरत गिरी थरकी नेपाली युवतीले आत्महत्या गरेकी थिइन् । उनको शव समुद्र किनारमा भेटिएको थियो ।

पछिल्लो डेढ वर्षमा अस्ट्रेलिया पढ्न आएका १२ विद्यार्थीले आत्महत्या गरिसकेका छन् । अस्ट्रेलियाको अनुसन्धान संस्था हेडस्पेस र नेसनल युनियन अफ स्टुडेन्टसले २०१७ को अन्त्यमा गरेको सर्वेक्षणमा ३५ प्रतिशत विद्यार्थीले आफैँलाई हानि पुर्‍याउने सोच राख्ने गरेको सार्वजनिक गरेको थियो । उक्त अध्ययनमा १७ देखि २५ वर्ष उमेरका २ हजार ६ सय विद्यार्थी सहभागी थिए ।

अध्ययनमा धेरै देशका विद्यार्थी थिए, जसमा नेपाली पनि थिए । ‘कामको धपेडी, समयसीमाको चिन्ता, सम्बन्धमा आउने जटिलता, आर्थिक कारणलगायत समस्या छन्,’ सर्वेक्षणमा देखाइएको छ । सर्वेक्षणमा सहभागी ६५ प्रतिशत विद्यार्थीले आफू उच्च मानसिक तनावमा परेको बताएका थिए । त्यसमध्ये आधाले समयमा निद्रा नपर्ने, काम गर्न मन नलाग्ने, बेकारमा आएको जस्तो लाग्ने, अब कसरी फर्कौं र घरमा के भन्ने जस्ता कुराले तनाव हुने गरेको बताएका थिए ।

सजिलै उच्च शिक्षा र गतिलो आर्थिक कमाइ हुने आसमा आउनेहरू त्यस्तो नपाउँदा निराश हुने गर्छन् । यस्ता विद्यार्थीलाई बेलैमा परामर्शको अभाव हुने गरेको छ । अस्ट्रेलियाभरि झन्डै २ सय हाराहारी नेपाली संगठन भए पनि त्यस्ता विद्यार्थीलाई सहयोग पुर्‍याउन उल्लेख्य कार्य गरेका छैनन् । एनआरएनलगायत संस्थाले गरेको पहल पनि प्रभावकारी बन्न सकेको छैन । नेपाली दूतावासले समेत यस विषयमा केही गर्न सकेको छैन ।

विद्यार्थीहरूको संस्था ‘अस्ट्रेलियन फेडेरेसन अफ इन्टरनेसनल स्टुडेन्ट्स’ ले केही समयअघि सिनेट इन्क्वायरीलाई बुझाएको एक रिपोर्टमा अस्ट्रेलिया सरकारलाई अन्तर्राष्ट्रिय विद्यार्थीको मानसिक स्वास्थ्यबारे अनुसन्धान गर्न आग्रह गरिएको थियो । उक्त रिपोर्टपछि अस्ट्रेलियामा विभिन्न विश्वविद्यालय र प्राध्यापकको ध्यान यसमा तानिएको छ ।

अस्ट्रेलियाबारे पूर्वजानकारी नलिईकन आउँदा समस्या हुने गरेको एक विद्यार्थी बताउँछन् । ‘एयरपोर्ट ओर्लिएदेखि नै समस्या सुरु हुन्छ । फोटो र गुगलमा देखिएजस्तो छैन अस्ट्रेलिया,’ उनी भन्छन्, ‘यहाँ हुन सक्ने समस्याको सामना गर्न तयार भएर आउनुपर्छ तर धेरै विद्यार्थी सपना मात्रै लिएर आउँछन् ।’ साथीभाइको संगतले पनि फरक पार्ने उनले बताए ।

सिड्नीका मानसिक रोग विशेषज्ञ घनश्याम चापागाईंका अनुसार अस्ट्रेलियामा रहेका पाँचमध्ये एक नेपाली मानसिक रोगबाट पीडित छन् । समयमै चिकित्सकको सल्लाह नलिनु ठूलो समस्या भएको उनी बताउँछन् । सल्लाह र उपचार लिन आउँदा ढिलो भइसक्ने उनको अनुभव छ । ‘यसले गर्दा बेलैमा उपचार हुन पाउँदैन,’ उनले भने ।

‘मसँग अहिले ३० जना मानसिक रोगका नेपाली बिरामी छन् । आर्थिक अभाव, गलत संगत, धेरै अपेक्षाले उनीहरू यो रोगको चपेटामा परे,’ मेलवर्नका मानसिक रोग विशेषज्ञ अनुपम पोखरेल भन्छन् ।

उनी पनि दूतावास र एनआरएनलगायत संस्थाले विद्यार्थीलाई प्रभावकारी परामर्श दिनुपर्ने बताउँछन् । अस्ट्रेलिया अध्ययनका लागि आवश्यक पर्ने ‘नो अब्जेक्सन लेटर’ लिनुअघि विद्यार्थी तथा अभिभावकलाई अस्ट्रेलियाबारे विशेष जानकारी लिनैपर्ने प्रावधान राख्नुपर्ने उनी बताउँछन् ।

‘भिसा लागेपछि कन्सल्टेन्सीले पनि तालिमको व्यवस्था गर्नुपर्छ,’ उनी भन्छन् । एनआरएन अस्ट्रेलियाका महासचिव नारायण कोइराला सकेसम्म सामाजिक कल्याणकारी कोषमार्फत विद्यार्थीलाई सहयोग गर्ने कोसिस गरेको बताउँछन् । ‘मानसिक समस्यामा रहेकालाई रिफरल, नेपाल फर्किन परे टिकट काटिदिने, अस्पतालमा आवश्यक परे साथी बनिदिने जस्ता काम हामीले गरिरहेका छौँ,’ उनले भने ।

प्रकाशित : श्रावण ७, २०७५ २०:४९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT