नेपालीभाषी भुटानीहरुले मनाए पुनर्वास एक दशक

भुटानबाट लखेटिएपछि नेपालको पूर्वी क्षेत्रहरुमा बसोबास गर्दै आएका नेपालीभाषी भुटानीहरुलाई अष्ट्रेलियाले सन २००८ देखि पुर्नवासमा ल्याएको थियो ।

पुनर्वासमा आएको एक दशक पुगेको अवसरमा उनीहरुले कलासंस्कृति, परम्परा र खानाहरुका साथ अतिथीहरुलाई स्वागत गरेका थिए भने नयाँ जीवन जीउने अवसर दिएको भन्दै अस्ट्रेलिया तथा यहाँका जनताहरुलाई धन्यवाद समेत दिएका थिए । कार्यक्रममा विभिन्न नेपाली गीतसंगीतहरुमा नृत्य, गायनहरु समेत प्रस्तुत गरिएको थियो ।

अस्ट्रेलियामा अहिले करिब ७ हजारको संख्यामा नेपालीभाषी भुटानीहरु रहेको बताईन्छ । अस्ट्रेलियाले मुख्य गरेर दक्षिण अस्ट्रेलिया र अल्बरीमा ठूलो संख्यामा उनीहरुलाई स्थापित गराएको छ भने मेल्बर्नका विभिन्न स्थानहरुका साथै तास्मानिया, ब्रिसबन, केन्स, सिड्नी लगायतका स्थानहरुमा समेत उल्लेख्य संख्यामा उनीहरुलाई पुनर्वास गराएको छ ।

१० वर्षको अवधिमा आफुहरुले पाएको सफलता र पाएको नयाँ जीवनलाई उत्साहका साथ मनाउनका लागि विशेष कार्यक्रमको आयोजना गरिएको उनीहरुले बताएका छन् ।

‘हाम्रो मुख्य उद्देश्य नै आफुहरुलाई अस्ट्रेलियाली सरकार र यहाँका जनताले दिएको साथ, माया र विश्वासलाई सम्मान गर्ने र सम्बन्धलाई अझ विस्तार गर्ने हो ।’ भुटानी युवा तथा कलाकार दुर्गा रिमालले कान्तिपुरसँग भने ।

तास्मानिया, मेल्टन, एडिलेड र अल्बरीमा रहेका नेपालीहरुले कार्यक्रम सम्पन्न गरिसकेका छन् भने सिड्नीमा केही दिनमा आयोजना गर्ने तयारी भइरहेको छ । कार्यक्रममा सहभागिहरुले आफू नेपालको विभिन्न शिविरहरुममा रहन्दादेखि अस्ट्रेलियामा आएर गरिएको संघर्षहरुलाई सम्झना गरेका थिए ।

अस्ट्रेलियाली सरकार तथा काउन्सिलको तर्फबाट सहभागीहरुले शरणार्थीको रुपमा आएपनि अस्ट्रेलियालाई बहुसांस्कृतिक देश बनाउन पुर्याएको योगदानको प्रशंसा गरेका थिए ।