बेलायतको जनगणना फाराममा ‘नेपाली’ राख्न प्रधानमन्त्रीसँग माग

कान्तिपुर संवाददाता

लन्डन — आगामी मार्च २०२१ मा बेलायतमा हुने जनगणना फाराममा ‘अदर एसियन’ को सट्टा ‘नेपाली’ राखिनुपर्ने माग यहाँका नेपालीले प्रधानमन्त्री टेरेजा मेसँग गरेका छन् । 

गैरआवासीय नेपाली संघ बेलायत (एनआरएनए युके) को नेतृत्वमा बेलायतका प्रमुख नेपाली संघसंस्थाका प्रतिनिधिले बुधबार ज्ञापन बुझाएका हुन् । सुरुमा प्रधानमन्त्रीलाई नै भेट्ने प्रचार गरिए पनि मेले समय नदिएपछि प्रधानमन्त्री कार्यालय टेन डाउनिङ स्ट्रिटको ढोकामा ज्ञापनपत्र दिइएको हो । प्रधानमन्त्री मे यतिबेला ब्रेक्जिट सम्झौता संसदबाट अनुमोदन

Yamaha

गराउन संघर्ष गरिरहेकी छन् । ब्रेक्जिट अन्योल र आफ्नै पद अनिश्चयको घेरामा रहेका बेला मेले नेपालीलाई समय दिने सम्भावना झिनो थियो ।

बेलायतको केन्द्रीय तथ्यांक विभागले आउँदो अटममा संसदमा पेस गर्न लागेको श्वेतपत्रमा जनगणना फाराममा चारवटा ‘इथ्नीक माइनोरिटी’ समुदायलाई सिफारिस गरिए पनि ‘नेपाली’ नराखिएको ज्ञापनमा गुनासो छ ।

गत २२ अगस्टमा अल्डरसटमा युके सेन्सस नेशनल स्ट्याटिसटिसियनका जोन पुलिन्जरलगायत ओएनएस
पदाधिकारी तथा नेपाली समुदायबीच यसबारे गहन छलफल भएको थियो । छलफलमा सकारात्मक संकेत दिइए पनि अहिले नेपाली छुटाइएकोमा नेपाली समुदायको रोष छ । बेलायत र नेपालबीच दुई शताब्दी लामो सम्बन्धमात्र होइन, गोर्खाहरुको साहस र योगदान एवं बेलायतमा झण्डै दुई लाख नेपाली रहेको अवस्थामा फाराममा ‘नेपाली’ टिक लगाउन मिल्ने विकल्प राखिनुपर्ने नेपालीको माग छ ।

ज्ञापन बुझाउन रसमोर क्षेत्रका सांसद लियो डोचेर्टी, रसमोर बरो काउन्सिल लिडर डेभिड क्लीफोर्ड, काउन्सिलर लक्ष्य गुरुङ, युके नेपाल फ्रेण्डसीप सोसाइटीका अध्यक्ष अलान सान्का, एनआरएनए केन्द्रीय उपाध्यक्ष कुल आचार्य, एनआरएनए युके अध्यक्ष योगकुमार फगामी, उपाध्यक्ष पुनम गुरुङ, पूर्वअध्यक्ष सूर्य गुरुङ, तमुधिं युके अध्यक्ष ज्ञाम गुरुङ, सहारा युके अध्यक्ष मिनबहादुर गुरुङ, ग्रेटर रसमोर नेपलिज कम्युनिटी अध्यक्ष जीव बेल्वासेलगायत बेलायतको विभिन्न सहरबाट आएका नेपाली सहभागी थिए ।

जनगणना फाराममा नेपाली विकल्प राख्दा आफ्नो पहिचान स्थापित गर्न थप टेवा पुग्ने विश्वास नेपाली समुदायको छ । नेपाली समुदायकै पहलमा ग्रीनवीच बरो काउन्सिलले भने आफ्ना हरेक फाराममा ‘नेपाली’ समावेश गरिसकेको छ ।

प्रकाशित : मंसिर २०, २०७५ १५:४१
ADVERTISEMENT
प्रतिक्रिया
पठाउनुहोस्
ADVERTISEMENT

हुवावे कम्पनीका उच्च अधिकारी क्यानाडामा पक्राउ,चीनको विरोध

एएफपी

ओट्टावा — चीनियाँ दूरसञ्चार कम्पनी हुवावेका संस्थापककी छोरी एवं कम्पनीकी उच्च अधिकारी मेङ वान्झाउलाई क्यानाडामा पक्राउ गरिएपछि चीनले आपत्ति जनाएको छ ।

मेङलाई अमेरिका सुपुर्दगी गर्ने तयारी भइरहेको क्यानाडाका अधिकारीहरुले बताएका छन्। ओट्टावास्थित चिनीयाँ राजदूतावासले मेङलाई तत्काल रिहा गर्न आग्रह गरेको छ।

मेङ वानझाउ हाल हुवावेकी प्रमुख वित्तीय अधिकृत हुन्। इरानमाथिको अमेरिकी नाकाबन्दीको हुवावेले अवज्ञा गरेको आरोपमा अमेरिकी अधिकारीहरुले अनुसन्धान सुरु गरेको बताइएको छ।

अमेरिकी गुप्तचर अधिकारीहरुले हुवावेका गतिविधिमाथि निगरानी गरिरहेको र उक्त कम्पनी राष्ट्रिय सुरक्षाका दृष्टिले खतरापूर्ण रहेको बताउँदै आएका छन्।

संयुक्तराज्य अमेरिका र चीनबीच जारी व्यापारिक तनावका सन्दर्भमा तीन महिने युद्धविराम गरेको केही दिनभित्रै नयाँ विवाद सतहमा आएको छ। दुवै देशका व्यापार मध्यस्थकर्ताहरुमाथि तीन महिनाभित्र असमझदारीहरु हटाउनुपर्ने गहन जिम्मेवारी छ।

मेङको गिरफ्तारीसँगै एसियाली सेयरबजारमा त्यसको असर देखिएको छ। साङघाइ र हङकङको सेयरबजारमा गिरावट आउनुका साथै प्रविधि क्षेत्रको सेयरमा मन्दी छाएको छ। मध्यान्हसम्म साङघाइ स्टक एक्सचेन्ज एक दशमलव ३ र हङकङ स्टक दुई दशमलब ६ प्रतिशतले घटेको छ।

'चीनले हाम्रो राष्ट्रिय सुरक्षा चासोलाई सुझबुझपूर्ण किसिमले बेवास्ता गरिरहेको छ, र संयुक्तराज्य अमेरिका तथा हाम्रा गठबन्धन राष्ट्रहरुले यस्तो परिस्थितिलाई टुलुटुलु हेरेर बस्न सक्दैनन्,'अमेरिकी सिनेटर बेन सास्सेले बताए।

उनले जारी गरेको एक वक्तव्यमा भनिएको छ,' कहिलेकाहिँ चिनीयाँ अतिक्रमण पूरै राज्य–प्रबन्धित देखिन्छ भने कहिलेकाहिँ चीनका तथाकथित निजी कम्पनीहरुले यो कार्य गरिरहेका छन्।'

क्यानाडाको न्याय मन्त्रालयले एक वक्तव्यमा मेङलाई भ्यानकुभरबाट डिसेम्बर १ तारिखमा गिरफ्तार गरिएको जनाएको छ। मन्त्रालयले मेङलाई अमेरिका सुपुर्दगी गर्न आग्रह गरेको बताएको छ। मेङका पिता एवं हुवावेका संस्थापक रेन झेङफाई चिनीयाँ जनमुक्ति सेनाका पूर्व इन्जिनियर हुन्।

हुवाएले मेङले कुनै गलत कार्य गरेको बारेमा जानकारी नभएको बताउँदै आरोपका बारेमा ज्यादै कम जानकारी दिइएको बताएको छ।

कम्पनीले जारी गरेको एक वक्तव्यमा भनिएको छ,'हुवाएले सबै किसिमका कानुनी प्रक्रिया पूरा गरिरहेको छ। राष्ट्रसंघ, अमेरिका र युरोपेली युनियनबाट जारी भएका प्रतिबन्धहरु एवं नियमहरुलाई पूर्ण पालना गरिएको छ।'

वालस्ट्रिट जर्नलले अप्रिलमा अमेरिकी न्याय विभागले इरानविरुद्ध अमेरिकी प्रतिबन्धलाई हुवाएले उल्लंघन गरिरहेको भन्दै छानबिन थालेको समाचार प्रकाशन गरेको थियो।

प्रकाशित : मंसिर २०, २०७५ १५:३९
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT